Read Batak Angkola HAKIM-HAKIM 2 Bible Online

HAKIM-HAKIM 2 - Batak Angkola bible

HAKIM-HAKIM 2

¹Kehe ma Surusuruan Ni TUHAN sian Gilgal tu Bokim jana didok ma tu angka halak Israel, “Madung Huparuar hamu sian Mesir jana Huoban hamu tu tano na dung Hujanjihon tu ompungmunu. Madung Hudok muse, ‘Nada gotapkononKu pudun-pudun ni janji antara Au dohot hamu.

²Hara ni i, nada tola hamu mambaen sanga aha ihot-ihot dohot halak na mangingani luat on. Angkon rumpakkononmunu do angka langgatan ni halahi i.’ Hape nada dibaen hamu sanga aha na Huparentahon i. Mur sabalikna do tehe dibaen hamu!

³Jadi saonnari, tangihon hamu ma! Nada paorotonku angka halak luat on muda marporang hamu dohot halahi. Gabe musumunu ma halahi, jana tarjorat ma hamu, lopus dohot hamu marsomba tu angka debata ni halahi.”

⁴Dung sidung dipajojor surusuruan i barita i, tangis ma sude bangso Israel.

⁵I ma dalanna umbaen na digoari inganan i Bokim.[2] Gabe dipasahat angka halak Israel i ma di inganan i haul tu TUHAN.

⁶Dung dipabuat si Josua angka halak Israel i, halahi pe kehe ma laho mangingani tano na gabe bagian ni halahi be.

⁷Salolot mangolu si Josua, mangoloi TUHAN do halak Israel. Dung marujung pe ngolu ni si Josua laing tongtong do halahi mangoloi tu Tuhan salolot halahi dipimpin angka halak na dung marnida sandiri sude hahomangan na nibaen ni TUHAN di halak Israel.

⁸Di na marumur saratus sampulu taon marujung ma ngolu ni si Josua anak ni si Nun — naposo ni TUHAN i.

⁹Di tanonia sandiri do ia dikuburkon, i ma di Timnat-Heres na di partoran Efraim di Utara ni Dolok Gaas.

¹⁰Dung i marujung muse ma ngolu ni na sangoncap i. Jana sundut na mangihut nada be mananda TUHAN, angke nada dialami halahi be sanga aha na nibaen ni TUHAN di bangso Israel.

¹¹Dung i mardosa ma halak Israel maradopkon TUHAN, jana mulai ma halahi marsomba tu Baal.

¹²Ditadingkon halahi ma TUHAN na maroban halahi ruar sian Mesir. Jana mulai ma halahi marsomba tu debata na asing, i ma debata ni angka bangso na humaliang halahi. Hara ni i gabe muruk ma TUHAN.

¹³Nada marsomba tu TUHAN be halahi, tapi marsomba tu Baal dohot Astoret noma halahi.

¹⁴Jadi muruk ma TUHAN tu bangso Israel, jana dipadiar TUHAN ma angka pangarampok mangarampas dohot manaluhonsa, lopus nada taralo halahi be angka musuna i.

¹⁵Ganop kehe halahi marporang, TUHAN mangalo halahi, songon na dung dipasingotkon ni TUHAN hian tu halahi. Jadi gabe marhancit situtu ma halahi.

¹⁶Dung i dilehen TUHAN ma di halahi angka pamimpin na marjuang laho paluahon halahi sian garombolan panyamun i.

¹⁷Hape nada parduli halak Israel di angka pamimpin i. Nada setia halahi tu TUHAN, tapi marsomba do tu angka debata na asing. Nada diihutkon halahi tiruan na sian ompu na umpompar halahi na burju mangoloi tu angka parenta ni TUHAN.

¹⁸Muda dilehen TUHAN sada pamimpin di halak Israel, sai na ditolong Ia do i. Jana salolot mangolu pamimpin i, sai dipalua TUHAN do halahi sian angka musu ni halahi, dibaen ibo do rohaNia mida halahi muda dibege Ia halahi mangangguhi hara ni na diparkanciti jana dipapisat-pisat.

¹⁹Tapi muda dung mate pamimpin i, jumorbut dope pangalaho ni bangso i sian sundut na di jolona. Mangoloi dohot marsomba tu angka debata na asing ma halahi. Diulahi halahi ma tu hasomalanna na jat jana nada ra halahi mangantaksa.

²⁰Patunda ni i gabe sun ma muruk ni TUHAN tu Israel, jana didok ma, “Madung Huparentahon tu angka ompung ni bangso on anso ditiopsa parjanjian antara Au dohot halahi. Hape digotapkon bangso on do pudun-pudun ni janji i; dilanggar halahi do parentangKu.

²¹Saonnari nada ra be Au mangayak sanga na bangso dia pe na laing maringanan di luat on di parmate ni si Josua.

²²Giot pakeonKu ma angka bangso i laho manguji bangso Israel anso Huboto sanga na ra do bangso Israel mangihutkon angka parentangKu songon angka ompu ni halahi, sanga nada.”

²³I ma dalanna umbaen na so dilehen TUHAN hamonangan tu si Josua maradopkon angka bangso i. Tapi dipadiar TUHAN do halahi maringanan di luat i jana nada manigor dipaorot Ia.