Read Batak Angkola 1 JOHANNES 5 Bible Online

1 JOHANNES 5 - Batak Angkola bible

1 JOHANNES 5

¹Barang ise na porsaya bahaso Jesus do Kristus i, i do na sorang sian Debata, bope barang ise na mangkaholongi Ia na manyorangkon, dihaholongi ia muse do na sorang sian Ia.

²On ma tandana na holong rohanta mida angka dakdanak ni Debata: Muda tahaholongi Debata jana burju hita mangoloi angka tonaNia.

³Angke muda nidok mangkaholongi Debata, na mangoloi angka tonaNia do astuan ni i. Jana nada pola borat di hita angka tonaNia i,

⁴angke sanga ise na sorang sian Debata tartaluhonsa do portibi na jahat on. Jana haporsayaanta i do hamonangan na manaluhon portibi on.

⁵Ise ma he na tarbaen manaluhon hajahatan ni portibi on? Hum halak na mangkaporsayai bahaso na tutu do Jesus Anak Ni Debata.

⁶Ia do naro i markite-hite aek dohot mudar, i ma Jesus Kristus, nada hum markite aek sajo, tapi markite-hite aek dohot mudar. Jana Tondi do na mangalehen hasaksian, angke Tondi i do hasintongan.

⁷Jadi adong do tolu saksina:[4]

⁸Tondi Parbadia, aek dohot mudar. Sarupa do hasaksian ni na tolu i.

⁹Tahaporsayai do hasaksian ni jolma, tapi gumogo dope hasaksian ni Debata. Jana on ma hasaksian na dung dilehen Debata taringot tu AnakNia i.

¹⁰Hara ni i, sanga ise halak na porsaya tu Anak Ni Debata, madung dijagit Ia hasaksian on di bagasan dirinia; tapi anggo halak na so porsaya tu Debata, madung dibaen Ia Debata gabe songon pargabus, angke nada porsaya ia tu na nipatangkas ni Debata taringot tu AnakNia i.

¹¹On do hasaksian i: Madung dilehen Debata di hita ngolu na manongtong; jana AnakNia i do mual haroroan ni ngolu na manongtong i.

¹²Sanga ise na maruli di Anak i, i do na maruli di ngolu na manongtong i; jana halak na so maruli di Anak Ni Debata i, nada maruli di ngolu i.

¹³Hubaen pe surat on tu hamu angka na mangkaporsayai Anak Ni Debata anso diboto hamunu do na dung maruli ngolu na manongtong i hamu.

¹⁴Jana puluk ma hita ro tu Debata, angke tangihononNia do sudena pangidoan na tapajojor tuSia mangihutkon hagiot ni rohaNia.

¹⁵Antong, dibaen taboto do na nitangihonNia hita muda mangido hita tuSia, gabe taboto muse ma na lehenonNia do sanga aha na tapangido tuSia.

¹⁶Muda adong diida hamu dongan Kristen mambaen dosa na so pola mambaen hamatean, sitangiangkononmunu do i tu Debata; jana lehenon ni Debata ma ngolu di halak na songon i, i ma tu halak na mambaen dosa na so pola mambaen hamatean i. Tapi adong do dosa na mambaen hamatean, jana nada hudok anso tangiangkononmunu dosa na songon i tu Debata.

¹⁷Sude pambaenan na sala, dosa do i, tapi adong do dosa na so pola mambaen hamatean.

¹⁸Taboto do anggo halak na dung gabe dakdanak ni Debata, nada pola sai marpupu halahi mambaen dosa, angke dijagohon Anak Ni Debata do ia jana nada tarkahua si Parjahat i ia.

¹⁹Taboto do na sian Debata haroroanta, jana sude na satano on di bagasan tangan ni si Parjahat i.

²⁰Taboto do na dung ro Anak Ni Debata tu portibi on. Madung dilehen Ia tu hita pangastuion, anso tatanda Debata na sintong i; jana na maringanan do hita di bagasan Na Sintong i, i ma di bagasan AnakNia Jesus Kristus. On do Debata na sintong, jana on do ngolu na manongtong.

²¹Hamu angka dakdanakku, padao hamu ma dirimunu sian angka gana-ganaan!