Read Batak Angkola 1 JOHANNES 4 Bible Online

1 JOHANNES 4 - Batak Angkola bible

1 JOHANNES 4

¹Angka dongan na nihaholongan! Ulang ma hamu porsaya tu ganop tondi, tapi uji hamu ma angka tondi i sanga na marharoroan sian Debata do i, harana madung bahat angka panurirang pargabus ro tu portibi on.

²Songon on ma baen hamu laho mananda sanga Tondi Parbadia do tondi i sanga nada: Sanga ise na mangoku Jesus Kristus ro tu portibi on gabe jolma, na sian Debata ma Tondi na adong di halahi.

³Tapi sanga ise na so mangoku songon i taringot tu Jesus, nada adong di halahi Tondi Parbadia. Sian musu ni Kristus do tondi na adong di halahi. Taringot tu tondi i pe madung dipaboa hian i tu hamu na giot ro hian do i. Madung di portibi on ia saonnari.

⁴Tapi ale dakdanakku, anggo hamu dakdanak ni Debata do. Madung ditaluhon hamu angka panurirang pargabus i, angke gumogoan dope Tondi na adong di hamu sian tondi na adong di angka jolma na ro sian portibi on.

⁵Taringot tu angka pangalaho na di portibi on do na nihataan ni angka panurirang pargabus i, jana ditangihon portibi on do halahi, angke sian portibi on do haroroan ni halahi.

⁶Sian Debata do haroronami; barang ise mananda Debata, tangihononna do hami. Barang ise na so sian Debata, nada tangihononna hami. Sian i do tatanda Tondi hasintongan dohot tondi na paliluhon.

⁷Hamu angka dongan na nihaholongan! Marsihaholongan ma hita sama hita, angke sian Debata do ro holong ni roha i. Sanga ise na marholong ni roha, i do dakdanak ni Debata jana na mananda Debata.

⁸Sanga ise na so marholong ni roha, nada ditanda i Debata; angke holong ni roha do Debata i.

⁹Dipataridahon Debata do holong ni rohaNia tu hita di na nisurunia AnakNia na sasada i tu portibi on anso tarbaen hita mangolu markite-hite AnakNia.

¹⁰On do holong ni roha i: Nada hita parjolo mangkaholongi Debata tapi Debata do na mangkaholongi hita jana na marsuru AnakNia tu portibi on anso dapotan pardengganan hita taringot tu angka dosanta.

¹¹Hamu angka dongan na nihaholongan, muda songon i ma pangkaholongi ni Debata tu hita, hita pe angkon marsihaholongan ma sama hita.

¹²Sahalak pe nada adong na jungada mida Debata, tapi maringanan do Debata di bagasan hita jana gabe sanggam do holong ni rohaNia di bagasan hita muda marsihaholongan hita sama hita.

¹³Dibaen madung dilehen Debata TondiNia tu hita, gabe taboto ma na di bagasan ni Debata do hita, jana Ia di bagasan hita.

¹⁴Madung hami ida sandiri Anak Ni Debata, jana saonnari hami saksihon, na dung disuru Ama i do Ia ro tu portibi on anso gabe Sipalua di portibi on.

¹⁵Sanga ise na mangoku Anak Ni Debata do Jesus, marsada ma Debata tu halakna i jana na maringanan do Debata di bagasan ia, jana ia di bagasan Debata.

¹⁶Taboto jana tahaporsayai do holong ni roha ni Debata maradopkon hita. Holong ni roha do Debata. Sanga ise na sai torus mangkaholongi halak na asing, na maringanan do ia di bagasan Debata jana Debata di bagasan ia.

¹⁷Sanggam do holong ni roha i dipatupa di bagasan dirinta anso marpos ni roha hita di Ari Paruhuman i, harana tudos songon Ia, hita pe di portibi on do.

¹⁸Nada adong biar ni roha di bagasan holong; holong na sanggam mangagohon sude biar; angke adong do uhuman di bagasan biar i. Jadi barang ise na mabiar; nada dope sanggam ia di bagasan holong.

¹⁹Marholong ni roha pe hita, hara ni na dung parjolo do Debata mangkaholongi hita.

²⁰Muda adong na mandok, “Huhaholongi do Debata,” hape hosom rohania mida dongannia, pargabus do halak na songon i. Angke sanga ise na so mangkaholongi dongan na bolas idaonnia, nada tarbaen ia be mangkaholongi Debata na so jungada diida ia.

²¹Antong, on ma tona na nilehen ni Kristus tu hita: Sanga ise na mangkaholongi Debata angkon laing dihaholongi ia muse ma dohot donganna.