Read Batak Angkola HAKIM-HAKIM 10 Bible Online

HAKIM-HAKIM 10 - Batak Angkola bible

HAKIM-HAKIM 10

¹Dung marujung ngolu ni si Abimelek, gabe pamimpin ma si Tola anak ni si Pua laho paluahon halak Israel. Pahompu ni si Dodo do i na sian Marga Isakar. Maringanan di Samir na di partoran Efraim do ia.

²Dua pulu tolu taon honokna ia mamimpin Israel, dung i marujung ma ngolunia jana dikuburkon di Samir.

³Dung si Tola, dipimpin si Jair ma Israel dua pulu dua taon lolotna. Sian Gilead do asal ni si Jair.

⁴Anaknia halaklahi adong do tolu pulu halak. Adong do tolu pulu halode tunggang ni halahi dohot tolu pulu huta di Luat Gilead. Digoari dope angka huta i, huta-huta ni si Jair.

⁵Marujung mangolu ni si Jair muse, jana dikubur di Kamon.

⁶Mangulahi ma muse mardosa halak Israel tu TUHAN. Nada diantureskon halahi Tuhan jana mantak halahi marsomba tu TUHAN. Marsomba halahi tu angka Debata Baal dohot Astoret dohot tu angka debata ni bangso Siria, Sidon, Moab, Amon dohot Pilistin.

⁷Muruk ma TUHAN hara ni i tu halak Israel, gabe dipadiar Ia bangso Pilistin dohot bangso Amon markuaso tu halahi.

⁸Salapan bolas taon honokna sai disosak bangso na dua i sude halak Israel na maringanan di Gilead luat ni halak Amori na di Habincaran ni Batang aek Jordan. Kejam do pambaen ni halahi tu angka halak Israel i.

⁹Taripar dope halak Amon di Batang aek Jordan laho kehe mamorangi Marga Juda, Benyamin dohot Efraim, gabe markancit situtu ma halak Israel.

¹⁰Jadi pio-pio ma halak Israel tu TUHAN, ninna halahi ma, “Madung mardosa hami maradopkon Ho, hara ni na so hami antureskon Ho Debatanami, gabe marsomba hami tu angka Debata Baal.”

¹¹Dialusi TUHAN ma, “Najolo dijajah bangso Mesir do hamu, bangso Amori, Amon, Pilistin, Sidon, Amalek dohot bangso Maon. Jadi gabe pio-pio ma hamu mangido tolong tu Au. Bia do, adong he na so Hupalua hamu sian kuaso ni halahi?

¹³Haru songon i pe, laing dihudukkon hamu dope Au, lalu kehe hamu marsomba tu angka dewa. Jadi saonnari nada ra be Au paluahon hamu.

¹⁴Tu angka debata na nipilimunu i ma hamu antong kehe. Pio-pio ma hamu tu halahi! Padiar ma halahi na paluahon hamu di bagasan hasusaan i.”

¹⁵Tapi didok halak Israel i ma tu TUHAN, “Madung mardosa hami da Tuhan. Baen ma roha-rohaMu, asal ma diurupi Ho hami di ari on.”

¹⁶Dung i diparambungkoni halahi ma sude patung sombaon, lalu marsomba halahi tu Debata. Jadi gabe ibo ma roha ni Debata paida-ida halahi na di hasompitan i.

¹⁷Di hatiha i topet ma markobas-kobas tentara ni Amon laho marporang jana marbandar ma halahi di Gilead. Madung marlagut halak Israel jana marbandar halahi di Mispa.

¹⁸Disi pio-pio ma rayat dohot angka pamimpin ni Marga Israel i di tonga-tonga ni halahi, “Sanga ise na puluk mangangkat sinjata mangalo bangso Amon, baenon ma gabe pamimpin ni sude pangisi ni Gilead.”