Read Batak Angkola 2 JOHANNES 1 Bible Online

2 JOHANNES 1 - Batak Angkola bible

2 JOHANNES 1

¹Sian Sintua tu Ina na dung tarpili dohot tu angka dakdanakna[1] na huhaholongi. Nada hum au sajo na mangkaholongi hamu, tapi dohot do sude halak na dung mananda hasintongan i.

²Angke maringanan do jamita na sintong i na sian Debata di bagasan rohanta jana na sai tongtong rap dohot hita salolot-lolotna.

³Sai dipasupasu ma hita jana sai dilehen ma asi ni roha dohot hasonangan sian Debata Amanta i dohot sian Jesus Kristus Anak Ni Debata Ama i. Sai maruli ma hita di sudena i di bagasan hasintongan dohot holong ni roha.

⁴Jop sajo do rohangku dung huboto, na adong do hape angka dakdanaknami na mangolu mangihutkon jamita na sintong i na sian Debata songon na dung diparentahon ni Ama i tu hita.

⁵Jadi gomos hupangido di Dainang anso marsihaholongan hita sama hita. Nada pola tona na imbaru na hupajojor on; na dung dilehen do tu hita tona on sian mulana.

⁶Marholong ni roha, astuanna mangoloi tona ni Debata. Jana tona na dung dibege hamu sian mulana i, i ma anso marsihaholongan hamu sama hamu.

⁷Madung bahat angka pargabus manyarsar sun ro di dia di tano on. Na so nioku ni halahi do na dung ro Jesus Kristus tu portibi on songon sada jolma. Pargabus do halak na songon i jana musu ni Kristus.

⁸Hara ni i, jagohon hamu ma anso ulang jabat adong sanga aha na mago sian na hami pasahat i tu hamu.[2] Manat ma hamu anso laing dohot hamu manjagit sudena upamunu i.

⁹Sanga ise na so maringan di pangajaran ni Kristus i, tapi na kehe manyimbil sian na niajarkon ni Kristus, nada marsada halak na songon i dohot Debata. Halak na sai tongtong di bagasan pangajaran ni Kristus, astuanna na marsada do ia tongtong tu Ama i dohot tu Anak i muse.

¹⁰Hara ni i, muda adong halak na ro jana manjamitahon tu hamu pangajaran na so niajarkon ni Kristus, ulang ma jagit hamu halakna i di bagasmunu; jana ulang dok hamu “Horas” tu halahi.

¹¹Angke sanga ise na manjalang halak na songon i, na dohot do i rap dohot halahi mambaen parange na jahat i.

¹²Bahat sajo do nian na giot pajojoronku tu hamu, tapi huhilala dumenggan ma ulang pola markite-hite surat. Arop do rohangku tarbaen au manopot hamu jana mandok hata au sandiri tu hamu anso tutu situtu marjop ni roha hita.

¹³Tabe ma di hamu sian angka dakdanak ni donganmunu[3] na dung tarpili i.