Read Batak Angkola 2 TIMOTEUS 4 Bible Online

2 TIMOTEUS 4 - Batak Angkola bible

2 TIMOTEUS 4

¹Ro dope Kristus Jesus tu tano on manguhumi angka jolma na mangolu dohot na mate; jana ro ma Ia mamarenta songon Raja. Jadi hara ni i gomos ma pangidoanku tu ho, di jolo ni Debata dohot Kristus Jesus:

²Jamitahon ma Jamita na sian Debata i di hatiha na denggan sanga na so denggan. Papos ma roha ni halak, paboa angka na sala, jana sosoi ma halahi. Ajari ma halak mardongan sude hasobaronmu.

³Angke angkon ro do hatihana na so ra be halak manjagit pangajaran na sintong. Gumonan noma hagiot ni halahi sandiri ihutkonon ni halahi, jana gabe palaguton ni halahi ma angka guru laho mangajarkon angka pangalaho na tabo begeon ni pinggol ni halahi.

⁴Dipahusor halahi do pinggol ni halahi sian na sintong, tapi patinggilon ni halahi do i tu angka turiturian na so tutu.

⁵Tapi haru songon i pe, ulang pola jabat dut rohamu marnida sanga aha pe na masa. Sobar ma ho di parkancitan, karejohon ma karejomu, songon parjamita ni Jamita Na Denggan i jana dalankon ma na nipaporsankon tu ho sadenggan-dengganna.

⁶Anggo taringot tu au, madung dapot hatihana mate au songon haul tu Debata. Santongkin nari tadingkononku ma portibi on.

⁷Anggo au madung hudohoti parlumbaan i sadenggan-dengganna, jana madung lalu tu ujung, jana madung humomosi do haporsayaan i.

⁸Jana saonnari upa ni hamonangan i noma sipainteonku. Di Ari Parpudi, pasahaton ni Tuhan Panguhum na tigor i ma upa i tu au, angke di bagasan pardomuan na denggan do au mangolu dohot Debata. Jana nada hum au sajo na giot manjagit upa i, tapi dohot do sudena halak na sai malungun paintehon haroro ni Tuhan i.

⁹Usahohon ma jolo anso tumibu tarbaen ho manopot au,

¹⁰harana madung ditinggalkon si Demas au hara ni holong ni rohania tu portibi on. Madung kehe ia tu Tessalonika. Si Kreskes pe madung kehe tu Galatia jana si Titus tu Dalmatia.

¹¹Hum si Lukas noma na rap dohot au. Alap ma si Markus jana oban ma ia tuson, angke tangkas do tarurupi ia au di bagasan parkarejoanku.

¹²Madung husuru si Tikikus kehe tu Epesus.

¹³Jadi muda ro ho, boan muse ma jolo mantel na hutadingkon i di Troas di bagas ni si Karpus. Laing boan ma angka buku i, lumobi angka buku na sian kulit i.

¹⁴Si Aleksander tukang tumbaga i, madung bahat dibaen ia na jahat tu au. Baloskonon ni Tuhan ma tusia hombar tu pangalahonia i.

¹⁵Ho pe angkon manat do ho tu bayo i, angke manggogo situtu do ia mangalo jamitanta.

¹⁶Di na parjolo hupajojor pambelaanku umpe sahalak na ro mandongani au; kehe do sude manadingkon au. Sai ulang ma nian dipasala Debata halahi taringot tusi!

¹⁷Tapi madung didongani Tuhan au disi. Dipargogoi Ia do au, gabe margogo au manjamitahon Jamita i sudena anso laing dibege sudena angka halak na so Jahudi. Jana malua do au sian baba ni singa.

¹⁸Sai paluaon ni Tuhan Jesus do au tongtong sian sude usaho na jat maradopkon au. BoanonNia do au lopus tu bagasan HarajaanNia di banua ginjang. Sipasangapon do Ia salolot-lolotna! Amen.

¹⁹Tabengku tu si Priskila dohot si Akuila dohot tu dongan sabagas ni si Onesiporus.

²⁰Tading do si Erastus di Korintus jana si Tropinus hutadingkon do marnyae-nyae di Miletus.

²¹Usahohon ma anso ro ho dompak so musim ngali nian. Si Ebulus, si Pudes, si Linus dohot si Klaudia palalu tabe do tu ho; songon i muse dohot angka dongan sahaporsayaan na asing i.

²²Sai didongani Tuhan i ma tondimu. Sai didongani asi ni roha ni Debata ma hamu!