Read Batak Angkola IBRANI 12 Bible Online

IBRANI 12 - Batak Angkola bible

IBRANI 12

¹Jadi anggo taringot tu hita, bahat sajo do humaliang hita angka saksi! Hara ni i, sasudena na padokdok hita bope dosa na sai lohot tu hita, tatalgangi ma sudena sian hita. Jana marsitutu ma hita manyalpui parlumbaan na di jolonta.

²Tu Jesus ma tatatap, na manogu-nogu hita di bagasan haporsayaan, jana na maroban haporsayaanta i tu hasanggaman. Ditaonkon Ia do mate di hayu parsilang gonti ni jop ni roha na dung diparade diSia, jana juguk do Ia nuaeng di siamun ni habangsa ni Debata.

³Ingot hamu ma Ia na manaon sai bahat hata partangkangon sian angka pardosa, anso ulang gale hamu, jana ulang mandele rohamunu.

⁴Angke di paraloanmunu mangalo dosa i, nada jabat dope lopus tiris mudarmunu.

⁵Jana madung lupa hamu di sipaingot na mandok tu hamu songon tu dakdanak, “Ale dakdanakku, ulang menek rohamu mida pangajaran ni Tuhan i; jana ulang mandele muda dipaingot Ia ho.

⁶Angke diajari Tuhan i do sanga ise halak na nihaholonganNia, jana diloncing Ia do ganop na niokuNia dakdanakNia.”

⁷Angkon songon pangajaran ni sada ama tu dakdanakna do panjagitmunu muda ro loncing-loncing ni Debata. Adong ma he lakna dakdanak na so jungada diajar amangna?

⁸Anggo na so dohot do hamu diajar songon pangajarina di sude dakdanaknia, anak gampang do hamu muda songon i, nada anakna kandung.

⁹Di tano on, adong do amanta. Diajari amanta be do hita, jana tapasangap do amanta. Antong mur ma hape maradopkon Amanta na di banua ginjang i, tontu angkon mur umoloan ma hita tuSia anso mangolu hita.

¹⁰Marhatiha do pangajaran ni natorasta na di tano on tu hita, hombar tu na denggan na niboto ni halahi. Tapi anggo Debata, diajari do hita laho padenggankon hita, anso gabe badia hita rap dohot Ia.

¹¹Tutu nian dompak hona ajar hita, nada sonang rohanta manjagit pangajaran i, hum na pahancit roha sajo do i nihilala. Hape dung salpu i, dilehen do di halahi parbatu ni hatigoran, na mangalehen hasonangan.

¹²Hara ni i, pargogoi hamu ma tanganmunu na gale dohot patmunu na humitir-hitir i mardalan!

¹³Di dalan na hornop ma hamu mardalan, anso ulang tarbalingsu patmunu, tapi mur tu malumna ma.

¹⁴Usahahon hamu ma anso mardame-dame hamu tu sude halak jana manggogo ma hamu anso hum di Tuhan ngolumunu, harana sahalak pe nada adong na tarbaen mida Tuhan anggo inda songon i pardalan ni ngoluna.

¹⁵Jagohon hamu ma anso ulang adong sanga ise na morot sian asi ni roha ni Debata; anso ulang adong na gabe duri dohot sihupi di tonga-tongamunu na parohon hasusaan jana na mambaen sego halak na bahat.

¹⁶Jagohon hamu ma anso ulang adong na gabe siparkamainan sanga na so mangargahon angka pangalaho na badia songon na nibaen ni si Esau. Digadis ia haknia songon anak siangkaan, hum hara ni samangkuk sipanganon.

¹⁷Diboto hamu do, por do rohania, hape ditulak do ia, angke nada adong be hatiha disia giot paubahon roha,[4] haru pe marilu-ilu matana manjalahi.

¹⁸Nada pola diadopi hamu songon na masa tu halak Israel najolo. Anggo halahi diadopi halahi do na bolas nijama, i ma Dolok Sinai dohot api na marnyala-nyala i; diadopi halahi do hagolapan, haholomon bope halingsungsung;

¹⁹saringar ni sarune dohot sora na lobi gogo. Di na nibege ni halak Israel sora i, gogo do pangidoan ni halahi anso ulang be nian mangkuling sora i tu halahi.

²⁰Angke nada tahan halahi pabege-bege parenta na nipalalu ni sora i. Angke didok sora i do, “Sasudena na mandonohi dolok on, nada marimbar sanga na binatang sanga na ise pe tehe, angkon dangguran do dohot batu lopus mate.”

²¹Sanga aha na niida ni halak Israel i, i noma sogenna jabat didok si Musa, “Mabiar do au jana humitir!”

²²Tapi anggo hamu, Dolok Sion noma na niadopanmunu bope Kota Ni Debata na mangolu, i ma Jerusalem na di banua ginjang dohot surusuruanNa na marribu-ribu.

²³Sada parsuoan godang do na niadopanmunu — parsuoan ni angka anak siangkaan ni Debata na dung disuratkon goarna di banua ginjang. Debata do na niadopanmunu, Panguhum ni sude jolma manusia. Adopanmunu do angka tondi ni halak na burju na dung dipasanggam.

²⁴Diadopi hamu do Jesus pandomui na mambaen janji na imbaru i; diadopi hamu do mudar pamispison na gabe jaminan ni angka na dao dumenggan sian na nijamin ni mudar ni si Abel.

²⁵Antong, jago ma hamu anso ulang jabat layas rohamunu tuSia na mandok hata i. Salangkan halahi na so manangihon na palalu hata ni Debata di portibi on nada tarbaen marlojong, mur ma hita on na umbege hata na nidokNia sian banua ginjang. Muda nada ra hita manangihonsa, bia dope pambaenna malua hita sian Ia!

²⁶Mangaronggur do ditano on soraNia hatiha i. Tapi saonnari madung marjanji Ia, “Mangaronggur dope baenonKu sanoli nari, nada hum tano on, tapi dohot do langit.”

²⁷Pandohan “sanoli nari” patuduhon bahaso pasidingon do sasudena na dung nitompa i jana na ra humutur i, anso tinggal ma hum na so ra humutur i.

²⁸Hara ni na dung tajagit harajaan na so tarhutur i, beta ma tadok tarimakasi jana mangoloi tu Debata mangihutkon angka tona na tama tuSia, mardongan sangap dohot biar.

²⁹Angke songon api na mangabiskon do tutu anggo Debatanta i.