Read Batak Angkola HAKIM-HAKIM 15 Bible Online

HAKIM-HAKIM 15 - Batak Angkola bible

HAKIM-HAKIM 15

¹Dung adong sanga na sadia lolot, dompak di musim ni na manyabi gandum, kehe ma si Simson mandapotkon dadaborunia i, maroban sada hambeng jara-jara giot disia. Didok ia ma tu tulangnia i, “Na giot mandapotkon dadaborungki do au ro.” Tapi nada dipaloas tulangnia i ia.

²Didok ia ma tu si Simson, “Na huambang do tutu situtu goyak rohamu mida ia, jadi, madung hulehen ia tu donganmi. Tapi tola do buatonmu angginia. Jumeges dope i.”

³Didok si Simson ma, “Sanga aha pe na giot baenonku tu halak Pilistin on, nada sala be au disi!”

⁴Jadi kehe ma ia manangkup sorigala tolu ratus. Ditambat ia ma ihur ni sorigala i mardua-dua; jana di tonga-tongana i di pamudunna i dibaen ia ma obor.

⁵Dung i dipagara ia ma obor i lalu dipalua ia angka sorigala i tu bagasan ladang ni halak Pilistin i. Mosok ma antong sude gandum na dung disabi na adong disi; jana nada hum i dope, tapi gandum na tubu dohot angka kobun anggur pe dohot muse gor.

⁶Kehe ma halak Pilistin manangkasi sanga ise na mambaen pangalaho i. Jadi dipaboa halak ma tu halahi bahaso na si Simson do na mambaensa, hara ni na nilehen ni tulangnia di Timna dadaboru ni si Simson tu sada halak dongan ni si Simson. Jadi hara ni i, kehe ma angka halak Pilistin i manyurbu anak boru i dohot sude isi ni bagas ni amangna lopus abis.

⁷Jadi didok si Simson ma tu angka halak Pilistin i, “Bo, songon on dehe pasangna dibaen hamu mambaen tindakan? Husumpahon ma tu hamu, nada tinggal so au anggo so jolo hubalos pangalaho on tu hamu!”

⁸Dung i diroro ia ma mangalo halahi jana bahat do sian halahi na nibununia dohot kejam. Dung i kehe ma ia jana maringanan ma ia di dolok batu di Etam.

⁹Jadi gabe ro ma halak Pilistin tu tano Juda lalu marbandar disi, dung i diporangi halahi ma kota Lehi.

¹⁰Marsapa ma halak Juda, “Biasi dipajolo hamu mamorangi hami?” Dialusi halahi ma, “Na giot manangkup si Simson do umbaen na ro hami anso tarbaen hami tusia songon na nibaennia tu hami.”

¹¹Umbege i, gabe kehe ma tolu ribu halak Juda tu liang na di dolok batu na di Etam. Didok halak ma disi tu si Simson, “Na mambaen bia dehe ho tu hami? Na so diboto ho dehe lakna bahaso na dung ro halak Pilistin mangkuasoi hita?” Dialusi si Simson ma, “Na mambaloskon na nibaen ni halahi tu au sajo do na hubaen.”

¹²Didok halahi ma, “Na giot manambat ho do umbaen na ro hami tuson anso hami pasahat ho tu halak Pilistin i.” Didok si Simson ma, “Janjihon hamu ma bahaso na so giot bunuonmunu au.”

¹³“Denggan,” ning halahi, “tutu do hum na giot manambat ho sajo do hami dohot pasahatkon ho tu halak Pilistin. Nada giot bunuonnami ho.” Jadi ditambat halahi ma ia dohot dua tali na imbaru, lalu dioban ma ia kehe sian liang i.

¹⁴Dung lalu ia di Lehi, marlojongi ma angka halak Pilistin i mandapoti ia marsurahi tusia. Tompu ma ia gabe gogo dibaen kuaso ni TUHAN. Dipargotapkon ia ma songon i angka tali panambatnia i songon dia ma rupani tali na mosok.

¹⁵Dung i adong ma dapot ia holi-holi isang-isang ni halode na baru mate. Dibuat ia ma holi-holi i, i ma dipake ia laho mamukuli saribu halak lopus mate.

¹⁶Jadi gabe marende ma si Simson, “Dohot isang-isang ni halode, hulibas saribu halak bahatna; dohot isang-isang ni halode, hupalagut do angka bangkena.”

¹⁷Dung diendehon ia songon i, diambungkon ia ma isang-isang i. Jadi hara ni i ma umbaen digoari inganan i Ramat-Lehi.[5]

¹⁸Dung i manguas situtu ma dihilala si Simson gabe pio-pio ma ia tu TUHAN. Didok ia ma, “Tuhan, on dope dilehen Ho hamonangan godang on tu au. Saonnari angkon mate manguas noma au lakna, gabe tangkupon ni angka halak Pilistin na so marsunat on ma au?”

¹⁹Jadi gabe dibuka Tuhan ma sada lubang di tano i, lalu ruar ma aek sian i. Minum ma si Simson, dung i sumuang ma gogonia dihilala ia. Jadi hara ni i ma umbaen digoari inganan i Mual Ni Batang aek Hakor.[6] Laing di Lehi do mual ni aek i.

²⁰Dua pulu taon honokna si Simson mamimpin halak Israel di hatiha na nirajaan ni halak Pilistin halahi.