Read Batak Angkola JOSUA 14 Bible Online

JOSUA 14 - Batak Angkola bible

JOSUA 14

¹Ihut ma muse dison baritana sanga songon dia parbagina Luat Kanaan na di Hasundutan ni Batang aek Jordan di halak Israel. Anggo na marbagi-bagi tano i tu halak Israel, Malim Eleasar do, si Josua anak ni si Nun dohot angka kapala ni marga na sian marga-marga Israel.

²Songon na niparentahon ni TUHAN tu si Musa, anggo luat na di Hasundutan ni Batang aek Jordan ditontuhon do gabe bagian ni sambilan satonga marga ni Israel. Jana angkon diundi do parbagina baenon.

³Anggo na dua satonga marga na asing i madung dilehen si Musa tano na di Habincaran ni Batang aek Jordan. (Porlu paboaon dison, anggo pomparan ni si Josep marbagi dua do di marga: Marga Manase dohot Marga Efraim.) Taringot tu Marga Levi, nada maruli bagi aha sian parbagian tano na nilehen ni si Musa tu halahi. Hum angka kota do dilehen di halahi baen inganan, dohot padang-padang baen panjampalan ni lombu dohot biri-biri ni halahi.

⁵Songon i ma halak Israel marbagi-bagi tano i hombar tu na niparentahon ni TUHAN tu si Musa.

⁶Sanoli ro ma angka halak na sian Marga Juda mandapotkon si Josua di Gilgal. Sada sian halahi, i ma si Kaleb anak ni si Jefunne na sian Marga Kenisi. Didok si Kaleb ma tu si Josua, “Josua! Diboto ho do sanga aha na nidok ni TUHAN di Kades-Barnea tu si Musa, suruan ni Debata i, salaho tu ho dohot tu au.

⁷Marumur opat pulu taon ma au di na nisuru ni si Musa naposo ni TUHAN i au gabe mata-mata laho manangkasi luat on. Jana mulak do au maroban barita na tutu.

⁸Hape anggo angka jolma na kehe rap dohot au, mambaen mabiar do halak Israel. Hape anggo au totop do unduk mangoloi TUHAN Debatangku.

⁹Jadi hara ni i, dijanjihon si Musa ma, anggo tano na hubolusi i pasti do giot lehenon di angka dakdanakku dohot di au sandiri, gabe hami puna.

¹⁰Jadi saonnari madung opat pulu lima taon honokna dung didok TUHAN songon i tu si Musa. Dompak na madangadang dope bangso Israel di parhorsihan, tarjadi songon i. Jana laing songon na dung dijanjihon Tuhan, TUHAN pe dijagohon Ia do au gabe laing tongtong mangolu lopus saonnari. Cubo ma ligi pamatangkon! Marumur ma au saonnari salapan pulu lima taon,

¹¹hape laing gogo dope songon di hatiha na nisuru ni si Musa au na salpu i. Laing tuk dope gogongku laho marporang sanga pe mambaen bagi aha sajo.

¹²Antong, saonnari lehen ma luat na mardolok-dolok na dijanjihon ni TUHAN i tu au di hatiha na mulak au mangalehen barita dohot angka halak na rap dohot au i. Di hatiha i hami paboa do tu ho, bahaso na adong disi bangso raksasa na margoar bangso Enak i. Maringanan di angka kota na godang-godang jana na martembok do halahi. Betak na donganan ni TUHAN do au, gabe bolas usironku halahi morot songon na nidok ni TUHAN i.”

¹³Jadi gabe tumbuk ma di roha ni si Josua di si Kaleb anak ni si Jefunne i, lalu dilehen ia ma tusia kota Hebron gabe bagiannia.

¹⁴Lopus saonnari laing tean-teanan ni pomparan ni si Kaleb anak ni si Jefunne do kota i, halak Kenisi i, dibaen na setia do si Kaleb mangoloi TUHAN, Debata ni Israel.

¹⁵Hebron, digoari do i najolo kota Arba. (Halak na gumodang sian tonga-tonga ni bangso Enak i do si Arba.) Dung i marongok ma parporangan di luat i.