Read Batak Angkola 2 TIMOTEUS 2 Bible Online

2 TIMOTEUS 2 - Batak Angkola bible

2 TIMOTEUS 2

¹Amang Timoteus! Sai margogo ma ho hara ni asi ni roha na nilehen di hita hara ni pardomuanta i dohot Kristus.

²Pangajaran na nibegemu sian au di jolo ni halak na bahat, pasahat ma i tu angka dongan sanga ise na tarhaposi roha jana na malo mangajari halak na asing.

³Angkon laing dohot do ho manaon parkancitan songon tentara na burju di Jesus Kristus.

⁴Muda sada tentara na topet mardinas nada tola baenonna urusanna sandiri, angke por do rohania laho pasonangkon roha ni komandanna i.

⁵Sada halak parolah raga nada tarbaen ia gabe juaro di bagasan partandingan anggo so diihutkon ia angka paraturan.

⁶Partani na marsitutu markarejo, i do na patut parjolo dapotan suha ni na nisuanna.

⁷Pikiri ma jolo sanga aha na hupajojor on, angke dilehen Tuhan do di ho gogo laho mangastui sasudena i.

⁸On ma ingot: Jamita Na Denggan na hujamitahon i, barita taringot tu Jesus Kristus do i, i ma pomparan ni si Daud; i ma Kristus na mulak mangolu i sian hamatean.

⁹Hara ni na manjamitahon Jamita Na Denggan i do umbaen na markancit au; lopus tarrante dope songon sada halak parjahat, tapi nada tarrante anggo hata ni Debata.

¹⁰Hara ni i do umbaen na huhasobarkon mananggung sudena i pasari-sari angka dongan na dung nipili ni Debata. Hutaon pe sudena i bia anso laing dohot halahi maruli haluaan na di bagasan Kristus Jesus, dohot hasangapan salolot-lolotna.

¹¹Na tutu situtu do pandohan on: “Muda dung mate hita rap dohot Ia, laing mangolu muse ma hita rap dohot Ia.

¹²Muda laing sobar hita, angkon laing mamarenta ma hita rap dohot Ia. Muda tatulak Ia, tulahonNia muse ma hita.

¹³Muda nada torus hita burju, laing tongtong do Ia burju, angke nada tarbaen Ia mamorso diriNia.”

¹⁴Paingotkon ma tu halak taringot tuson sudena. Di jolo ni Debata, paingot ma halahi anso ulang martangkangi hara ni angka pandohan. Nada adong guna ni i, gariada hum mambaen gaor pikiran ni halak na umbegesa do i.

¹⁵Haburjuhon ma na markarejo i anso dioku Debata ho gabe halak na tama markarejo di Debata. Parayak ma anso ulang jabat maila ho hara ni karejomu, tapi sintong ma ajarkon angka pangajaran na sian Debata.

¹⁶Padao ma ho sian angka kecet rarat na so marguna jana na so ias. Hum mambaen jahat do angka pangkataion sisongon i.

¹⁷Songon sahit kanker do angka pangajaran na songon i, mur honok mur mangararati. Masuk ma disi si Himeneus dohot si Piletus.

¹⁸Madung manyimbil halahi sian pangajaran na sintong, jana gabe disego-sego halahi do haporsayaan ni deba halak. Pandok ni halahi anggo hangongot ni angka na mate i ma pola salpu i.

¹⁹Hape anggo ojahan na nibaen ni Debata, ojahan na togu situtu do i jana na so tarhutur. Di ginjangna i tarsurat do, “Ditanda Tuhan do angka nampunaNia,” bope “Sanga ise na mandok nampuna ni Tuhan ia, angkon mantak ma halakna i mambaen dosa”.

²⁰Anggo di bagasan bagas godang adong do marragam panjamaan nada hum panjamaan na sian perak sanga sere na adong, tapi laing adong do na sian hayu dohot tano. Adong na nipake tu angka pangalaho na sangap, jana adong muse na nipake tu pangalaho na bile.

²¹Sanga ise halak na paias dirina sian sude na jahat, i ma na nipake songon parkokas tu pangalaho na marsangap. Gabe nampuna hapunjungan jana na hasaya ma ia di tuanna. Na diparade hian do halak na songon i sipakeon tu angka ragam ni karejo na denggan.

²²Orom ma dirimu taringot tu angka hasonangan ni na poso-poso. Haburjuhon ma mangoloi hagiot ni Debata, manghaporsayai Ia jana marholong ni roha dohot hadameon ni roha. Saroha ma ho na mangolu i rap dohot angka dongan na mangido tolong sian Tuhan mardongan roha na ias.

²³Ulang ma dohoti angka partongkaran ni angka halak na oto na so umboto sanga aha. Angke diboto ho do i hum na parohon partangkangan do i.

²⁴Anggo naposo ni Tuhan nada tola martongkari; angkon rama do tu halak sudena, jana tarajarisa halak na asing denggan jana sobar.

²⁵Angkon ajaranna halak na sai mangalo mardongan halambohon; ibo nian roha ni Tuhan, sai dilehen ma di halak na songon i hatiha na denggan paubahon rohana sian angka dosa ni halahi dohot mananda pangajaran na tutu.

²⁶Jadi anso gabe torang roha ni halahi mangulahi jana talgang sian sambil ni Sibolis na manjorat halahi jana na mamaksa halahi mangihutkon hagiotna.