Read Batak Angkola JOSUA 3 Bible Online

JOSUA 3 - Batak Angkola bible

JOSUA 3

¹Ancogotna i, sogot sajo dope ngot ma si Josua dohot sude rayat ni Israel, ditadingkon halahi ma parbandaran ni halahi di Sitim, jana kehe ma halahi tu Batang aek Jordan. Disi ma halahi marbandar lalu painte-intehon hatihana laho manyiborang.

²Dung salpu tolu ari, kehe ma angka pamimpin tu sude parbandaran i

³jana didok halahi ma tu halak Israel, “Muda diida hamu angka malim mamorsan Poti Parjanjian ni TUHAN Debatamunu i, hamu pe antong markobas ma manadingkon ingananmunu be laho mangihutkon halahi.

⁴Halahi ma patuduhon dalan di hamu, dibaen nada unjung dope hamu tuson. Tapi ulang madonoktu hamu mardalan tu Poti Parjanjian i; ihutkon hamu ma sian pudi.”

⁵Didok si Josua ma tu halak Israel, “Paias hamu ma dirimunu, angke ancogot baenon ni TUHAN ma hahomangan di tonga-tongamunu.”

⁶Jadi diparentahon si Josua ma angka malim mangangkat Poti Parjanjian i lalu kehe ma halahi manjoloi rayat i. Dibaen halahi muse ma na niparentahon ni si Josua i.

⁷Didok TUHAN ma tu si Josua, “Mamungka sadari on baenonKu ma ho gabe halak na godang jabat sude halak Israel pasangap ho jana botoon ni halahi ma bahaso na Hudongani do ho songon pandonganingKu di si Musa.

⁸Antong, saonnari parentahon ma tu angka malim na mamorsan Poti Parjanjian i anso manigor masuk halahi tu bagasan aek i lalu jongjong di topina i disi lalu halahi tu batang aek i.”

⁹Dung i dipio si Josua ma angka halak Israel i jana didok ia ma, “Tole, tangihon hamu ma sanga aha na niparentahon ni TUHAN Debatamunu.

¹⁰Jadi muda mardalan hamu naron, pasti do paoroton ni TUHAN angka halak Kanaan, Het, Hewi, Peris, Girgasi, Amori dohot halak Jebus. Idaonmunu ma bahaso na di tonga-tongamunu do Debata na mangolu i,

¹¹di na taripar Poti Parjanjian ni TUHAN ni sandok portibi on manjoloi hamu.

¹²Antong todo hamu ma saonnari dua bolas halak — sada halak sian ganop marga ni Israel.

¹³Disi naron didegehon angka malim na mamorsan Poti Parjanjian ni TUHAN i patna tu bagasan aek di Batang aek Jordan i, magotap ma pardalan ni aek i, jana tartembok ma aek na ro sian julu di sada inganan.”

¹⁴Hatiha manyabi do hatiha i, jana somal do magodang Batang aek Jordan i. Di na kehe halak Israel i manadingkon parbandaran ni halahi laho manaripari Batang aek Jordan i, parjolo ma angka malim mardalan lalu maroban Poti Parjanjian i. Jana disi didegehon halahi pat ni halahi tu batang aek i,

¹⁶magotap ma manigor pardalan ni aek i. Dao di juluan marlagut ma aekna i di Adam, i ma sada kota donok tu kota Sartan. Aek na di jae na mardalan tu Laut Mate magotap ma i sude, lopus tarbaen halak Israel taripar di tano na mahiang tu inganan na di tongtang ni Jeriko.

¹⁷Anggo angka malim na mamorsan Poti Parjanjian i torus do jongjong di tonga-tonga ni batang aek i lopus taripar sude halahi tu bariba.