Read Batak Angkola HAKIM-HAKIM 21 Bible Online

HAKIM-HAKIM 21 - Batak Angkola bible

HAKIM-HAKIM 21

¹Dompak na marlagut halak Israel di Mispa, marjanji do halahi tu Tuhan bahaso na so adong sian halahi na giot mangisinkon boruna gabe saripe ni halak Benyamin.

²Saonnari kehe ma halahi tu Betel jana marjuguhan di bagasan arsak di adopan ni TUHAN. Tangis ma halahi pio-pio,

³“O TUHAN, Debata ni Israel, biasi dehe angkon tarjadi sudena on? Sadari on, mago ma sada marga sian bangso Israel!”

⁴Ancogotna i sogot sajo dope, dipajongjong halak Israel ma sada langgatan disi, lalu dipasahat halahi ma tu Tuhan haul situtungon dohot haul haluaon.

⁵Dung i disihiri halahi ma di tonga-tonga ni angka marga ni Israel betak adong na so kehe marlagut mangadop tu TUHAN di Mispa na salpu i. (Madung marsumpa halahi di hatiha i, sanga ise na so manggohi pio-pio na tu Mispa angkon mate niuhuman.)

⁶Ibo ma roha ni halak Israel marnida angka kahanggi ni halahi halak Benyamin i, didok halahi ma, “Sadari on agoan ma Israel sada sian margana.

⁷Bia noma baenonta anso tarbaen marripe halak Benyamin na tinggal on, harana anggo hita madung tasumpahon tu TUHAN na so isinkononta angka borunta gabe dongan saripe ni halak Benyamin!”

⁸Jadi gabe ditangkasi halahi ma betak adong sada golongan sian marga ni Israel na so dohot kehe na marlagut i di Mispa. Jana tardapot ma di halahi bahaso na so adong muse sahalak na kehe tu Mispa sian angka halak Jabes na di Gilead.

⁹Harana, hatiha mamareso daftar hadir, hapengani nada adong dapot disi sada halak pe sian Jabes.

¹⁰Jadi hara ni i, disuru angka halak na marlagut di Betel i ma dua bolas ribu halak angka na umbarani sian tonga-tonga ni halahi

¹¹laho mamunu sandok jolma na di Jabes, dohot dadaboru bope dakdanak jana songon i muse dohot dadaboru na so bujing-bujing be.

¹²Jadi sian angka na tinggal di Jabes i, dapot halahi ma opat ratus halak na laing bujing-bujing dope. Jadi dioban halahi ma angka bujing-bujing i tu parbandaran na di Silo, na di Luat Kanaan.

¹³Dung i disuru sude halak Israel ma utusan tu angka halak Benyamin na di angka dolok batu na di Rimon laho manawarkon pardamean.

¹⁴Jadi hara ni i gabe mulak ma angka Benyamin i, lalu dilehen halak Israel ma tu halahi angka bujing-bujing na sian Jabes na so hona bunu i. Hape nada tuk bahat ni bujing-bujing i di angka halak Benyamin i.

¹⁵Ibo ma roha ni halak Israel mida halak Benyamin i, dibaen madung matapor hasadaon ni angka marga ni Israel dibaen TUHAN.

¹⁶Jadi gabe didok angka pamimpin ni parpunguan na di Betel i ma, aha noma sibaenonta salaho tu halahi na tinggal i anso bisa halahi marripe? “Harana nada adong be dadaboru di Marga Benyamin.

¹⁷Ulang jabat nian mago sada marga sian Israel na dua bolas marga i. Angkon sijalahanta do dalan anso laing marpinompar torus Marga Benyamin.

¹⁸Tapi bia dope baenon; nada tarbaen hita be mangisinkon angka borunta marbagas dohot halahi, harana madung tasumpahon do ganop be sian tonga-tonganta na so tola mangisinkon boruna marbagas dohot halak Benyamin!”

¹⁹“Antong,” ning halahi ma, “adong do dapot dalan di Pesta Taonan tu TUHAN sanoli on di Silo.” (Di sabola Selatan ni Silo on, adong do kota na margoar Betel, jana di Hasundutanna muse do dalan godang ni Betel tu Sikem, jana di Utarana muse i ma kota Lebona.)

²⁰Jadi didok angka pamimpin ni na marlagut di Betel i ma tu angka halak Benyamin na tinggal i, “Kehe ma hamu martabuni di angka kobun anggur na di Silo

²¹jana marjago-jago ma hamu disi. Jadi muda haruar angka bujing-bujing ni Silo laho manortor salolot Pesta Taonan di TUHAN, angkon ruar ma hamu sian angka kobun anggur i. Jadi angkon marsilojongkon ma sada be bujing-bujing i sian halahi jana dioban ma tu Luat Benyamin anso dibaen ripemunu be.

²²Muda ro amangna sanga ibotona manuntut, bolas do dokkononmunu, ‘Padiar hamu ma da halahi di hami. Nada na hami rampas di parporangan halahi. Jana dibaen nada dilehen hamu di hami halahi, nada na mangalanggar janji hamu, jadi nada sala hamu.’ ”

²³Jadi dipatulus angka halak Benyamin i ma songon na didok tu halahi. Dilojongkon halahi ma sada be bujing-bujing sian tonga-tonga ni angka bujing-bujing na manortor i di Silo. Dung i mulak ma halahi tu luat ni halahi sandiri, jana dibangun halahi ma mangulahi angka kotana lalu hot ma disi maringanan.

²⁴Jana angka halak Israel na asing i pe markehean muse ma. Marmulahan ma halahi tu luatna be, mangihutkon marga dohot angka horong-horongna.

²⁵Nada adong dope di hatiha i raja di Israel. Marguru tu giot ni rohana be do ganop halahi.