Read Batak Angkola HAKIM-HAKIM 13 Bible Online

HAKIM-HAKIM 13 - Batak Angkola bible

HAKIM-HAKIM 13

¹Mardosa ma mangulahi halak Israel tu TUHAN, jadi gabe dipadiar TUHAN ma halak Pilistin markuaso tu halahi opat pulu taon honokna.

²Adong ma di hatiha i sada bayo di kota Zora, goarna si Manoah sian Marga Dan. Na so maruntungan do dadaborunia.

³Tapi sanoli ro ma Surusuruan Ni TUHAN tusia jana didok ma, “Salolotna on na so maruntungan do ho, tapi nada pola sadia honok nari denggan ma pamatangmu. Jadi tubuhononmu ma sada anak halaklahi.

⁴Jadi angkon jamot-jamot do ho. Ulang ho minum anggur sanga minum na pamabukkon, sanga mangan bagi aha na haram,

⁵angke anggo anak na giot kandungonmi madung ditontuhon hian gabe halak nasir,[4] jadi hara ni i, muda dung sorang anakmi ulang dipangkas obukna i. Ia ma ibana na giot paluahon bangso Israel sian kuaso ni halak Pilistin.”

⁶Dung i kehe ma dadaboru ni si Manoah i mandapotkon halaklahina jana didok ia ma, “Adong suruan ni Debata ro tu au, songon Surusuruan Ni Debata do tompana jadi gabe mabiar au. Nada husapai sanga na sian dia ia ro, jana ia pe nada dipaboa goarna tu au.”

⁷Tapi didok ia na giot denggan ma pamatangku jana tubuhononku anak halaklahi. Didok ia dope, nada tola au minum anggur sanga minum na pamabukkon sanga mangankon bagi aha na haram, harana angkon dipasahat do dakdanak i tu Debata gabe sada halak nasir salolot mangolu.

⁸Umbege i, martangiang ma si Manoah tu TUHAN, songon on, “Tuhan, sai ra ma Ho marsuru naposoMi tu hami laho paboahon sanga aha na angkon sibaenonnami salaho tu dakdanak i muda dung sorang ia.”

⁹Ditangihon Debata do pangidoan ni si Manoah i. Ro ma mangulahi Surusuruan Ni TUHAN i, hatiha topet juguk-juguk dadaboru ni si Manoah i di ladang. Di hatiha i, topet do nada disi halaklahinia i,

¹⁰jadi gabe dilojongi ia ma paboahon pangalaho i tusia, “Beta ma taligi, halak na ro i di hatiha na salpu tu au, ma ro mangulahi!”

¹¹Manigor diihutkon si Manoah ma dadaborunia i. Dipadonok ia ma tu halakna i jana disapai ia ma, “Tuan i dehe na maroban barita na tu dongan saripengki?” “Tutu ma da i,” ninna mangalusi.

¹²Jadi disapai si Manoah ma, “Muda tarjadi songon na nidok ni tuan i sanoli on, angkon aha do sibaenon ni dakdanak i? Bia do ngolunia sanoli on?”

¹³Dialusi Surusuruan Ni TUHAN i ma, “Angkon tangkas do ingoton ni dongan saripemi laho patuluskon sude na dung Hudokkon i tusia.

¹⁴Nada tola ia minum anggur sanga inumon na pamabukkon, nada tola muse mangankon sanga aha na haram. Sude sipaingot na Hulehen tusia angkon ihutkononnia.”

¹⁵Dung i ninna si Manoah ma tusia, “Dipainte tuan i ma da jolo santongkin. Hami parade jolo anak ni hambeng jara-jara di tuan i.”

¹⁶Tapi didok Surusuruan Ni TUHAN i ma, “Haru hupainte pe dison, nada giot panganonku na niparademi annon. Tapi muda laing na paradeonmu ma, parade ma i songon haul situtungon jana pasahat ma tu TUHAN.” Nada mamoto dope si Manoah bahaso Surusuruan Ni TUHAN do na manghobari dohot ia.

¹⁷Jadi didok ia ma, “Didok tuan i ma da jolo goar ni tuan i, anso tarbaen hami sanoli on mangalehen sangap tu tuan i muda dung tulus tarjadi na nidok ni tuan i.”

¹⁸Marsapa ma Surusuruan Ni TUHAN i, “Biasi giot botoonmu lakna goarKu. Anggo goarKi hahomangan do.”

¹⁹Jadi gabe dibuat si Manoah ma sada hambeng jara-jara dohot gandum saotik, lalu dibaen ia ma i di ginjang ni batu jana dihaulkon ia ma i tu TUHAN; dung i dibaen Surusuruan i ma angka hahomangon, di hatiha i diligi si Manoah dohot dadaborunia do i.

²⁰Jadi taran martimbual timus ni haul i tu ginjang sian langgatan i, diida si Manoah dohot dadaborunia i ma Surusuruan Ni TUHAN i manaek tu ginjang di bagasan jilam ni api i adop langit. Jadi gabe unduk ma ia dohot dadaborunia marsomba.

²¹Dung i nada ro be Surusuruan Ni TUHAN i tu si Manoah dohot dadaboru na i. Baru pe anso mamoto si Manoah bahaso Surusuruan Ni TUHAN do i.

²²Jadi didok si Manoah ma tu ripenia i, “Pasti na giot mate noma hita on, angke madung taida Debata.”

²³Dialusi dadaborunia i ma, “Anggo na giot bunuon ni TUHAN do hita tutu, pasti nada ra Ia manjagit haul na tahaulkon i tuSia; Ia pe nada giot patuduhon tu hita sudena on sanga paboahon tu hita angka pangalaho na dung didokNa i tu hita.”

²⁴Dung adong sadia honok muse, ditubuhon ripe ni si Manoah i ma sada anak halaklahi jana dibaen ia ma goarna si Simson. Mur magodang ma dakdanak i boti dipasupasu TUHAN;

²⁵jana taran di parbandaran ni Marga Dan na di antara ni Zora dohot Estaol ia, mamungka ma dilehen Tondi Ni TUHAN hagogoan tusia.