Read Batak Angkola JUDAS 1 Bible Online

JUDAS 1 - Batak Angkola bible

JUDAS 1

¹Sian si Judas naposo ni Jesus Kristus, anggi ni si Jakobus, tu angka halak na tarpio jana na nihaholongan di bagasan Debata Ama, jana na nijagohon ni Jesus Kristus.

²Mararop roha do au pasupasuon ni Debata hamu jana lehenonna asi ni roha dohot hasonangan mardapot-dapot di hamu.

³Angka dongan na nihaholongan! Tutu situtu do ringgas do rohangku mambaen surat on tu hamu taringot tu haluaan na dung tadalani i. Tapi saonnari taronjar do rohangku paingot hamu markite-hite surat on anso laing torus hamu marjuang hara ni haporsayaan i na nilehen tu angka halak na badia.

⁴Angke madung adong masuk tu tonga-tonganta sian angka halak na so porsaya so sian pamotoanta. Dipabalik-balik halahi do jamita taringot tu asi ni roha ni Tuhanta i, anso tarbaen halahi patuluskon angka parange ni halahi na so ture. Jana na so ra do halahi mangoku paboa Jesus Kristus do Parkuaso dohot Tuhanta na sasada i. Mamungka sian nahinan madung dipaboa hian di Buku Na Badia i uhuman na tu halahi.

⁵Madung diboto hamu i sudena. Tapi haru songon i pe laing hupaingot ma hamu taringot tu dalan na nibaen ni Tuhan[1] laho paluahon bangso Israel sian tano Mesir, tapi dung salpu i, diragehon Ia do sanga ise angka na so porsaya sian halahi.

⁶Laing ingot hamu ma angka surusuruan na so mangargahon jabatan ni halahi, na gabe kehe halahi manadingkon ingananna. Dipasung Debata do angka surusuruan i dohot hayu na so ra sego salolot-lolotna, di inganan na golap situtu. Torus ma halahi disi ditahan lopus nidabu uhum tu halahi di Ari na godang i.

⁷Laing ingot hamu ma kota Sodom dohot Gomora dohot angka kota na humaliang i, na niinganan ni halak angka na mambaen pangalaho songon na nibaen ni angka surusuruan i. Angka pangalaho na rorang dohot na mangoloi hagiot ni sibukna do dipambaeni halahi, gabe hona uhum ma halahi dohot api na so ra mintop, baen sipaingot tu halak sudena.

⁸Laing dohot dalan na songon i muse ma angka halak na manyisip masuk tu tonga-tonganta na mambaen dosa tu pamatang ni halahi sandiri hara ni angka nipina. Layas do diida halahi kuaso ni Debata jana dipabile halahi do angka na sangap na di banua ginjang i.

⁹Tapi si Mikael sandiri kapala ni angka surusuruan i nada jungada dibaen ia songon i. Di na marsalisi ia sanoli dohot Sibolis i hara ni bangke ni si Musa, nada puluk si Mikael mandok hata pincang-pincang laho manguhumi Sibolis i. Hum on sajo do didok si Mikael, “Sai dipincang Debata ma ho!” ning ia.

¹⁰Tapi anggo halahi, mardongan hata incak dialo halahi do sanga aha na so niastuan ni halahi. Tarsongon binatang na so marroha do halahi, na mangastui angka pangalaho hum hara ni bakona sajo. Hape angka na songon i do mambaen hamamago tu halahi.

¹¹Marjaya ma halahi! Dalan ni si Kain do na nibolus ni halahi. Anso dapotan upa, gabe didohoti halahi do angka hasalaan songon na nibaen ni si Bileam. Jana mago do halahi hara ni na manggaori songon na nibaen ni si Kora.

¹²Muda hatiha mambaen pesta parjamuan hamu, laing halahi ma tongtong na mambaen tilako di hamu. Angke nada adong ila ni roha ni halahi, na songkal jana na pamokmokkon dirina. Songon ombun na niombuskon ni alogo do halahi, hape nada parohon udan. Laing songon suan-suanan do halahi na so marbatu haru pe madung dapot musimna; songon suan-suanan na niumpat do halahi gabe rahar.

¹³Laing tarsongon ombak ni laut na margubo-gubo, laing songon i ma halahi paila-ilahon markite-hite angka parange ni halahi. Songon angka binatang na mardalan di ramba i do halahi jana na dung diparade Debata do inganan di halahi salolot-lolotna di hagolapan na jumorbut.

¹⁴Jungada do didok si Henokh pomparan ni si Adam na papitu sundutkon taringot tu halak sisongon on. Didok ia, “Ligi da, na giot ro do Tuhan mardongan angka surusuruanNia na marribu-ribu

¹⁵laho manguhumi halak sudena. Dabuhonon ni Tuhan ma uhuman hara ni angka pambaenan ni angka jolma na so porsaya tuSia. Jana laing dabuhononNia ma uhuman hara ni sudena angka hata pangincahion na nipardokkonan ni angka halak pardosa na jahat tuSia!”

¹⁶Hum na mungut-ungut do halahi dohot na manyolsoli hara ni bagianna, na mardalan mangihutkon giot-giot ni sibukna mambaen dosa. Na pujian halahi di diri ni halahi, jana dipanggar-panggar halahi ma halak anso dapotan untung halahi.

¹⁷Tapi anggo hamu ale dongan na nihaholongan, ingot hamu ma sanga aha na nidok ni angka rasul ni Tuhanta Jesus Kristus hian najolo.

¹⁸Madung dipaboa halahi hian tu hamu, marroan do angka halak na mangincahi hamu marayak dapot ari na parpudi; i ma angka na mangolu mangihutkon giot-giot ni halahi sandiri na jat i.

¹⁹Angka halak on ma na mamola-mola jana na nirajaan ni angka hagiotna sandiri. Angka na so maruli Tondi Parbadia do halahi.

²⁰Tapi anggo hamu ale angka dongan, tambori hamu ma ngolumunu mardongan haporsayaan tu Tuhan; ias sun do haporsayaanmunu i. Laing martangiang ma hamu mardongan kuaso ni Tondi Parbadia

²¹jana sai mardongan holong na sian Debata ma hamu mardalan di ngolu on salolot mararop ni roha hamu di asi ni roha ni Tuhanta Jesus Kristus na giot mangalehen ngolu na manongtong di hamu.

²²Maribo ni roha ma hamu maradopkon sanga ise halak na laing ganggu dope rohana.

²³Palua hamu ma halak sian api. Maradopkon angka halak na asing sian i pe laing maribo ni roha ma hamu mardongan biar, tapi hagigihon hamu ma anggo pakean ni halahi na hodar dibaen angka hagiot ni halahi na mardosa i.

²⁴Debata do na margogo manjagohon hamu, anso ulang tinggang, jana na pajongjongkon hamu di adopan ni hasangapanNia di bagasan jop ni roha, jana nada martihas.

²⁵Di Debata na sasada i, Sipalua hita markite-hite Jesus Kristus, Tuhanta i, diSia ma hasangapan, hagodangan, hagogoan dohot kuaso sian mula ni mulana, saonnari ro di salolot ni lolotna! Amen.