Read Batak Angkola HAKIM-HAKIM 19 Bible Online

HAKIM-HAKIM 19 - Batak Angkola bible

HAKIM-HAKIM 19

¹Taran so adong dope raja di Israel, adong ma sada halak Levi maringanan dao di bagasan luat partoran Efraim. Dibuat ia ma sada bujing-bujing gabe radingnia sian Betlehem Juda.

²Tapi di pudi ni ari muruk ma anak boru i tusia, gabe mangilolong ma ia tu bagas ni amangnia di Betlehem. Dung disi ia tinggal opat bulan honokna,

³kehe ma halaklahinia i maroban sada hatoban dohot dua halode laho mandapoti dadaborunia i anso mulak tusia. Dung lalu disi, dioban dadaborunia i ma ia tu amangnia i. Disi diida amang ni anak boru i halaklahi ni borunia i, jop ma rohania manjagitsa,

⁴lalu dielek ia ma anso disi ia maringanan. Jadi disi ma ia tinggal tolu ari lolotna. Rap mangan minum dohot modom ma ia dohot radingnia i.

⁵Di ari paopatkon, sogot sajo dope ngot ma halahi lalu marhobasi laho kehe. Tapi didok amang ni anak boru i ma tu halak Levi i, “Jolo mangan ma hamu anso margogo, baru pe anso kehe hamu.”

⁶Jadi juguk ma halahi rap mangan minum. Lalu didok amang ni anak boru i ma tu halak Levi i, “Marsonang-sonang ma jolo hami lopus borngin.”

⁷Tapi dung jongjong halak Levi i laho kehe, dielek amang ni anak boru i ma ia anso ulang kehe. Jadi tinggal ma halak Levi i lopus saborngin i.

⁸Di ari palimahon, sogot sajo dope, di na laho kehe ia, didok amang ni anak boru i muse ma, “Jolo mangan ma da, beta hamu; annon satongkin nari baru kehe hamu.” Jadi rap mangan ma halahi.

⁹Dung i, di na giot kehe halak Levi i dohot rading bope hatobanna i sanoli nari, didok amang ni anak boru i ma, “Eh, na giot borngin noma saonnari. Golap ma santongkin nari. Gumonan ma dison hamu marborngin jana marsonang-sonang. Ancogot ma hamu kehe manyogot jana mulak tu bagasmunu.”

¹⁰Tapi nada ra be halak Levi i marborngin disi. Kehe ma ia dohot radingnia i rap dohot hatobannia i dohot halodenia na dua i nadung dipalanoi. Tolap ma halahi di kota na di tongtang ni Jebus (i ma Jerusalem).

¹¹Di na marayak borngin, lalu ma halahi di lambung ni Jebus jadi didok hatoban i ma tu tuanna i, “Tuan, di kota ni halak Jebus on ma da hita marborngin.”

¹²Tapi dialusi tuanna i ma, “Nada! Nada maradian hita di kota na so halak Israel pangisina, tapi giot lalu noma hita tu Gibea.

¹³Beta tapatorus ma mardalan saotik nari, marborngin di Gibea ma hita naron sanga di Rama.”

¹⁴Jadi gabe mardalan ma halahi torus jana nada maradian di Jebus. Ma lusut mataniari di na lalu halahi di Gibea na di luat ni Marga Benyamin.

¹⁵Maradian ma halahi disi laho marborngin. Di na lalu i halahi disi, nada adong sahalak pe na ra manjagit halahi laho marborngin. Jadi gabe kehe ma halahi juguk di alaman godang i.

¹⁶Dompak na juguk i halahi disi, ro ma sada na tobang-tobang na baru mulak sian karejona di ladang. Satutuna sian partoran Efraim do asalnia tapi saonnari maringanan di Gibea noma ia. (Anggo halak kota Gibea na asing i sian Marga Benyamin do.)

¹⁷Di na niida ni na tobang-tobang i halak Levi i di alaman godang i, marsapa ma ia, “Na sian dia do hamu dongan, jana na giot tu dia do?”

¹⁸Dialusi halak Levi i ma, “Na baru ro dope hami sian Betlehem na di Juda jana na mardalan laho mulak do hami tu partoran Efraim na dao di bagasan an. Nada adong sada halak pe sian halak kota on na ra manjagit hami marborngin di bagasna.

¹⁹Nada porlu di hami sanga aha na asing; tuk do anggo bohalnami. Adong do durame jana adong do panganon ni pahan-pahanan di halodenami; jana adong do roti dohot anggur baen di au rap dohot dongan saripengku dohot di hatobanku.”

²⁰Jadi didok na tobang-tobang i ma, “Ulang pola gamang hamu, hutolong pe hamu annon. Ulang di alaman on hamu marborngin.”

²¹Dung i dioban ia halahi marborngin tu bagasnia lalu dilehen ia ma mangan angka halode ni bayo i. Dung i, paias diri ma ia dohot angka tamunia i, lalu mangan.

²²Dompak marsonang-sonang halahi, tompu ma dihobuk angka jolma na so ture na di kota i bagas i. Diburbari halahi ma pintu ni bagas i jana didok halahi ma tu na tobang-tobang i, “Pasahat tu hami bayo na niobanmi martamu tu bagasmi. Giot pakeonnami ia!”

²³Haruar ma na tobang-tobang i jana didok ia ma tu halahi, “Ulang ale dongan. Pangidoanku, ulang baen hamu pangalaho na jahat dohot na so patut songon i, harana tamungku do da i.

²⁴Hulehen pe annon radingnia dohot borungki di hamu. Sapuasmunu ma anggo dohot halahi. Hum on do, ulang antong baen hamu sanga aha na jahat maradopkon tamungki!”

²⁵Tapi laing manggogo do angka jolma na so ture i; jadi dionjarkon halak Levi i ma radingnia i tu ruar baen di halahi. Jadi dipalalu halahi ma giot ni halahi tu anak boru i nada mantak lopus torang ari.

²⁶Di andostorang mulak ma anak boru i, tapi di jolo ni pintu ni bagas ni na tobang-tobang i, inganan parbornginan ni halaklahinia i, tinggang ma ia. Dung bincar mataniari, laing disi dope ia.

²⁷Manyogot i, di na tarsunggul halaklahinia i, dibuka ia ma pintu laho kehe marangkat, didapot ia ma radingnia i modom di jolo ni bagas i laing tiop tanganna i di pintu i.

²⁸“Ngot,” ninna bayo i tusia, “beta ma hita kehe.” Tapi nada mangalusi anak boru i, harana madung mate. Jadi diangkat ia ma lalu dibaen ia tu ginjang ni halode i, dung i kehe ma ia mulak tu bagasnia.

²⁹Dung lalu di bagas, masuk ma ia jana dijalahi ia ma piso, dibuat ia ma bangke ni radingnia i lalu diponggoli ia gabe dua bolas ponggol. Dung sidung i, ditongoskon ia ma ponggol-ponggolna i tu bangso Israel na dua bolas marga i, samponggol be.

³⁰Sude ma halak na marnida i, mandok, “Na so unjung dope taida pangalaho na songon on tarjadi, mamungka sian na haruar halak Israel sian Mesir lopus tu sadari on. Nada tola sip sajo hita. Angkon martahi do hita anso martindak!”