Read Batak Angkola JOSUA 9 Bible Online

JOSUA 9 - Batak Angkola bible

JOSUA 9

¹Lalu do angka barita salaho tu hamonangan ni Israel tu sude angka raja na di sabola Hasundutan ni Jordan — na di bagian pardolok, na di pat ni dolok dohot na di napa na hornop sapanjang topi ni Laut Tonga lopus tu parbalohan ni Libanon di Utara, i ma angka raja Het, angka raja Amori, Kanaan, Peris, Hewi dohot Jebus.

²Marpokat ma sude angka raja-raja on lalu mardomu laho mamorangi si Josua dohot halak Israel.

³Tapi anggo angka halak Gibeon na sian bangso Hewi, madung dibege halahi taringot tu na nibaen ni si Josua maradopkon Jeriko dohot Ai.

⁴Diputuskon halahi ma laho mamake tipu akal maradopkon si Josua. Kehe ma halahi mambuat sipanganon, jana dibobani halahi ma angka halode ni halahi dohot harung angka na dung buruk, dohot angka kantongan ni anggur na buruk-buruk na nibaen sian bobak.

⁵Dung i dipake halahi ma pakean na masibak-sibak dohot sipatu sandal na dung lolot na didungkap-dungkapan. Roti na nioban ni halahi pe baen balanjo, roti na mahiang do jana na lapuhon.

⁶Songon i ma halahi kehe tu parbandaran na di Gilgal jana didok halahi ma tu si Josua dohot tu angka halak Israel, “Sian luat sihadaoan do hami ro jana na giot mambaen parjanjian do hami dohot hamu.”

⁷Tapi didok halak Israel ma, “Aha ma gunana hami baen parjanjian dohot hamu? Aropku na maringanan di na donok-donok tuson do hamu!”

⁸Didok halahi ma, “Na rade do hami patuluskon sanga aha pe na nihagiotanmunu.” “Ise dehe hamu? Jana na sian luat dia do hamu?” ning si Josua manyapai halahi.

⁹Jadi dicaritohon halahi ma tu si Josua songon on, “Na sian luat na dao situtu do hami ro, tuan, dibaen madung hami bege taringot tu TUHAN Debata na nisombamunu tuannami. Madung hami bege taringot tu sude na nibaenNia di Mesir.

¹⁰Bope sanga aha na nibaenNia tu sidua halak raja ni halak Amori di Habincaran ni Jordan, si Sihon raja ni Hesbon dohot si Og raja ni Basan na maringanan di Astarot.

¹¹Na nisuruhon ni angka pamimpin dohot sude na maringanan di luatnami do hami paradehon bohal jana mardalanan laho mandapotkon hamu tuannami. Disuru do hami laho mangoloi hagiotmunu tuannami jana mangido tu hamu mambaen parjanjian dohot hami.

¹²Ligi hamu ma roti, bohalnami on! Milas dope roti on dompak na kehe hami sian bagas laho mandapotkon hamu tuannami. Hape saonnari, ligi hamu ma! Ma pola mahiang jana lapuhon.

¹³Jana angka kantongan ni anggur on pe na imbaru do dompak hami isi, hape saonnari, ligi hamu ma! Ma pola maribak-ribak. Pakeannami dohot sipatu sandalnami pe ma pola masego hara ni dao ni pardalanannami.”

¹⁴Jadi dijagit halak Israel ma antong sipanganon i sian angka halak Gibeon i, hape nada mangido sipaingot halahi sian TUHAN salaho tusi.

¹⁵Dibaen si Josua ma parjanjian tanda mardongan dohot halak Gibeon i jana marjanji na so bunuon ni halahi. Jadi marsumpa ma angka pamimpin ni rayat ni Israel laho patuluskon parjanjian i.

¹⁶Tolu ari dung dibaen parjanjian i, baru pe anso tarboto bahaso na so sadia dao do angka jolma i tinggal sian inganan ni halak Israel.

¹⁷Jadi kehe ma halak Israel tu luat ni halahi i, i ma kota Gibeon, Kefira, Beerot dohot Kiryat-Jearim.

¹⁸Hape nada tarbaen angka halak Israel be mamunu halahi, dibaen madung marsumpa angka pamimpin ni Israel tu halahi mangasahon goar ni TUHAN Debata ni Israel. Mungut-ungut ma sude halak Israel hara ni pangalaho on tu angka pamimpin ni halahi i.

¹⁹Tapi dialusi angka pamimpin i ma, “Bia baenon da! Ma sanga marsumpa hami tu halahi mangasahon goar ni TUHAN Debata ni Israel. Saonnari nada tola hita mambaen na jahat tu halahi.

²⁰Angkon padiaronta do halahi mangolu hara ni na dung tajanjihon; muda nada songon i, uhumon ni Debata noma hita.

²¹Jadi, ulang dibunu halahi, tapi dumenggan ma tabaen halahi gabe partaha soban dohot angka sialap aek di hita.” Songon i ma dianjurkon angka pamimpin i.

²²Dung i dipio ma angka halak Gibeon i anso mangadop tu si Josua. Didok si Josua ma, “Biasi dipaoto-oto hamu hami, jana didok hamu na marasal sian luat na dao hamu, hape na maringanan dison do hamu?

²³Hara ni na songon i pambaenanmunu, hona uhum ni Debata ma hamu. Tongtong noma bangsomunu gabe hatoban sitaha soban dohot sialap aek baen sipakeon di Bagas Ni Debatangku.”

²⁴Dialusi halahi ma, “Hami baen pe songon i tuannami, hara ni na dung hami bege do bahaso na dung disuru ni TUHAN Debatamunu do si Musa, naposoNia i, mangalehen tu hamu sude luat on dohot mamunu sude jolma na tinggal di angka inganan na nidapotkonmunu. Jadi gabe mabiar situtu hami tu hamu; mabiar hami hona bunu, i ma dalanna umbaen na hami baen sudena on.

²⁵Saonnari di bagasan kuasomunu noma hami. Dibaen tuan i ma sanga aha na denggan mangihutkon roha ni tuan i.”

²⁶Jadi gabe dibaen si Josua ma songonon: Diondihon ia ma halahi jana nada diloas ia halak Israel mamunu halahi.

²⁷Tapi tamba ni i, dibaen ia ma halahi gabe hatoban partaha soban dohot sialap aek baen di halak Israel dohot sipakeon di langgatan ni TUHAN. Lopus saonnari pe laing dikarejohon halahi do karejo i di inganan paribadatan na nitontuhon ni Tuhan.