Read Batak Angkola JOSUA 1 Bible Online

JOSUA 1 - Batak Angkola bible

JOSUA 1

¹Dung marujung ngolu ni si Musa naposo ni TUHAN i, mangkuling ma TUHAN tu wakil ni si Musa i ma si Josua anak ni si Nun.

²Didok TUHAN ma, “Madung marujung ngolu ni naposongKu si Musa. Saonnari markobas ma ho dohot sude bangso Israel laho manaripari Batang aek Jordan dohot mamasuhi tano na giot lehenonKu di halahi.

³Madung Hudokkon tu si Musa, madung Hulehen tu ho dohot tu sude bangsongKi sude luat na giot topotonmunu i.

⁴Gistang ma tanomunu i mamungka sian parhorsihan na di Selatan lopus tu parbalohan Libanon di sabola Utara; jana sian Batang aek Efrat na godang i di Habincaran lalu tu Laut Tonga di sabola Hasundutan.

⁵Salolot di ngolumu ale Josua, sada halak pe nada adong na tolapsa manaluhon ho. Angke sai dongananKu do ho songon pandonganingKu di si Musa. Sai na tongtong do ho dongananKu. Nada unjung tadingkononKu ho.

⁶Sai marpos ni roha ma ho jana ulang mabiar, angke ho do na mamimpin bangso on di na giot buaton ni halahi luat na dung Hujanjihon tu ompu na umpompar halahi.

⁷Hum on do, sai marpos ni roha ma ho jana togu. Ingot ma ho laho mangoloi sadenggan-dengganna sandok uhum na nilehen ni si Musa naposongKu tu ho. Ulang layas rohamu saotik pe di angka uhum i, anso maruntung ho sanga tudia pe ho kehe.

⁸Parrohahon ma denggan anso sai tongtong disise buku niuhum i ganop maribadat hamu. Parsiajari ma buku i arian dohot borngin jana dalankon ma sude na tarsurat di bagasan buku i ulang parlayas. Muda dipatulus ho sudena i, sonang ma ngolumu jana maruntung.

⁹Ingot, madung Huparentahon tu ho anso marpos ni roha situtu ho! Ulang ho mabiar sanga hurang semangat, angke Au TUHAN Debatamu, sai na dongananKu do ho sanga na tu dia pe ho kehe.”

¹⁰Jadi disuru si Josua ma angka pamimpin ni bangso Israel i

¹¹kehe tu sude parbandaran i jana diparentahon ma songon on tu rayat i, “Parade hamu bohal, angke tolu ari nari angkon tariparanmunu ma Batang aek Jordan laho mambuat tano na nilehen ni TUHAN Debatamunu i di hamu.”

¹²Tu Marga Ruben dohot Gad bope tu satonga Marga Manase, didok si Josua,

¹³“Ingot! Madung didok si Musa naposo ni TUHAN i do tu hamu, anggo tano na di Habincaran ni Batang aek Jordan on na giot lehenon ni TUHAN Debatamunu do di hamu baen tanomunu sandiri.

¹⁴Padiar ma tinggal dadaboru dohot dakdanak maradu angka pahan-pahananmunu dison, tapi anggo angka tentaramunu angkon markobas ma marporang jana manjoloi bangsomu angka halak Israel manaripari Batang aek Jordan. Angkon urupan ni angka parporang i do halahi

¹⁵lopus sidung diingani halahi luat na di Hasundutan ni Batang aek Jordan on na dung dilehen TUHAN Debatamunu di halahi. Dung tumbuk di roha ni TUHAN paloaskon sude bangso Israel mangolu marsonang-sonang, baru ma anso tola mulak angka parporangmunu i mangulahi tu tanomunu sandiri di sabola Habincaran ni Jordan on, i ma na nilehen ni si Musa naposo ni TUHAN i tu hamu.”

¹⁶Jadi dialusi Marga Ruben, Gad dohot deba sian Marga Manase ma, “Sanga aha na nisurumu baenonnami, patulusonnami ma i, jana sanga tu dia disuru ho hami kehe, laing na kehe ma hami.

¹⁷Sai na oloannami do angka na niparentahonmu, laing songon si Musa na sai hami oloi. Sai didongani TUHAN Debatami ma ho songon pandonganiNia di si Musa!

¹⁸Sanga na ise pe na mangalo kuasomu, sanga na so mangihutkon parentamu, mate hona uhum ma i. Sai pos ma rohamu jana ulang mabiar ho!”