Read Batak Angkola PILEMON 1 Bible Online

PILEMON 1 - Batak Angkola bible

PILEMON 1

¹Sian si Paulus, sada halak na tarhurung hara ni Kristus Jesus, dohot sian si Timoteus donganta, tu si Pilemon na nihaholongan, dongan saparkarejoannami.

²Songon i muse ma tu si Appia ibotonta dohot tu si Arkhipus dongan saparjuanganta dohot tu parlagutan na di bagasmu.

³Asi ni roha dohot hasonangan ma di hamu sian Debata, Amanta, dohot sian Tuhan Jesus Kristus!

⁴Ganop martangiang au sai hudok do goarmu jana hupasahat tarimakasi tu Debata.

⁵Harana madung hubege dihaholongi ho do sude halak na porsaya jana dihaporsayai ho do Tuhan Jesus.

⁶Hutangiangkon do anso nian parkahamaranggionta songon angka halak na porsaya mur pamalohon hita mangastui sude angka pasupasu na tajagit hara ni na domu hita dohot Kristus.

⁷Hara ni holong ni rohami Pilemon, gabe tamba do jop ni rohangku jana mur maringgas! Gabe tarapul do sude roha ni angka dongan sahaporsayaan hara ni ho.

⁸Hara ni i, songon kahanggimu di bagasan Kristus tarsuru au do nian ho laho mangkarejohon aha na patut sipatupaonmu.

⁹Tapi hara ni holong ni roha, gumonan noma mangido au tu ho. Au, si Paulus na dung matobang,[1] jana na dihurung saonnari hara ni Kristus Jesus,

¹⁰pajojorkon pangidoan tu ho taringot tu anakku na hudapot hatiha di hurungan au, i ma si Onesimus.

¹¹Najolo nada adong gunania be di ho, tapi anggo saonnari madung marguna situtu, nada hum di ho sajo, tapi dohot do di au.

¹²Tampuk ni pusupusungkon, hutongos mangulahi saonnari tu ho.

¹³Satutuna nian sai giot tioponku do ia dison gabe songon gontimu anso tarbaen ia mangurupi au salolot ditahan au di hurungan on hara ni Jamita Na Denggan i na sian Debata.

¹⁴Tapi nada tarbaen au sanga na aha, anggo so jolo adong isin sian ho. Dumenggan do ninna rohangku muda sian ias ni rohamu sandiri mambaen songon i; nada ra au mamaksa ho.

¹⁵Betak na on do dalanna marsirang si Onesimus santongkin sian ho, anso dapot ho do ia mangulahi salolot-lolotna.

¹⁶Saonnari nada hum hatobanmu be ia; lobi sian i noma. Dongan haholongan noma ia hara ni Kristus. Marguna situtu do ia di au: Lumobi di ho, tontu marguna situtu do ia sanga pe songon jolma sanga pe songon kahanggi di bagasan Tuhan.

¹⁷Jadi, hara ni na nietongmu au songon dongan Kristen, antong jagit ma si Onesimus mangulahi dos songon na manjagit au.

¹⁸Muda na adong salania sanga utangnia tu ho, padiar ma au mananggung i sudena.

¹⁹Au sandiri na manyuratkon dison tu ho: “Au ma si Paulus manggararsa tu ho.” (Tontu nada pola porlu sunggulanku tu ho, paboa na marutang muse do ho tu au, i ma dirimu sandiri.)

²⁰Jadi hara ni i laing urupi ma jolo au hara ni Tuhan i; pajop ma jolo rohangku songon kahanggimu hara ni Kristus.

²¹Pos do rohangku na mambaen surat on, patulusonmu do sanga aha na hupangido on tu ho. Jana huboto lobi sian i dope patupaonmu.

²²Jadi laing pasingkop muse ma jolo ingananku di bagasmu, angke arop do rohangku tangihonon ni Debata do tangiang ni hamu sudena jana obanonNia au mangulahi tu tonga-tongamunu.

²³Palalu tabe do tu ho si Epafras na tarhurung rap dohot au hara ni Jesus Kristus.

²⁴Laing jagit ma tabe ni angka donganku: Si Markus, si Aristarkus, si Demas dohot si Lukas.

²⁵Sai dipasupasu Tuhan Jesus Kristus ma nian hamu sudena.