Read Batak Angkola JOSUA 24 Bible Online

JOSUA 24 - Batak Angkola bible

JOSUA 24

¹Dipio si Josua ma sude marga-marga ni bangso Israel anso marlagut di Sikem. Jadi marroan be ma angka hatobangon, pamimpin, panguhum dohot angka panglima ni bangso Israel mangadop tu Debata.

²Dung i mandok hata ma si Josua tu sude bangso i, “Tangihon hamu ma sanga aha na giot sidohonon ni TUHAN, Debata ni Israel tu hamu. Pandok ni Debata, ‘Narobi maringanan di bariba ni Batang aek Efrat do ompu na umpompar hamu. Marsomba tu angka debata na asing do halahi. Sahalak sian halahi, i ma si Terah amang ni si Abraham dohot si Nahor.

³Dung i Hubuat ma si Abraham, ompumunu i sian luat na di ipar ni Batang aek Efrat i, lalu Huoban mangaliati sude tano Kanaan. Jana Hulehen disia pomparan na bahat. Mula-mulana Hulehen si Ishak disia,

⁴dung i Hubasa-basahon tu si Ishak dua anak, i ma si Jakob dohot si Esau. Hulehen partoran Edom di si Esau gabe tano bagiannia. Tapi anggo si Jakob ompumunu i, bungkas do tu Mesir rap dohot angka anaknia.

⁵Dung i Huutus ma si Musa dohot si Harun, lalu ditimpalkon halahi hasusaan godang tu Mesir; hape anggo hamu, Huparuar do sian i.

⁶Au do maroban ompumunu haruar sian Mesir, lalu ro angka halak Mesir mangkojar halahi mardongan angka kareta porang dohot tentara na markudo. Jana di na lalu angka ompumunu i di Laut Rara,

⁷pio-pio ma halahi tu au mangido tolong. Jadi gabe manggolap Hubaen inganan antara ni halahi dohot angka halak Mesir i, jana Huparo aek ni laut mangalingkup angka halak Mesir i lopus bonom halahi sudena. Pendekna, sanga aha na Hubaen maradopkon Mesir, sudena i diboto hamu do. Dung i honok sajo ma hamu maringanan di parhorsihan.

⁸Dung salpu i, Huoban ma hamu tu tano ni halak Amori na maringanan di Habincaran ni Batang aek Jordan. Dialo halahi hamu marporang, tapi monang do hamu maralohon halahi. Dirampas hamu tano ni halahi jana Hupatimpas halahi di na maju hamu mangaroro halahi.

⁹Dung i ro ma raja ni Moab, i ma si Balak anak ni si Zippor mangalo hamu. Diutus ia ma halak manopot si Bileam anak ni si Beor laho mangido anso diburai si Bileam hamu.

¹⁰Tapi nada Huterge si Bileam; gabe nada mamurai ia tu hamu tapi mamasumasu do. Songon i ma Hubaen laho paluahon hamu sian si Balak.

¹¹Dung i ditaripari hamu ma Batang aek Jordan, lalu ma hamu di Jeriko. Diporangi halak Jeriko do hamu, songon i halak Amori, halak Peris, Kanaan, Het, Girgasi, Hewi dohot halak Jebus. Tapi Hutaluhon do halahi sudena di hamu.

¹²Dompak na maju hamu mangaroro halahi, bingung halahi Hubaen jana mabiar, jabat maporus raja ni Amori sidua halak i sian hamu. Nada podangmunu jana nada panahmunu mambaen hamu monang.

¹³Tano na dung Hulehen i di hamu, nada hamu na mangkarejohonsa. Jana angka kota na dung Hulehen i di hamu, nada hamu muse na pajongjongkonsa. Hape saonnari hamu ma na maringanan disi. Jana hamu muse ma na umboto dai ni batu ni anggur maradu parbatu ni zetun, hapengani nada hamu na manyuan bonana.’ ”

¹⁴“Antong saonnari,” ninna si Josua manguduti, “sai pasangap hamu ma TUHAN. Situtui hamu ma jana setia mangoloi tuSia. Pasiding hamu ma angka debata na nisomba ni angka ompumunu najolo di Mesopotamia dohot di Mesir. Hum tu TUHAN sajo ma hamu mangoloi.

¹⁵Sugari sura nada ra hamu mangoloi tu TUHAN, laing sadari on ma baen hamu haputusanna, sanga na tu ise do giotmunu mangoloi: Tu angka debata na nisomba ni ompumunu najolo di Mesopotamia, sanga tu angka debata ni halak Amori na niingananmunu tanona saonnari do. Tapi anggo hami — au dohot dongan sabagasku — hum TUHAN do oloannami.”

¹⁶Gabe dialusi halak Israel i ma, “Nada tadingkononnami TUHAN laho mangoloi tu angka debata na asing!

¹⁷TUHAN Debatanta do antong na paluahon ompunta dohot hita sian parhatobanan di Mesir. Madung taida angka hahomangan na nibaen ni TUHAN. Sai diondihon TUHAN do hita di bagasan sude pardalananta manyalpui angka luat na asing.

¹⁸Jana di hatiha na masuk hita tu luat on, diusir TUHAN do morot sude halak Amori na maringanan dison. Jadi, giot mangoloi tu TUHAN do hami, angke Ia do antong Debatanta.”

¹⁹Dung i didok si Josua ma, “Tapi Debata Na Badia do TUHAN; nada ra Ia adong imbangNia. Jadi betak nada sanggup hamu tu pudi on mangoloi TUHAN. Angke muda ditadingkon hamu sanoli on TUHAN, jana kehe hamu mangoloi tu angka debata na asing, nada ampunanNia dosamunu. Balikna do, aloonNia ma hamu jana uhumanNa. PangabisonNa ma hamu, haru pe najolo burju Ia tu hamu.”

²¹Jadi mangalusi ma angka halak Israel i, “Nada! Indangkon na mangoloi hami anggo tu angka debata na asing. Hum tu TUHAN sajo do hami mangoloi!”

²²Dung i didok si Josua ma, “Antong, hamu sandiri ma saksina paboa na dung diputuskon hamu laho mangoloi hum tu TUHAN.” “Na tutu ma i,” ning halahi mangalusi, “hami sandiri ma saksina.”

²³“Antong muda songon i, paduru hamu ma angka debata ni bangso-bangso na asing i na adong di hamu, jana marjanji ma hamu na sai unduk tu TUHAN, Debata ni Israel,” songon i ma pangidoan ni si Josua sian halahi.

²⁴Dung i didok angka halahi ma tu si Josua, “Hum TUHAN Debatanta i do na giot oloannami. Sai oloannami ma angka parentaNia.”

²⁵Jadi di ari i di Sikem, dibaen si Josua ma pamudun ni janji dohot halak Israel; jana disi ma dilehen ia tu halahi angka uhum dohot angka aturan na angkon sioloan ni halahi.

²⁶Disuratkon si Josua ma sude uhum dohot angka aturan i di bagasan Buku Uhum ni Debata. Dung i dibuat si Josua ma sada batu na godang, lalu dipajongjong ia ma i di toru ni sada hayu na godang di inganan hapunjungan ni TUHAN.

²⁷Dung salpu i mandok hata ma si Josua tu sude angka halahi, “Batu on ma gabe saksinta. Sude hata na nipajojor ni TUHAN tu hita, madung dipajojor di jolo ni batu on. Antong, batu on ma na gabe saksi maradopkon hamu, muda dialo hamu sanoli on Debatamunu.”

²⁸Ujungna disuru si Josua ma marmulahan angka jolma i, jadi mulak be ma halahi sudena tu tano ni halahi be.

²⁹Dung salpu i, marujung ma ngolu ni naposo ni TUHAN, i ma si Josua anak ni si Nun, di na marumur ia saratus sampulu taon.

³⁰Di tano bagiannia sandiri do ia dikubur di Timnat Serah na di partoran Efraim di Utara ni Dolok Gaas.

³¹Salolot mangolu si Josua, mangoloi do halak Israel tu TUHAN. Jana dung marujung pe ngolunia laing totop do halahi mangoloi tu TUHAN salolot adong dope di tonga-tonga ni halahi angka pamimpin na sanga manyaksihon sandiri sasude na nibaen ni TUHAN di halak Israel.

³²Saring-saring ni si Josep na nioban ni halak Israel sian Mesir, ditanom ma di Sikem, di tano na nitobusan ni si Jakob mararga saratus potong hepeng perak sian angka anak ni si Hemor, amang ni si Sikem. Jana dipateankon do tano i tu angka pomparan ni si Josep.

³³Dung i marujung muse ma ngolu ni si Eleasar anak ni si Harun jana dikuburkon di Gibea, i ma sada kota na di luat partoran Efraim. Madung dilehen kota i tu si Pinehas anak ni si Eleasar.