Read Batak Angkola JOSUA 15 Bible Online

JOSUA 15 - Batak Angkola bible

JOSUA 15

¹Batas-batas ni tano parbagian ni angka marga na sian horong Juda, songon on ma: Sabola Selatan, manggistang ma luat i lopus tu ujung di Selatan Halongonan Zin di parbalohan ni Edom;

²mamungka sian ujung ni Laut Mate,

³torus mamintas angka robean ni dolok na di Akrabim lalu tu Zin. Dung i mamintas sian Selatan ni Kades-Barnea, torus tu Hesron, manangkok tu Adar, dung i mangeldok adop Karka.

⁴Sian i torus muse ma garis ni batas i tu Asmon, lalu manyoksok anak ni batang aek di parbatasan ni Mesir, dung i marujung ma di Laut Tonga. Songon i ma garis batas i sabola Selatan, luat ni Juda.

⁵Di Habincaran, Laut Mate ma batasna torus tu Utara lalu tu muara ni Batang aek Jordan. Di Utara, mamungka ma batas i sian muara ni Batang aek Jordan i,

⁶manangkok tu Bet-Hogla, lalu torus tu Utara ni Bet-Araba. Sian i manangkok dope torus batas i tu Utara, lalu tu batu Bohan. (Si Bohan anak ni si Ruben do i),

⁷dung i torus ma i tu Rura Akor lalu tu Debir, lalu mangeldok tu Utara mangulahi adop Gilgal di inganan na tongtang dohot robean ni angka dolok na di Adumim na di Selatan ni rura i. Sian i torus muse tu mual ni aek En-Semes lopus tu En-Rogel,

⁸dung i manangkok mamolus Rura Hinom tu Selatan ni tor inganan hajongjongan ni Jerusalem kota ni angka halak Jebus. Sian i torus ma garis batas i tu ambubu ni tor i di Hasundutan ni Rura Hinom, di ujung Parutara ni Rura Refaim,

⁹dung i torus ma tu mual ni aek Me-Neftoah, torus tu angka kota na di lambung ni Dolok Efron. Sian i mangeldok do garis batas i sabola tu Baala (i ma Kiryat-Jearim),

¹⁰jana marhuliang ma i di Hasundutan ni Baala sabola tu partoran Edom lalu torus tu bagian Utara ni Dolok Jearim (i ma Dolok Kesalon), jana manuat muse tu Bet-Semes, dung i manggistang ma i tu Timna.

¹¹Sian Timna, torus ma garis batas i kehe tu sabola Utara ni Ekron, lalu mangeldok adop Sikron manyalpui Dolok Baala, torus tu Jabneel lalu marujung di Laut Tonga.

¹²Songon i ma garis batas sabola Hasundutan ni luat ni Marga Juda. Di luat i ma maringanan angka halak na sian marga-marga ni Juda.

¹³Hombar tu parenta ni TUHAN tu si Musa, dilehen ma deba luat ni Juda tu si Kaleb anak ni si Jefunne na sian Marga Juda. Dilehen disia Hebron, i ma kota ni si Arba, amang ni si Enak i.

¹⁴Pomparan ni si Enak i, i ma angka halak: Sesai, Ahiman dohot Talmai. Madung dipaorot si Kaleb sudena halahi sian Hebron.

¹⁵Sian i kehe ma si Kaleb mamorangi angka jolma na maringanan di Debir. (Tarbarita do najolo goar ni kota i Kiryat-Sefer.)

¹⁶Ninna si Kaleb ma, “Bayo na tolapsa mangarampas Debir, hulehen ma si Aksa borungki gabe ripena.”

¹⁷Jadi dirampas si Otniel anak ni anggi ni si Kaleb na margoar si Kenas ma kota i; jadi dilehen si Kaleb ma si Aksa borunia i gabe ripe ni si Otniel.

¹⁸Di ari parbagason ni halahi disosak si Otniel ma si Aksa[5] anso dipangido ia tano tu amangnia i. Jadi mijur ma si Aksa sian halodenia i, gabe disapai amangnia i ma, “Aha dope di ho?”

¹⁹Dialusi si Aksa ma, “Di luat na mahiang do tano na nilehen ni amang i di au. Jadi hupangido sanga na piga mual ni aek.” Jadi gabe dilehen si Kaleb ma disia mual ni aek di dolok dohot mual ni aek na di lombang.

²⁰Mangihut dipajojor dison tano na dilehen tu angka marga ni Juda, baen halahi puna.

²¹Angka kota na dumao di Selatan na gabe bagian ni Juda, i ma na donok tu parbatasan ni Edom, i ma: Kabseel, Eder, Jagur, Kina, Dimona, Adada, Kedes, Hasor, Jitnan, Zip, Telem, Bealot, Hasor-Hadata, Keriot-Hesron (i ma Hasor), Amam, Sema, Molada, Hasar-Gada, Hesmon, Bet-Pelet, Hasar-Sual, Berseba, Bisiotia, Baala, Iyim, Esem, Eltolad, Kesil, Horma, Ziklag, Madmana, Sansana, Lebaot, Silhim, Ain dohot Rimon, pungu dua pulu sambilan kota sudena, dohot ma i angka luat na humaliangsa.

³³Kota na di dolok-dolok i ma: Estaol, Zora, Asna, Zanoah, En-Ganim, Tapuah, Enam, Jarmut, Adulam, Sokho, Aseka, Saarim, Aditaim, Gedera, dohot Gederotaim; pungu sude opat bolas.

³⁷Masuk muse dope Zenan, Hadasa, Migdalgad, Dilean, Mispa, Jokteel, Lakis, Boskat, Eglon, Kabon, Lahmas, Kitlis, Gederot, Bet-Dagon, Naama dohot Makeda pungu sude onom bolas rap dohot huta na humaliangna.

⁴²Laing masuk tu Juda dope i ma: Libna, Eter, Asan, Jiftah, Asna, Nesib, Kehila, Aksib dohot Maresa, pungu sude sambilan rap dohot angka hutana.

⁴⁵Tamba ni i taretong muse dope Ekron dohot angka luat na humaliangna,

⁴⁶dohot sude angka kota dohot angka luat na di lambung ni Asdod, sian Ekron lopus tu Laut Tonga.

⁴⁷Songon i muse Asdod dohot Gasa dohot angka luat maradu angka pagaranna na gumodang lopus tu lambung ni anak ni batang aek na di parbatasan ni Mesir dohot topi ni Laut Tonga.

⁴⁸Angka kota na di dolok i ma: Samir, Jatir, Sokho, Dana, Kiryat-Sana (i ma Debir), Anab, Estemo, Anim, Gosen, Holon, dohot Gilo, pungu sabolas kota rap dohot angka luat humaliangna.

⁵²Laing nampuna ni Juda muse do: Arab, Duma, Esan, Janum, Bet-Tapuah, Afeka, Humta, Kiryat-Arba (Hebron) dohot Zior, pungu sambilan kota dohot angka luat na humaliangna.

⁵⁵Songon i muse sisampulu kota na mangihut on dohot angka luat na humaliangna: Maon, Karmel, Zip, Juta, Jisreel, Jokdeam, Zanoah, Kain, Gibea dohot Timna.

⁵⁸Dohot muse, Halhul, Bet-Zur, Gedor, Maarat, Bet-Anot, dohot Eltekon, pungu sude onom kota dohot angka luat na humaliangna.

⁶⁰Songon i muse kota na dua nari on rap dohot angka luat na humaliangna: Kota Kiryat-Baal (i ma Kiryat-Jearim) dohot kota Raba.

⁶¹Kota na di halongonan i ma: Bet-Araba, Midin, Sekhakha, Nibsan, Kota Sira dohot En-Gedi, pungu sude onom kota dohot angka luat na humaliangna.

⁶³Kota Jerusalem pe masuk bagian ni Juda do, tapi nada tarpaorot halak Juda haruar angka halak Jebus na maringanan disi. Lopus saonnari laing rap maringanan di kota i do angka halak Jebus dohot halak Juda.