Read Batak Angkola 3 JOHANNES 1 Bible Online

3 JOHANNES 1 - Batak Angkola bible

3 JOHANNES 1

¹Sian Sintua tu si Gayus na nihaholongan, na huhaholongi di bagasan hasintongan i.

²Hutangiangkon do anso denggan nian sasudena boti anso laing horas torkis ho nian, laing songon na huboto i na denggan do ngolu partondionmu.

³Jop sajo do rohangku di parlalu ni angka deba dongan na paboahon taringot tu ngolumunu na tongtong di bagasan hasintongan, jana tutu do ho sai mardalan di bagasan hasintongan.

⁴Nada adong jop ni rohangku na gumodang di balik ni on, muda hubege na mardalan do dakdanakku di bagasan hasintongan i.

⁵Ale dongan na huhaholongi! Na burju do ho di pambaenanmu na nibaenmi tu angka dongan dohot tu angka halak na asing.

⁶Madung disaksihon halahi tu parlagutan na dison taringot tu holong ni rohamu. Cubo ma jolo mangurupi halahi anso tarpatorus halahi pardalanan ni halahi. Dalan na pasonangkon roha ni Debata ma baen patuluskon i.

⁷Dibaen hara ni goarNia do kehe halahi, jana nada dijagit halahi bagi aha pe sian angka halak na so mananda Debata.

⁸Antong, tama do tajagit halak na songon i, anso gabe dongan saparkarejoan ni halahi hita di hasintongan i.

⁹Madung hubaen sada surat na pendek tu parlagutan i, hape nada ra si Diotrefes na marpor ni roha gabe pamimpin ni parlagutan i mangihutkon na hudok.

¹⁰Muda ro au bagi na andigan, hataanku do taringot tu pambaenannia, i ma taringot tu angka pangalaho na jat dohot gabus na nihatahonnia taringot tu hami! Tapi nada tuk dope i disia. Dompak na ro angka dongan Kristen i, nada ra ia manjagitsa. Diantahi ia muse dope halak na ra manjagit angka dongan i jana disuru ia anso morot halahi sian parlagutan i.

¹¹Dongan na nihaholongan! Ulang ma tiru hamu na jat i. Na denggan i ma tiru hamu. Sanga ise na mambaen na denggan, sian Debata do ro ni i. Jana halak na mambaen na jat, na so padumpang dope i dohot Debata.

¹²Sude do halak mamuji si Demetrius. Sian jamita na sintong na sian Debata pe tarpuji do ia. Hami pe dohot do mamuji ia jana diboto hamu do, tutu do pamujinami i.

¹³Bahat dope nian sidokkononku tu ho, tapi dumenggan do huhilala ulang pola markite-hite surat.

¹⁴Didok rohangku nada pola sadia honok nari marsuo ma au dohot ho, disi ma hita na dua mangkobari.

¹⁵Hasonangan ma di ho! Palalu tabe do angka dongan sian on di ho. Palalu ma tabengku tu sude angka donganta marsada-sada.