Read Batak Angkola HAKIM-HAKIM 12 Bible Online

HAKIM-HAKIM 12 - Batak Angkola bible

HAKIM-HAKIM 12

¹Marhobas ma di hatiha i Marga Efraim laho marporang, lalu kehe ma halahi manaripari Batang aek Jordan giot tu Zafon. Didok halahi ma tu si Jefta, “Biasi kehe ho mamorangi bangso Amon so jolo dipiohon ho hami? Saonnari na giot tutungonnami ma ho dohot isi ni bagasmu.”

²Didok si Jefta ma, “Na adong do parsalisian godang antara ni halak Amon dohot hami halak Gilead. Madung hupiohon hamu anso ro mangurupi paluahon hami sian angka halak Amon i, hape nada ro hamu.

³Jadi dung adong pos ni roha di au na so ro be hamu mangurupi hami, jadi gabe hubaranihon noma kehe mamorangi angka halak Amon i, haru pe angkon mate au. Jadi dilehen TUHAN ma di au hamonangan maralohon halahi. Antong, biasi ro hamu pajolohon mamorangi au?”

⁴Dung i dipalagut si Jefta ma sude halak Gilead, lalu kehe ma halahi mamorangi dohot manaluhon halak Efraim. (Na nitudu ni halak Efraim do halak Gilead na maringanan di Efraim dohot Manase na manyirang dirina sian Efraim, margana i.)

⁵Diingani halak Gilead na marporang i ma angka inganan panariparan na di Batang aek Jordan, anso tarbaen halahi manangkup angka halak Efraim na giot maporus. Ganop adong halak Efraim na giot maporus, mangido isin anso dipaloas taripar, disapai halak Gilead i ma, “Halak Efraim dehe ho?” Alusanna ma i, “Nada ale.”

⁶Disuru halahi ma i mandok hata “Syibolet.” Dokkononna ma “Sibolet” angke nada malo mandok hata i topet pandokna. Lalu tangkuponna ma i lalu dibunu di sada inganan panariparan i. Jadi mate tarbunu ma opat pulu dua ribu halak Efraim di hatiha i.

⁷Onom taon honokna si Jefta mamimpin halak Israel. Dung i marujung ma ngolunia lalu dikuburkon di huta hagodangannia di Gilead.

⁸Dung si Jefta, si Ebsan na sian Betlehem ma mamimpin halak Israel songon sada hakim.

⁹Adong do tolu pulu halaklahi anak ni si Ebsan on jana tolu pulu halak borunia. Dipabagas ia tu angka marga na asing do borunia i, lalu dibuat ia ma tolu pulu halak boru sian marga na asing di angka anaknia i. Pitu taon honokna si Ebsan mamimpin halak Israel,

¹⁰dung i marujung mangolunia jana dikuburkon di Betlehem.

¹¹Dung si Ebsan, si Elon na sian Marga Zebulon ma mamimpin halak Israel sampulu taon honokna.

¹²Dung i marujung mangolunia lalu dikuburkon di Ayalon na di Luat Zebulon.

¹³Dung si Elon, si Abdon anak ni si Hilel na sian Piraton ma mamimpin halak Israel.

¹⁴Adong do opat pulu anaknia halaklahi jana angka pahompunia halaklahi adong tolu pulu halak. Adong be do ganop halahi halode tunggangna. Salapan taon honokna halak Israel dipimpin si Abdon.

¹⁵Dung i marujung mangolunia lalu dikuburkon di Piraton na di Luat Efraim di luat partoran ni halak Amalek.