Read Batak Angkola IBRANI 10 Bible Online

IBRANI 10 - Batak Angkola bible

IBRANI 10

¹Dibaen hum halinu ni angka haluaan na giot ro i do na di bagasan Tona i, nada anggo haluaan i sandiri. Hara ni i nada tarbaen Tona i markite-hite angka haul na tongtong dihaulkon ganop taon padenggankon singkop angka na ro tu Debata.

²Sugari na dung tutu situtu ias sian dosa angka halak na marsomba i tu Debata, nada adong be di halahi pangkilalaan na mardosa jana mantak noma halak manghaulkon haul.

³Hape anggo satutuna, haul na nihaulkon i ganop taon, na pasingotkon jolma i do taringot tu angka dosa ni halahi,

⁴harana anggo mudar ni lombu dohot mudar ni hambeng i sandiri nada tarbaen i manyesa dosa.

⁵Hara ni i do di na ro Kristus tu tano on didok Ia tu Debata, “Nada pola dihagioti rohaMu haul dohot haul silehen-lehen; tapi madung diparade Ho sada pamatang di Au.

⁶Nada dihalomohon rohaMu haul sian pahan-pahanan na nitutung gabe haul sanga angka haul na nisombahon laho manyesa dosa.

⁷Dung i Hudok ma, ‘Dison do Au, o Debata! Ro do Au laho patuluskon hagiotMu songon na tarsurat i di Buku Na Badia taringot tu Au sandiri.’ ”

⁸Mula-mula didok Kristus, “Nada pola dihagioti Ho haul dohot haul silehen-lehen; nada dihalomohon rohaMu haul sian pahan-pahanan na nitutung gabe haul dohot haul na nisombahon panyesa ni dosa.” Didok Kristus do songon i haru pe sasude angka haul i nisombahon mangihutkon Tona ni ugamo Jahudi.

⁹Dung i didok Kristus dope, “Dison do Au, o Debata! Ro do Au laho patuluskon hagiotMu.” Jadi hara ni i, disoadahon Debata ma angka haul na honok i jana digonti Ia ma i dohot Kristus gabe haul na imbaru.

¹⁰Madung dipatulus Jesus Kristus sanga aha na nidok ni Debata baenonNia. Hara ni i ma umbaen na nipaias hita sudena sian dosa markite-hite haul i, i ma Jesus sandiri — na nihaulkon sanoli sajo ro di salolot-lolotna.

¹¹Sasude Malim Ni Jahudi angkon mandalankon karejo hamalimon ganop ari, jana marpupu ia manghaulkon angka haul na sarupa. Hape dosa aha pe nada adong tarsesa angka haul i.

¹²Tapi anggo Ia, dung dihaulkon Ia haul na sada i, hara ni dosa, juguk ma Ia salolot-lolotna di siamun ni Debata.

¹³Jadi saonnari, hum na paintehon sajo do Ia, lopus nipayakkon musuNia sudena gabe sidegean ni patNia.

¹⁴Jadi sian haul na sada i, gabe sanggam ma dibaen Kristus sudena halak na nipaias sian dosana salolot-lolotna.

¹⁵Taringot tusi pe dohot do Tondi Parbadia mandok tu hita,

¹⁶“ ‘On ma janji na giot baenonKu dohot halahi tu ari na giot ro,’ ninna Tuhan i, ‘SuratkononKu ma angka TonangKu tu bagasan roha ni halahi, jana suankononKu ma i tu pikiran ni halahi.’

¹⁷‘HalupahononKu ma angka dosa dohot hajahatan ni halahi.’ ”

¹⁸Jadi madung disesa angka dosa i dohot hajahatan i, gabe nada pola be haulkonon haul laho manyesa dosa.

¹⁹Antong saonnari hamu angka dongan, hara ni mudar ni Jesus i, madung bisa hita masuk tu Bilik Na Sun Badia i.

²⁰Madung dibuka Ia dalan na imbaru, jana na mangolu do hita markite-hite tire i, i ma pamatang ni Jesus sandiri.

²¹Jana adong do di hita sada Malim Godang di Bagas Ni Debata.

²²Antong hara ni i, tapadonok ma tu Debata mardongan roha na bulus dohot haporsayaan na tutu tu Debata; bope dohot roha na dung dipaias sian pangkilalaan na sala, bope dohot pamatang na dung nipaias dohot aek na lan.

²³Togu ma hita marsitiopan tu arop ni rohanta na dung taoku i angke haposan do Debata, patulusonNia do janjiNia.

²⁴Jana marsipamanatan ma hita sama hita anso tarbaen hita marsiparinggasan patupahon angka na denggan dohot patuduhon holong marsihaholongan.

²⁵Ulang ma tatinggalkon parlagutanta i, songon na nibaen ni na deba. Angkon mur umburju ma nian hita marsipaingotan sama hita, angke taboto do, ro ne ma Tuhan i.

²⁶Harana anggo dung dipasahat do tu hita jamita na sian Debata, hape laing tapupu do tasangajo mambaen dosa, gabe nada adong sada haul pe na tarbaen manyesa dosanta.

²⁷Hum na manjagit pangadilan ni Debata sajo noma hita dohot manjagit hagugurgur ni muruk ni Debata na mangabiskon sanga ise halak na mangalo Debata!

²⁸Sanga ise na so burju mangoloi angka Tona Ni Debata na nipasahat ni si Musa, nimatehon sajo do i nada adong ampunan, muda tardapot ia marsala disaksihon dua sanga tolu halak.

²⁹Haru tu halak na songon i, i ma borat ni uhumanna, mur bia muse dope ulaning borat ni uhuman tu angka jolma na songon on: Na mangalayasi Anak Ni Debata, halak na marnayang ni roha mida hamamate ni Kristus na songon jaminan ni janji ni Debata na mangkaholongi Ia. Hilala hamu ma sanga bia dokdok ni uhuman tu angka jolma sisongon i!

³⁰Angke taboto do sanga ise na mandok songon on, “Au do nampuna pamaloson, Au do na giot mambaen pamaloson!” Jana na mandok muse, “Uhuman ni Tuhan ma bangsoNa.”

³¹Na jorbut situtu do muda madabu hita tu tangan ni Debata Na Mangolu i!

³²Ingot hamu ma sanga na bia pangalahomunu di hatiha na salpu. Anggo di hatiha i, dung ditorangi sinondang ni Debata hamu, bahat do parhancitan ditaon hamu; haru songon i pe laing marsitutu do hamu marjuang.

³³Huhul hona incak do hamu jana gabe sitontonan di jolo ni halak na bahat. Huhul laing dohot do hamu manaon dohot halahi na manaon songon i,

³⁴jana dohot do hamu mangkilalahon pardangolan ni angka halak na tarhurung. Jana di na hona rampas sude sinadonganmunu, jop do rohamunu manjagit sasudena i, angke diboto hamu do, laing adong dope di hamu na dao dumenggan na tahan salolot-lolotna.

³⁵Jadi hara ni i, ulang mandele hamu, angke muda togu do haporsayaanmunu, adong do upa na godang disi!

³⁶Porlu do sobar hamu, jana muda dung dipatulus hamu hagiot ni Debata, jagitonmunu ma janji i.

³⁷Angke tarsurat do, “Santongkin nari sajo noma, ro ne ma Ia na giot ro i hian; nada palambat-lambatonNia haroroNia.

³⁸Jana halakKu na tigor roha i, mangolu do hara ni haporsayaanna, tapi muda adong sian halahi na sumurut, nada jop be rohangKu mida i.”

³⁹Anggo hita nada halak na sumurut sanga na lilu hita. Tapi halak na porsaya do hita jana na dung nipalua.