Read Batak Angkola JOSUA 8 Bible Online

JOSUA 8 - Batak Angkola bible

JOSUA 8

¹Didok TUHAN ma tu si Josua, “Kehe ma ho dohot sude tentarami tu Ai. Ulang gamang hamu jana ulang mabiar! Giot baenonKu do ho monang maralohon raja ni Ai, kotana dohot luatna i gabe ho nampunasa.

²Angkon songon na nibaenmu tu Jeriko dohot rajana i. Tapi anggo sanoli on tola do pambuatanmunu angka barang-barangna i dohot pahan-pahananna. Marhobas ma hamu mangaroro kota i tompu sian pudi.”

³Jadi marhobas ma si Josua laho kehe tu Ai rap dohot sude tentarania. Dipili ia ma tolu pulu ribu angka parporang na dumenggan jana disuru ia ma halahi borngin-borngin

⁴mardongan parenta songon on, “Martabuni ma hamu di adu ni kota i, tapi ulang madaotu; angkon tongtong do hamu hobas laho mangaroro.

⁵Donohanku ma kota i rap dohot donganku. Jadi muda haruar halak Ai laho mangalo hami, marbalik ma hami jana marlojong songon na tabaen na salpu i.

⁶Kojaron ni halahi ma hami lopus dao sian kota i. Diambang halahi ma na maporus hami songon na tabaen na salpu i.

⁷Dung i manigor, disi ma hamu haruar sian inganan partabunianmunu i, laho mambuat kota i. Lehenon ni TUHAN Debatamunu ma kota i tu hamu.

⁸Dung dapot, angkon surbuon do kota i songon na niparentahon ni TUHAN. I ma karejomunu.”

⁹Jadi disuru si Josua ma halahi, jana kehe ma halahi martabuni lalu paintehon disi di Hasundutan ni Ai, antara ni Ai dohot Betel. Jana si Josua marborngin di parbandaran.

¹⁰Sogot dope ngot ma si Josua jana diparentahon ia ma anso marlagut parangannia. Dung i kehe ma ia rap dohot angka pamimpin ni halak Israel i maroban parangan i tu Ai.

¹¹Mardalan ma parangan i rap dohot si Josua mandapotkon horbangan godang ni kota Ai lalu marbandar sabola Utara. Adong do disi sada rura na mangholang-holangi halahi dohot kota Ai.

¹²Hurang lobi lima ribu halak bahatna disuru ia martabuni di sabola Hasundutan ni kota i, antara ni Ai dohot Betel.

¹³Songon on ma dibaen pangatur ni parangan i: Markas na gumodang di sabola Utara ni kota i jana parangan na deba nari di sabola Hasundutan, tapi anggo si Josua marborngin di rura i do.

¹⁴Disi tarpaida raja ni Ai parangan ni si Josua i, diompoti ia ma mambaen sibaenonnia. Haruar ma ia dohot sude angka halaknia kehe tu napa ni Jordan laho mangaroro angka halak Israel di inganan na salpu i. Nada pamotoannia na giot hona ayak ma ia santongkin nari sian pudi.

¹⁵Dipaula-ula si Josua ma dohot parangannia i songon na so mangalo; marlojong ma halahi mandapotkon parhorsihan.

¹⁶Madung disuru haruar sude halaklahi na di kota Ai laho mangkojar si Josua dohot parangannia i. Jadi mur dikojar halahi si Josua, mur dao ma halahi dioban sian kotana.

¹⁷Ruar ma sandok jolma na di Ai laho mangkojar angka halak Israel gabe dipadiar kota i talak songon i umpe adong na manjagosa.

¹⁸Dung i didok TUHAN ma tu si Josua, “Angkat hujurmi jana ondamkon adop Ai; saonnari Hulehen ma kota i tu ho.” Dipatulus si Josua ma songon na niparentahon ni Tuhan i tusia.

¹⁹Di na niangkat ni si Josua tangannia, manigor ma diompoti parangan na martabuni i jongjong lalu kehe mangaroro kota i manaluhonsa. Jalop do disurbu halahi kota i.

²⁰Manaili ma angka halak Ai tu pudi, diida halahi ma timus na martimbual tu langit. Nada adong be dalan maporus di halahi, angke halak Israel na dikojar-kojar ni halahi hian, madung marbalik mangalo halahi.

²¹Dung diligi si Josua dohot donganna na dung dirampas parangan na martabuni i kota i, jana ditutung, marbalik ma halahi, dibunui ma halak Ai i.

²²Ro muse ma angka halak Israel na di kota Ai i marporang. Songon i ma hona hobuk angka halak Ai i dibaen halak Israel lalu hona bunu sudena. Umpe sada na luncat, sude do mate hona bunu.

²³Hum raja ni Ai sajo do na mangolu. Hona tangkup do raja i lalu dioban mangadop tu si Josua.

²⁴Dung sidung tentara ni Israel mamunu sude tentara ni musu na mangkojar halahi tu parhorsihan i, mangulahi ma halahi tu Ai, dibunu halahi muse ma sude halak na adong disi.

²⁵Laing di na sadari i do mate sude halak Ai — dua bolas ribu halak bahatna, halaklahi dohot dadaboru.

²⁶Anggo si Josua laing torus do diondamkon ia hujurnia i adop kota Ai, nada mijur-mijur dibaen ia hujurnia i lopus hona bunu sude angka halak Ai.

²⁷Pahan-pahanan dohot angka barang-barang na hona rampas di kota i, dipambuati halak Israel ma i gabe di halahi songon na nidok ni TUHAN tu si Josua.

²⁸Disurbu si Josua ma Ai, bulus dipadiar ia gabe lobu. Lopus saonnari laing tong do songon i parhutaan i.

²⁹Anggo raja ni Ai digantung ia di bona ni hayu, dipadiar ia disi lopus borngin. Jana dung lusut mataniari disuru si Josua ma halak mambuat bangke i lalu didanggurkon di dalan laho masuk tu horbangan ni kota i. Dung i ditimbuni ma inganan i dohot batu bahat sajo. Laing disi dope angka batu i lopus tu saonnari.

³⁰Dung i dipajongjong si Josua ma sada langgatan di Dolok Ebal baen di TUHAN, Debata ni Israel.

³¹Hombar tu na nipaboa ni si Musa naposo ni TUHAN tu halak Israel i do dibaen ia langgatan i. Angke tarsurat do di buku ni si Musa songon on, “Sada langgatan na nipajongjong dohot angka batu na so jungada dibola dohot parkokas na sian bosi.” Di ginjang ni langgatan i ma angka halak Israel manghaulkon tu TUHAN, haul situtungon jana songon i muse haul haluaan.

³²Disuratkon si Josua ma disi, disaksihon angka halak Israel, di angka batu ni langgatan i salinan ni angka uhum ni TUHAN na dapot di bagasan Buku Ni si Musa.

³³Marjongjongan ma paadop-adop angka halak Israel, diholang-holangi Poti Parjanjian ni TUHAN dohot angka pamimpin, angka panglima, angka hakim dohot angka halak sileban na maringanan di tonga-tonga ni halahi, mangadop be tu angka Malim Levi na mamorsan Poti Parjanjian i. Satonga ma sian halahi mangadop tu Dolok Gerisim jana satonga nari mangadop tu Dolok Ebal. Madung diparentahon si Musa naposo ni TUHAN i hian do anso baenon ni halahi songon i muda dung dapot hatihana jagiton ni halahi pasupasu na nijanjihon ni TUHAN.

³⁴Dung i disise si Josua ma gogo-gogo sude angka uhum dohot aturan pas songon na tarsurat di bagasan Buku Tona Ni TUHAN, dohot pasupasu dohot angka bura.

³⁵Pasada-sada sude parenta ni si Musa na tarsurat di bagasan Buku Tona Ni TUHAN i disise si Josua tu sandok halak na marlagut disi, dohot ma disi angka dadaboru, angka dakdanak, dohot angka halak sileban na tinggal di tonga-tonga ni halak Israel.