Read Batak Angkola HAKIM-HAKIM 3 Bible Online

HAKIM-HAKIM 3 - Batak Angkola bible

HAKIM-HAKIM 3

¹Jadi laho manguji angka halak Israel na so jungada mangalami parporangan di Kanaan, dipadiar TUHAN ma sanga na piga bangso laing maringanan di luat i.

²Dibaen TUHAN pe songon i anggo maksudna na mangajar ganop sundut ni Israel do mananda porang, lumobi halahi na so jungada dohot marporang.

³On ma angka bangso na laing maringan di luat i: Bangso na laing maringanan di kota ni Pilistin na lima i, sude bangso Kanaan, bangso Sidon dohot bangso Hewi na maringanan di partoran Libanon, mamungka sian Dolok Baal Hermon, lopus tu dalan laho tu Hamat.

⁴Na gabe batu ujian do halahi di bangso Israel umbaen na laing disi halahi. Jadi songon i ma pamotona sanga na ihutkonon ni bangso Israel do angka parenta ni TUHAN tu ompu ni halahi marhite si Musa.

⁵I ma dalanna laing tong maringanan di luat i halak Kanaan, Het, Amori, Peris, Hewi dohot Jebus rap dohot halak Israel.

⁶Marsibuatan boru ma halak Israel dohot angka bangso i. Jana dohot ma halak Israel marsomba tu angka debata ni halahi.

⁷Dung i mardosa ma mangulahi halak Israel tu TUHAN, Debata ni halahi. Lupa ma halahi tuSia gabe marsomba halahi tu angka gana-ganaan Baal dohot Asera.

⁸Gabe muruk ma TUHAN tu halak Israel jana dipadiar halahi talu jana dirajai Raja Kusan Risataim na sian Mesopotamia salapan taon honokna.

⁹Dung i pio-pio ma halak Israel mangido tolong tu TUHAN, gabe dilehen TUHAN ma si Otniel laho paluahon halahi. (Anak ni si Kenas, anggi ni si Kaleb do si Otniel.)

¹⁰Digohi Tondi Ni TUHAN ma si Otniel, jadi gabe pamimpin ni halak Israel ma ia. Kehe ma ia marporang, gabe dilehen TUHAN ma hamonangan tusia maralohon raja ni Mesopotamia i.

¹¹Jadi gabe sonang ma luat i opat pulu taon lolotna. Dung i marujung ma ngolu ni si Otniel.

¹²Mardosa ma mangulahi halak Israel tu TUHAN, jabat dibaen TUHAN si Eglon raja ni Moab gabe gumogo sian Israel.

¹³Marsada ma si Eglon on dohot bangso Amon dohot Amalek, ditaluhon halahi ma halak Israel, dung i dirampas halahi ma Jeriko, kota parkurmaan i.

¹⁴Salapan bolas taon honokna halak Israel tunduk tu si Eglon.

¹⁵Tapi di na pio-pio halak Israel mangido tolong tu TUHAN, dilehen Ia ma si Ehud tu halahi laho paluahon halahi. Panjaluk do si Ehud; anak ni si Gera do ia na sian Marga Benyamin. Markite-hite si Ehud on do somalna halak Israel manongoskon angka silua tu Raja Eglon.

¹⁶Sanoli dibaen si Ehud ma sada podang disia. Sidua baba do podang i, jana ginjangna mardonok do satonga meter. Disandangkon si Ehud ma podang i di siamunnia di bagasan bajunia i

¹⁷lalu kehe ma ia pasahatkon angka silua ni halak Israel tu si Eglon, na santak mokmokna i.

¹⁸Dung i dipio si Ehud ma angka halak na mamorsan silua i mulak.

¹⁹Tapi di na lalu halahi di angka batu na margorga na di lambung ni Gilgal, maradian ma ia, dung i mulak ma ia muse mandapotkon si Eglon na topet di hatiha i di kamar na di tingkat parginjang di bagas godangnia marsipurpur. Ning ia ma tu si Eglon, “Ale rajanami! Na maroban barita rahasia do iba tu raja i.” Jadi gabe diparentahon raja i ma sude hatobanna ruar jana tading ma raja i dohot si Ehud sajo.

²⁰Dung i, dipadonok si Ehud ma tu raja i na topet juguk, lalu didok ia ma, “Adong barita sian Debata di raja i!” Umbege i, jongjong ma raja i.

²¹Manigor disintakkon si Ehud ma podangnia dohot tangan siambirangnia i sian siamunnia, ditihamkon ia manigor bagas tu butuha ni raja i.

²²Masuk ma sude podang i lalu tu suhulna i di tabo-tabo na di butuha ni raja i, lopus taripar tu pudi. Dipadiar si Ehud do podang i disi,

²³lalu ruar ma ia, ditutup jana dikunci ia pintu ni kamar i,

²⁴jana kehe ia. Di na marroan angka hatoban ni raja i jana diida halahi angka pintu ni kamar i tarkunci, na diambang halahi do laing na di bagasan raja i jana topet tu pudi.

²⁵Dung lolot dipainte halahi jana laing nada dibuka raja i pintu, dibuat halahi ma kunci mambuka pintu i. Hape ma gayang raja ni halahi i di lante i, mate.

²⁶Taran na painte-intehon i halahi, ma maporus si Ehud palua diri tu Seira mamolus sian angka batu na margorga i.

²⁷Disi lalu ia tu partoran Efraim, dipalu ia ma sarune laho marpio halak Israel marporang. Marroan ma halahi jana dipimpin ia ma halahi manuat sian partoran i.

²⁸“Ihutkon au,” ning ia tu halahi, “Madung ditaluhon TUHAN di hamu angka halak Moab musumunu.” Jadi manuat ma angka halak Israel i sian partoran i dipimpin si Ehud. Dibuat halahi ma inganan sitariparan ni halak Moab na di Batang aek Jordan. Umpe adong sahalak sian musu dipadiar malua manyiborang.

²⁹Adong do hira-hira sampulu ribu halak parajurit ni Moab na dumenggan dibunu halahi di parporangan i; nada adong na malua.

³⁰Di ari i, talu ma Moab maradopkon Israel. Jadi sonang ma luat i salapan pulu taon honokna.

³¹Pamimpin na mangihut muse i ma si Samgar anak ni si Anat. Ia pe marporang do laho paluahon halak Israel. Dibunu ia do onom ratus halak Pilistin dohot tungkot pangayak ni lombu.