Read Batak Angkola HAKIM-HAKIM 7 Bible Online

HAKIM-HAKIM 7 - Batak Angkola bible

HAKIM-HAKIM 7

¹Sanoli sogot sajo dope ngot ma si Gideon dohot angka anak buania jana kehe ma halahi marbandar di lambung ni mual ni Batang aek Harod. Di sabola Utara ni halahi do parbandaran ni halak Midian. Di rura na di lambung ni Tor More.

²Didok TUHAN ma tu si Gideon, “Mabahattu do anak buami. Nada tarlehen Au hamonangan di halahi maralohon halak Midian, angke dipikir halahi muse hara ni gogo ni halahi sandiri umbaen na monang halahi, gabe nada dilehen halahi pujian tu Au.

³Antong, pabotohon ma tu anak buami, ‘Ise na mabiar, angkon tadingkononna do Dolok Gilead on jana mulak tu bagasna.’ ” Gabe mulak ma dua pulu dua ribu halak; hum sampulu ribu noma na tinggal.

⁴Jadi didok TUHAN ma mangulahi tu si Gideon, “Laing mabahattu dope anak buami. Jadi oban ma halahi tu batang aek. Disi ma Husaring halahi di ho. Muda Hutodo sada halak anso kehe rap dohot ho, angkon kehe do ia. Tapi muda Hutodo sada halak nada tola kehe dohot ho, nada tola ia kehe.”

⁵Jadi dioban si Gideon ma halahi tu batang aek, lalu didok TUHAN ma tu si Gideon, “Sanga ise na jongjong manginum aek songon anjing angkon paasingonmu ma i sian ganop halak na marsinggang laho minum.”

⁶Adong ma tolu ratus halak na jongjong manginum aek sian tanganna; anggo na asing i sude marsinggang do laho minum.

⁷Dung i didok TUHAN ma tu si Gideon, “Rap dohot sitolu ratus halak na minum jongjong i ma giot paluaonKu hamu jana lehenonKu hamonangan tu hamu maralohon halak Midian. Anggo angka na asing i suru ma i mulak.”

⁸Jadi hara ni i disuru si Gideon ma mulak halak Israel na asing i, asing ni sitolu ratus halak i. Sude bohal dohot angka sarune ditahan halahi ma. Di lombang ni halahi di rura i do parbandaran ni halak Midian.

⁹Di borngin i didok TUHAN ma tu si Gideon, “Ngot ma ho, Gideon! Kehe ma ne porangi parbandaran ni halak Midian i. Hulehen do hamonangan di ho mangalo halahi.

¹⁰Tapi anggo mabiar do ho, piohon ma si Pura hatobanmi kehe rap dohot ho tu parbandaran ni musu i.

¹¹Begeonmu ma naron sanga aha na nihataan ni musu i, jana i ma na mambaen ho puluk mangaroro.” Jadi kehe ma si Gideon dohot si Pura tu parbatasan ni parbandaran ni musu i.

¹²Marserak do sap di rura i halak Midian, Amalek dohot angka halak na sian parhorsihan i, songon dia ma siapor na marrongom idaon. Unto ni halahi pe santak bahatna, songon horsik na di topi ni laut idaon.

¹³Di na lalu si Gideon disi, dibege ia ma sada bayo na topet mancaritohon nipinia tu donganna. Songon on ma didok bayo i, “Huida ma adong sada roti jawawut na margulang-gulang masuk tu bagasan parbandaranta lalu ditondong ia sada bandar i. Marumpak ma da bandar i lopus damos tu tano i.”

¹⁴Dialusi donganna i ma, “Ah pasti podang ni si Gideon anak ni si Joas halak Israel i, na nidok ni i! Astuanna na dung dilehen Debata do hamonangan tusia maradopkon halak Midian dohot sude paranganta parporang i!”

¹⁵Di na nibege ni si Gideon taringot tu nipi ni bayo i dohot astuanna, manungkap muse ma ia marsomba Debata. Dung i mulak ma ia tu parbandaran ni Israel jana didok ia ma, “Markobas be ma! Dilehen TUHAN do hamonangan di hamu maradopkon parangan ni Midian!”

¹⁶Dung i dibagi-bagi si Gideon ma anak buania i gabe tolu regu. Dilehen ma sada be sarune dohot sada be kendi na marisi obor.

¹⁷Didok si Gideon ma tu halahi, “Muda dung lalu au di parbatasan ni parbandaran ni halak Midian i, parrohahon hamu denggan tu au, jana baen hamu ma songon na hubaen.

¹⁸Muda huombus sarune dohot rombonganki, hamu pe angkon ombusonmunu sarunemunu i jana marsurak humaliang parbandaran i, ‘Di TUHAN dohot di si Gideon!’ ”

¹⁹Marayak tonga borngin, lalu ma si Gideon dohot angka dongannia i di parbatasan ni parbandaran ni musu i. Na baru margonti dope di hatiha i pangawal. Jadi diombus si Gideon dohot rombongannia i ma sarune jana dipartaporkon halahi ma angka kendi ni halahi i.

²⁰Laing dibaen rombongan na dua nari ma songon i. Sude ma halahi mangangkat obor ni halahi i dohot tangan siambirang, jana mangombus sarune na di tangan siamun ni halahi lalu marsurak, “Podang di TUHAN dohot di si Gideon!”

²¹Laing jongjong di ingananna be do halahi humaliang parbandaran i. Jadi gabe marlojongi ma tentara ni musu i tarbirit-birit lalu mangarar.

²²Di na nipalu ni si Gideon dohot angka donganna i sarune i, dibaen TUHAN ma tentara ni musu i marsialoan na sada tu na asing marsitampulan dohot podang. Marlojong ma halahi adop Zarerah lopus tu Bet-Sita dohot kota Abel-Mehola na di lambung Tabat.

²³Gabe dipio muse do Marga Naftali, Aser, Manase Parhabincaran dohot Manase Parhasundutan. Dikojar halahi ma tentara ni Midian.

²⁴Dohot tu sude partoran Efraim ditongos si Gideon do barita pio-pio on, “Beta ma manuat hita mamorangi halak Midian. Partahankon hamu ma Batang aek Jordan dohot angka anak ni batang aek lopus tu Bet-Bara. Ulang paloas hamu halak Midian taripar sian i.” Jadi diarahon ma angka halak Efraim, dipartahankon halahi ma Batang aek Jordan dohot sude anak ni batang aek lopus tu Bet-Bara.

²⁵Tartangkup ma dibaen halahi dua halak pamimpin ni bangso Midian, i ma si Oreb, dohot si Zeeb, lalu dibunu ma si Oreb di Batu Oreb, jana si Zeeb dibunu di inganan pamoroan anggur ni si Zeeb. Torus do halak Efraim mangkojar halak Midian i, lalu maroban ulu ni si Oreb dohot si Zeeb tu si Gideon di bariba ni Jordan na di bagian Habincaran.