Read Batak Angkola JOSUA 2 Bible Online

JOSUA 2 - Batak Angkola bible

JOSUA 2

¹Dung i disuru si Josua ma tu Kanaan dua halak mata-mata sian parbandaran na di Sitim. Diparentahon do mata-mata sidua halak i laho manangkasi tano Kanaan di na buni, lumobi kota Jeriko. Jadi kehe ma sidua halak i tu kota i, jana marborngin ma halahi di bagas ni sada dadaboru jalang na margoar si Rahab.

²Dipaboa halak ma tu raja ni Jeriko i bahaso na adong piga-piga halak Israel di borngin i na ro mamata-matai luat ni Jeriko.

³Jadi disuru raja i ma halak mandapotkon si Rahab na mandok, “Na mamata-matai sude luat ni Jeriko do umbaen na ro angka halak na marborngin di bagasmi! Pasigop paruar halahi!”

⁴Tapi madung ditabunihon dadaboru i halahi, jana ning si Rahab mangalusi, “Tutu nian adong do ro halak tu bagasku, tapi nanggo huboto sanga na sian dia halahi.

⁵Nangkin taran so ditutup horbangan ni kota, di na lusut mataniari, ma pola kehe halahi. Jana nada pola husapai sanga na tu dia halahi kehe. Tapi muda hipas do hamu mangkojar halahi dapot hamu dope halahi.” (

⁶Hapengani na dung dioban si Rahab do mata-mata sidua halak i tu loteng ni bagasnia i jana ditabunihon ia halahi di toru ni bayon na gukguk disi.)

⁷Jadi markehean ma antong suruan ni raja i jana manigor digoruk ma horbangan ni kota i disi haruar halahi. Dijalak-jalahi halahi ma mata-mata ni Israel i lopus tu inganan panariparan di Batang aek Jordan.

⁸Di borngin i painte so modom mata-mata ni Israel sidua halak i, kehe ma si Rahab tu loteng,

⁹jana didok ia ma tu halahi, “Huboto do na dung dilehen TUHAN do anggo luat on tu hamu. Sude do halak na dison mabiar tu hamu.

¹⁰Na dung hami bege do baritana bagi na songon dia dibaen TUHAN pahiangkon Laut Rara di jolo ni matamunu di na kehe hamu manadingkon Mesir. Hami bege muse do sanga na bia dibaen hamu mamunu si Sihon dohot si Og raja ni bangso Amori na dua i di Habincaran ni Batang aek Jordan.

¹¹Disi hami bege barita i, gabe sun ma biarnami. Ma pola mago habaranion nami hara ni hamu. Debata ni langit dohot tano do anggo TUHAN Debatamunu.

¹²Antong sumpahon hamu ma mangasahon goar ni TUHAN bahaso na denggan do baenonmunu tu au dohot tu koumku songon denggan ni na hubaen tu hamu. Janjihon hamu ma paboa na so bunuonmunu damang dohot dainang, angka dongan sainangku dohot sude dongan sabagas ni halahi, tapi ondihononmunu do. Antong, lehen hamu ma sada tanda paboa na tutu do hamu bisa huhaporsayai!”

¹⁴Jadi didok bayo sidua halak i ma tusia, “Marjanji ma hami, muda lehenon ni TUHAN luat on tu hami, denggan do baenonnami tu hamu asal ma nada dipaboa ho sanga na tu ise pe taringot tu hami. Sai mate ma hami, muda nada hami patulus janjinami on.”

¹⁵Di tembok ni kota i do anggo bagas ni si Rahab i, jadi ditantan si Rahab ma dohot tali bayo na dua i paijurkonsa sian jandela.

¹⁶“Kehe ma hamu tu dolok-dolok an,” ning si Rahab tu halahi, “Anso ulang dapot angka jolma na nisuru ni raja i hamu. Disi ma hamu martabuni tolu ari on lopus mulak halahi. Dung i, tola ma hamu patoruskon pardalananmunu.”

¹⁷Didok mata-mata sidua halak i ma tu si Rahab, “Antong denggan ma i, dibaen ho hami marjanji; patulusonnami do janji i.

¹⁸Angkon baenonmu do songon on. Muda ro hami mamorangi luatmunu on, tambatkon ma tali na rara on di jandela inganan parmijurannami on. Palagut ma amanta-inanta, angka ibotomu dohot sude sisolkot ni amanta di bagas on.

¹⁹Muda adong sada halahi na haruar sian bagas on lalu mate, salana sandiri do hamateanna i, nada tanggung jawabnami be i. Tapi muda adong halak na di bagasan bagas on na mabugang, hami do na martanggung jawab disi.

²⁰Tapi, muda dipaboa ho taringot tu hami sanga na tu ise pe, nada hona tu hami janjinami.”

²¹Dioloi si Rahab do pangalaho i lalu dipaloas ia ma kehe halahi. Dung i ditambatkon ia ma tali na rara i di jandela.

²²Jadi kehe ma mata-mata sidua halak i tu dolok lalu martabuni disi. Ma sun tu dia anggo angka suruan ni raja i manjalahi halahi di sude luat i di na tolu ari i, hape nada dapotsa halahi. Ujungna mulak ma angka suruan i tu Jeriko.

²³Jadi manuat ma mata-mata ni Israel sidua halak i sian dolok lalu siborang di batang aek i torus mulak mandapotkon si Josua. Dicaritohon halahi ma sude pangalaman ni halahi i tu si Josua.

²⁴Dung i didok halahi ma, “Ma pasti na dung dilehen TUHAN sude luat i tu hita; mabiar do sude halak na disi tu hita.”