Read Batak Angkola PILIPPI 4 Bible Online

PILIPPI 4 - Batak Angkola bible

PILIPPI 4

¹Hara ni i hamu ale angka dongan na nihaholongan, sai porsaya situtu ma hamu tu Tuhan i di ngolumunu on. Lungun do rohangku tu hamu! Hamu do na pagodang rohangku, hajopan ni rohangku.

²Hupaingot do si Euodia dohot si Sintike anso saroha halahi di bagasan Tuhan i.

³Laing hupangido dope tu ho, donganku na bonar roha i sai urupi ma halahi, na dung marporang rap dohot au hara ni Jamita Na Denggan i rap dohot si Klemen dohot donganku saparkarejoan na asing i, na tarsurat do goar ni halahi di buku hangoluan i.

⁴Marjop ni roha ma hamu tongtong di bagasan Tuhan i! Sanoli nari hudok: Marjop ni roha ma hamu!

⁵Angkon idaon ni halak ma nian pangalahomunu sian roha na denggan. Madung donok Tuhan i.

⁶Ulang pola holoskon hamu sanga na aha. Sanga dia pe na masa, martangiang ma hamu jana pasahat hamu ma pangidoanmunu tu Debata. Sanga aha na porlu di hamu, paboa hamu ma i tongtong tu Debata mardongan roha na mandok tarimakasi.

⁷Hasonangan ni Debata na sumurung sian sude roha, manjagahon roha dohot pikiranmunu di bagasan Kristus Jesus.

⁸Ujungna, ale angka dongan, bagi aha na sintong, na pantun, na tigor, na ias, na jeges, na denggan begeon, angka parange na denggan jana sipujion, i ma pikiri hamu.

⁹Jana sanga aha na dung niguruhon jana nijagitmunu, dohot sanga aha na dung nibege jana niidamunu sian au, karejohon ma i; gabe donganan ni Debata mual ni hasonangan i ma hamu.

¹⁰Marjop ni roha situtu do au di bagasan Tuhan i, dibaen margogo hamu mangulahi manyarihon au. Disarihon hamu do au nian, tapi nada adong hatihamu di hatiha na jolo i.

¹¹Tapi hudok pe songon i nada na mandok adong na hurang di au sanga aha, harana madung huparsiajari mangkasonangkon sanga aha na adong.

¹²Madung hurasoi do ngolu na marhahurangan, dohot ngolu na marlobi-lobian. Huboto do rahasiana laho mangadopi sude na masa sanga na bia pe: Bope di hatiha butongan sanga hatiha malean, di hatiha marlobi-lobian sanga pe di na hurangan.

¹³Markite-hite kuaso na nilehen ni Kristus i tu au, taradopi au do sude ragam-ragam ni angka na masa.

¹⁴Tapi madung diurupi hamu au di sudena hasusaanku; jana na denggan do pambaenanmunu i.

¹⁵Hamu angka dongan na maringanan di Pilippi! Tangkas do diboto hamu di na kehe au sian Makedonia na salpu i, di na pararatkon Jamita Na Denggan i parjolo situtu, hum hamu sajo ma i parlagutan na mangurupi au; hum hamu sajo ma na dohot mandai untung rugina rap dohot au.

¹⁶Dompak di Tessalonika au di na porlu pangurupion di au, nada hum sanoli be ditongos hamu bantuan tu au.

¹⁷Nada hum silehen-lehenmunu i na giot jagitonku, tapi anso huida do angka suha na patamba hauntunganmunu, i do na huhalungunkon.

¹⁸Madung hujagit sasudena — dohonon marlobi-lobi dope! Sude silehen-lehen na nitongosmunu i tu au, madung hujagit sian si Epafroditus. Saonnari madung tuk di au sanga aha haporluanku. Songon uap na huskus na sian haul na nihaulkon tu Debata jana na nihalomohon ni roha ni Debata, songon i do angka silehen-lehenmunu i.

¹⁹Pasingkopon ni Debatangku ma sudena na hasaya di hamu mangihutkon hagabeanNia na so tarsuhat i na adong di Kristus Jesus.

²⁰Sai tapuji ma Debata Amanta i salolot-lolotna! Amen.

²¹Pabolkas hamu ma tabengku tu sudena halak na badia di bagasan Kristus Jesus. Jana jagit hamu muse ma tabe sian angka dongan na rap dohot au dison.

²²Sudena halak na badia dison, lumobi sian halahi na sian bagas godang ni Kesar i, manongos tabe do tu hamu angka dongan.

²³Sai ibo ma roha ni Tuhan Jesus Kristus, dipasupasu ma hamu sudena.