Read Batak Angkola JOSUA 18 Bible Online

JOSUA 18 - Batak Angkola bible

JOSUA 18

¹Dung dipatunduk halak Israel luat na nijanjihon ni Tuhan i, marlagut ma sude bangso i di Silo; dipasang halahi ma Bandar Parmianan Ni TUHAN.

²Pitu nari marga ni Israel na so dapotan dope parbagian ni tano.

³Jadi didok si Josua ma tu halak Israel, “Sadia honok nari painteonmunu anso kehe hamu mangingani luat na nilehen ni TUHAN, Debata ni ompumunu i, di hamu?

⁴Pili hamu ma tolu halak sian ganop marga. Giot suruonku halahi mangaliati sude luat on laho mangukur batas-batas ni luat por ni roha ni halahi gabe halahi puna. Dung salpu i angkon mulak halahi mandapotkon au.

⁵Dibagi pitu ma tano i baen di halahi. Anggo Juda torus ma i di Selatan, jana Josep di luat na di Utara.

⁶Disuratkon ma garis batas ni tano na pitu bagian i, baru dilehen tu au. Huundi ma muse anso tarboto sanga aha na nitontuhon ni DEBATA di hamu.

⁷Hum Marga Levi sajo do na so dapotan parbagian tano rap dohot hamu, angke anggo bagian ni halahi, i ma: Gabe angka malim laho mangoloi TUHAN. Jana anggo salaho tu Marga Gad, Ruben dohot Manase Parhabincaran, na dung manjagit bagianna be do halahi di Habincaran ni Jordan. Na dung dilehen si Musa, naposo ni TUHAN i do tano i di halahi.”

⁸Jadi dipaingot si Josua ma angka halahi songon on, “Tangkasi hamu ma sude luat i jana ukur hamu ma tano i, dung i ro ma hamu mandapotkon au. Huundi ma muse di Silo on anso tarboto sanga aha na nitontuhon ni TUHAN di hamu.”

⁹Diliati halahi ma sude luat i lalu nisurati batas-batas ni tano na pitu bagian i lalu disuratkon sude angka kota na adong di luat i. Dung i mulak ma halahi mandapotkon si Josua di Silo.

¹⁰Dung i didanggurkon si Josua ma undi anso tarboto sanga aha na nitontuhon ni TUHAN di halahi. Dung salpu i, dilehen si Josua ma tu ganop marga ni Israel na so dapotan parbagian ni tano i dope, tano bagianna be.

¹¹Bagian na parjolo, i ma tano baen di angka ripe na sian Marga Benyamin. Antara ni tano ni Marga Juda dohot tano ni marga sian pomparan ni si Josep do bagian ni halahi.

¹²Sabola Utara, mamungka ma batas ni tano ni halahi di Batang aek Jordan, manangkok ma i di pat ni dolok di Utara ni Jeriko, dung i tu Hasundutan manyalpui luat partoran lopus tu luat Halongonan Bet-Awen.

¹³Torus muse ma garis batas i tu lereng sabola Selatan ni Lus (tarbonggal muse do i Betel), lalu manuat ma i tu Atarot Adar na di dolok sabola Selatan ni Bet-Horon-Jae.

¹⁴Sian Hasundutan ni dolok i, mangeldok ma garis batas ni tano i tu Selatan adop tu Kiryat-Baal (i ma Kiryat-Jearim). Marga Juda do nampuna Kiryat-Baal. I do batas ni tano i sabola Hasundutan.

¹⁵Batasna sabola Selatan, mamungka ma i sian ujung ni Kiryat-Jearim torus tu angka mual ni aek Me-Neftoah.

¹⁶Dung i manuat ma garis batas i tu pat ni dolok na paadop-adop dohot Rura Hinom, di ujung sian Utara ni Rura Refaim. Dung i mamolus ma garis batas i sian Rura Hinom tu Selatan, sabola Selatan ni robean ni tor na di Luat Jebus, laho tu En-Rogel.

¹⁷Torus mangeldok ma garis batas i tu Utara tu En-Semes, torus tu Gelilot di bariba ni Tangkohan Adumim. Dung i manuat ma batas i tu batu Bohan (anak ni si Ruben do si Bohan),

¹⁸mamolus lereng ni dolok sabola Utara na paadop-adop dohot Rura Jordan. Manuat ma mangulahi garis batas i tu lombang,

¹⁹mamolus sian lereng ni Dolok Bet-Hoglah sabola Utara, lalu marujung di Laut Mate sabola Utara, di muara ni Batang aek Jordan.

²⁰Batang aek Jordan na gabe batas ni tano i anggo sabola Habincaran. Songon i ma batas-batas ni tano na dilehen tu angka ripe sian Marga Benyamin.

²¹Angka kota na gabe bagian ni angka ripe sian Marga Benyamin i, i ma Jeriko, Bet-Hoglah, Emek-Kesis,

²²Bet-Araba, Zemaraim, Betel,

²³Awim, Para, Ofra,

²⁴Kefar Amonai, Ofni, dohot Geba. Adong do dua bolas kota sude rap dohot angka huta-hutana.

²⁵Songon i muse Gibeon, Rama, Beerot,

²⁶Mispa, Kefira, Mosa,

²⁷Rekem, Jirpeel, Tarala,

²⁸Zela, Elep, Jebus (i ma Jerusalem), Gibea dohot Kiryat-Jearim. Opat bolas kota sudena dohot angka luatna. Angka i ma tano na dilehen tu ripe sian Marga Benyamin na gabe bagian ni halahi.