Read Batak Angkola HAKIM-HAKIM 14 Bible Online

HAKIM-HAKIM 14 - Batak Angkola bible

HAKIM-HAKIM 14

¹Sanoli kehe ma si Simson tu Timna. Diida ia ma disi sada bujing-bujing boru Pilistin.

²Dung i mulak ma ia jana didok ia ma tu amang dohot inangnia, “Por rohangku mida sada bujing-bujing boru Pilistin di Timna. Pangidoanku kehe ma amang dohot inang manyapaisa di au.”

³Tapi dialusi amangnia dohot inangnia i ma, “Biasi lakna angkon sai tu halak Pilistin na so saugamo i dohot hita ampal kehe laho mambuat boru? Adong he na so adong be lakna sian marganta sandiri sanga sian tonga-tonga ni bangsonta sada boru na tumbuk?” Dialusi si Simson ma tu amangnia i, “Tapi boru Pilistin i do por ni rohangku. Jana giotku disapai amang ma i di au.”

⁴Nada diboto simatobang ni si Simson i bahaso TUHAN do na mambaen si Simson songon i pangalahona. Angke na manjalak-jalahi hatiha hadenggananna dope TUHAN laho mamorangi halak Pilistin. Markuaso do halak Pilistin di hatiha i tu halak Israel.

⁵Jadi kehe ma si Simson tu Timna rap dohot ama, inangnia. Jadi di hatiha na mamolus halahi sian kobun anggur, dibege si Simson ma marngaur singa jara-jara.

⁶Tompu ma gabe margogo si Simson dibaen kuaso ni TUHAN, jadi disibak-sibak ia ma singa i dohot tangannia, songon dia ma hambeng dibaen ia singa i. Anggo tu amangnia dohot inangnia nada dicaritohon ia salaho tusi.

⁷Dung i kehe ma si Simson manandangi anak boru i, mangecet-ecet ma ia dohot anakboru i angke por antong rohania tu anak boru i.

⁸Dung adong sanga na sadia lolot, kehe ma si Simson mangulahi laho mangalap boru i. Di pardalanan i, manyimbil ma ia laho kehe mangaligi bangke ni singa na nibununia i. Dung lalu disi diida ia ma bahat sajo loba di bagasan bangkena i jana maraer muse do.

⁹Dihorus ia ma aerna i tu tangannia, lalu mardalan ia torus mangan-mangankon manisanna i. Dung i, di na mulak ia mandapotkon ama inangnia i, laing dilehen ia dope deba aer ni loba i di halahi. Dipangan halahi do i, tapi nada dipaboa si Simson na sian bangke ni singa do dibuat ia manisan i.

¹⁰Dung disapai amangnia i boru i, mambaen pesta ma si Simson disi songon na somal di angka naposo bulung.

¹¹Dung diida halak Pilistin ia, disuru halahi ma tolu pulu halak doli-doli laho mangawasi ia.

¹²Dung i didok si Simson ma tu halahi, “Adong huling-hulinganku. Muda taralusi hamu, hulehen pe di hamu sada be abit linen na halus dohot sasitel be pakean na jeges. Hulehen tingkina di hamu pitu ari salolot pesta parbagason on, laho mangalusi.

¹³Tapi anggo inda dapot hamu, angkon hamu ma antong mangalehen tu au sada be abit linen na halus dohot pakean na jeges.” Jadi didok doli-doli ni Pilistin sitolu pulu halak i ma, “Padiar! Saonnari dokkon bo huling-hulinganmi.”

¹⁴Jadi didok si Simson ma, “Sian na mangankon, haruar sipanganon; sian na gogo, haruar na tonggi.” Dung i dung salpu tolu ari laing na so dapot halahi dope mangalusi huling-kulingan i.

¹⁵Jadi di ari paopatkon didok halahi ma tu dadaboru ni si Simson i, “Angkon elekonmu do halaklahimi anso ra ia paboahon arti ni huling-kulingan i. Anggo inda, tutungonnami ma ho dohot sude isi ni bagas ni amangmu. Harana hami boto do nada na giot mambaen hami marpogos umbahen na diundang hamu hami, nada he songon i do?”

¹⁶Jadi hara ni i, kehe ma dadaboru ni si Simson i mandapotkon si Simson mardongan tangis, lalu didok ia, “Huboto do na so holong rohamu di au. Biasi ma he antong lehenonmu huling-kulingan tu angka donganku, hape nada dipaboa ho artina tu au? Tontu na goyak do rohamu mida au!” Didok si Simson ma, “Tangihon ma da! Salangkan tu amangku dohot inangku nada hupaboa. Aha ma dalan ni i angkon paboa-boaonku tu ho?”

¹⁷Salolot pesta na pitu ari i, torus ma tangis dadaboru ni si Simson i. Jana hara ni na sai murngis-urngis i, jadi di ari papituhon dipaboa si Simson ma astuan ni huling-kulingan i tusia. Dipaboa dadaborunia muse ma tu angka halak Pilistin i.

¹⁸Jadi di ari papituhon painte so sundut mataniari, didok angka halak kota i ma tusia, “Aha ma he na tumonggi sian manisan? Jana aha ma he na gumogo sian singa?” Dialusi si Simson ma, “Anggo na so diparalat hamu do dadaborungki, indangkan na dapot hamu mangalusi huling-kulinganki!”

¹⁹Dung i tompu ma si Simson gabe gogo dibaen kuaso ni TUHAN, lalu kehe ma ia tu Askelon. Dibunu ia ma disi tolu pulu halak bayo na marpakean na jeges-jeges, lalu dibuat ia ma pakeanna i lalu dilehen ia tu sitolu pulu halak na mangalusi huling-kulingannia i. Dung i, mulak ma ia tu bagasnia di bagasan roha na dokdok.

²⁰Lalu dilehen tulangnia ma dadaboru ni si Simson i tu bayo na gabe pandongani ni si Simson taran na di pesta parbagasonnia i.