Read Batak Angkola HAKIM-HAKIM 11 Bible Online

HAKIM-HAKIM 11 - Batak Angkola bible

HAKIM-HAKIM 11

¹Tentara na sun barani do anggo si Jefta, na maringanan di Gilead. Goar ni amangnia si Gilead, tapi anggo inangnia sada boru jalang do.

²Adong dope angka anak ni amangnia i deba nari sian ripena na sah. Dung impas godang angka dakdanak i, dipaksa halahi ma si Jefta morot sian bagas i. Ninna halahi ma tusia, “Nada maruli tean-teanan bagi aha ho sian amanta hami, dibaen anak ni dadaboru na asing do ho.”

³Jadi gabe lari ma si Jefta sian kahangginia i lalu kehe ia maringanan di Tano Tob. Margabung ma ia disi dohot sada garombolan ni parjahat lalu kehe ma halahi manyamun.

⁴Nada sadia honok dung i diporangi halak Amon ma halak Israel.

⁵Di na tarjadi songon i, kehe ma angka hatobangon ni Israel na di Gilead marpio si Jefta sian Tano Tob.

⁶Didok halahi ma, “Beta ma mamimpin hami mangalo halak Amon.”

⁷Tapi dialusi si Jefta ma, “Inda he goyak sajo do rohamunu mida au. Ma jabat dipaksa hamu au manadingkon bagas ni damang. Biasi saonnari di hatiha hasusaan hamu, gabe ra hamu ro tu au?”

⁸Dialusi halahi ma, “Umbaen na ro pe hami na por do rohanami anso kehe ho rap dohot hami saonnari mamorangi bangso Amon, jana ho mamimpin sude halak na maringanan di Gilead.”

⁹Dialusi si Jefta ma, “Muda dioban hamu au mangulahi tu Gilead laho mamorangi bangso Amon, jana dilehen TUHAN di hita hamonangan, au noma na gabe pamarentamunu.”

¹⁰Didok halahi ma, “Satuju ma hami. TUHAN ma saksina.”

¹¹Jadi kehe ma si Jefta rap dohot angka pamimpin ni Gilead i. Dung i diangkat halak Gilead ma ia gabe parkuaso dohot pamimpin. Jana di Mispa, dipalalu si Jefta ma angka tuntutannia tu halak Gilead, disaksihon TUHAN sandiri.

¹²Dung salpu i diutus si Jefta ma halak mandapotkon Raja Amon laho mandok songon on, “Aha lakna salanami umbaen jabat diporangi hamu luatnami?”

¹³Dialusi angka raja-raja ni Amon ma angka utusan i, “Di hatiha na ro halak Israel sian Mesir, dibuat halahi do tanonami, mamungka sian Batang aek Arnon lalu tu Batang aek Jabok dohot Batang aek Jordan. Saonnari sugari nian paulahonmunu ma i di bagasan dame.”

¹⁴Disuru si Jefta ma mangulahi halak mandapotkon raja ni Amon

¹⁵laho mangalusi songon on, “Nada adong dirampas halak Israel tano ni halak Moab sanga tano ni halak Amon.

¹⁶Di na nitadingkon ni halak Israel Mesir, adop Solok Akaba do halahi kehe mamolus parhorsihan lopus tu Kades.

¹⁷Dung i diutus halahi ma halak tu raja ni Edom laho mangido isin mamolus luatnia i. Hape nada diloas ia halahi. Dung i laing dipangido halahi muse ma songon i tu raja ni Moab, tapi ia pe nada mangisinkon halahi mamolus sian luatnia. Jadi hara ni i gabe tinggal di Kades ma halahi.

¹⁸Dung i ditoruskon halahi pardalananna mamolus parhorsihan, tapi nada mamolus be sian daerah ni Edom dohot Moab, tapi mangaliati ma dalan ni halahi lopus lalu tu Habincaran ni Moab, di bariba ni Batang aek Arnon. Marbandar ma halahi disi, tapi nada taripar batang aek i harana masuk tu daerah ni Moab noma i.

¹⁹Dung salpu i disuru halak Israel ma halak mandapotkon si Sihon, raja ni Amori di Hesbon laho mangido isin mamolus luat ni Amori, harana na giot tu daerah ni halahi sandiri do halahi.

²⁰Tapi nada dipaloas si Sihon halahi. Dihara ia do sude tentarania lalu mambaen markas di Jahas, dung i diporangi halahi ma Israel.

²¹Tapi TUHAN, Debata ni Israel mangalehen hamonangan di halak Israel maradopkon si Sihon dohot angka tentarania i. Songon i ma pangalahona gabe dapot halak Israel sude angka tano ni halak Amori na maringanan di luat i.

²²Diingani halahi ma tano ni Amori mamungka sian Arnon di Selatan lopus tu Utara ni Batang aek Jabok, dohot sian parhorsihan na di Habincaran ni Jordan lopus tu Hasundutan ni Batang aek Jordan.

²³Jadi, TUHAN Debata ni Israel do na mangusir morot angka halak Amori na gabe haporluan ni halak ni TUHAN.

²⁴Jana saonnari na giot buatonmu ma he i mangulahi? Anggo tano na nilehen ni Kamos debatamunu i, tola ma i hot hamu nampunasa. Tapi anggo na nilehen ni TUHAN Debatanami di hami, partahankononnami do i.

²⁵Diambang ho ma lakna na umburju ho sian si Balak anak ni si Zipor, raja ni Moab i? Jungada ma he si Balak manuntut hak tu halak Israel, jana jungada ma he ia marporang dohot halahi?

²⁶Madung tolu ratus taon honokna halak Israel mangingani Hesbon dohot Aroer dohot angka kampung na adong humaliangna, dohot sude kota na adong di topi ni Batang aek Arnon. Jana biasi nada salolot ni i nada dibuat ho i?

²⁷Nada, nada marsala au tu ho. Ho do na marsala hara ni na pajolohon mamorangi au. TUHAN ma Hakimna na mamutuskon parkaro on sadari on antara ni bangso Israel dohot bangso Amon.”

²⁸Hape nada diterge raja ni Amon barita na sian si Jefta i.

²⁹Dung i dirajai Tondi Ni TUHAN ma si Jefta. Jadi kehe ma si Jefta manopot Luat Gilead dohot Manase, dung i mulak ma ia tu Mispa na di Gilead. Sian i dipatorus ia ma pardalanannia tu luat ni bangso Amon.

³⁰Dibaen si Jefta ma janjinia tu TUHAN songon on, “Muda lomo roha ni Tuhan au manaluhon halak Amon,

³¹jana mulak au maroban hamonangan, sanga na ise parjolo ruar sian bagasku laho mangalo-alo au, pasahatonku ma i gabe haul situtungon tu TUHAN.”

³²Dung i ditaripari si Jefta ma Batang aek Jordan laho mamorangi halak Amon jana dilehen TUHAN ma hamonangan tusia.

³³Marabis-abis ma si Jefta mamorangi halahi sian Aroer lopus tu luat na humaliang Minit — dua pulu kota sudena — jana lopus ma i tu Abel-Keramim. Bahat situtu do halak Amon na mate, jadi gabe talu ma halahi maradopkon Israel.

³⁴Di na mulak si Jefta tu Mispa, ro ma borunia mangalo-alo ia manortor lalu mamake rapano. Sasada i do dakdanaknia.

³⁵Disi diida si Jefta, gabe sun ma arsaknia, jadi gabe disibak-sibak ia ma bajunia jana didok ia ma, “Iale baya borungki, ma magopu ate-atengku! Biasi ma he angkon sai ho na mambaen marsak rohangku? Madung husumpahon tu TUHAN jana nada tarbaen au be manarik i mangulahi!”

³⁶Jadi didok bujing-bujing i ma tu si Jefta, “Madung marsumpa amang tu TUHAN, jana madung lomo roha ni TUHAN di amang laho mambaloskon hajahatan ni angka halak Amon, musu ni amang i. Jadi sanga aha na dung dijanjihon ni amang, dipalalu amang ma da i.”

³⁷“Hum on,” ninna bujing-bujing i, “sada na hupangidohon: Loas ma au di bagasan dua bulan on kehe tu dolok rap dohot angka dongan-donganku. Disi ma tangisanku bagianku, angke mate ma au dompak di sihabujingonku.”

³⁸Dipaloas amangnia i ma, lalu dipabuat ia laho kehe. Kehe ma anak boru i dohot angka dongan-dongannia tu dolok laho marhamarsahan disi, dibaen na giot marujung ma ngolunia taran so marbagas jana mardakdanak ia.

³⁹Dung salpu dua bulan, mulak ma ia mandapotkon amangnia, dung i dipatulus amangnia i ma na nijanjihonna i tu TUHAN. Jadi marujung mangolu ni anak boru i dompak di sihabujingonna. I ma asal mulana umbaen na somal di tonga-tonga ni halak Israel,

⁴⁰angka bujing-bujing haruar sian bagas opat ari lolotna ganop taon laho marhamarsahan marningot boru ni si Jefta na di Gilead.