Read Batak Angkola RUT 3 Bible Online

RUT 3 - Batak Angkola bible

RUT 3

¹Dung adong sadia lolot, didok si Naomi ma tu si Rut, “Angkon usahahononku do anso laing marbagas ho mangulahi, anso tarbaen ho muse adong rumahtanggamu sandiri.

²Inda he rap markarejo dohot angka dadaboru i ho di ladang ni si Boas? Jadi sisolkotta do anggo si Boas. Antong, tangihon ma! Andospotang on na giot kehe do ia markarejo mamaspas burir-burir.

³Jadi hara ni i maridi ma ho, pake ma pakeanmu na jegesna i jana baen ma saotik miak wangi. Dung i kehe ma ho tu inganan ni si Boas na mambanting burir-burirna i. Disi ma ho lopus sidung ia mangan dohot minum. Tapi ulang jabat habotoan tusia na disi ho.

⁴Pamanat ma sanga na di dia ia modom. Muda dung tarpodom ia, kehe ma ho tusi jana buka ma ulosna i, lalu papodom ma di lambung ni patna i.[4] Jadi, udut ni i naron paboaonnia ma tu ho sanga na aha sibaenonmu.”

⁵“Olo namboru,” ning si Rut mangalusi, “hupatulus pe sude na nidok ni namboru i.”

⁶Jadi kehe ma si Rut tu inganan ni na markarejo mambanting burir-burirna i. Dipatulus ia ma disi sude na nidok ni namborunia i tusia.

⁷Dung sidung si Boas mangan dohot minum di bagasan jop ni roha kehe ma ia modom tu inganan panimbunan ni burir-burir i. Sip-sip ma ro si Rut mambuka ulos ni si Boas, lalu dipapayak ia ma di lambung patna i.

⁸Tonga borngin i ompot ma si Boas tarsunggul boti laho pabalikkon pamatangnia. Tarsonggot ma ia di hatiha i marnida sada anak boru modom disi.

⁹“Ise dehe ho,” ning ia marsapa. “Si Rut do au, amang!” ninna si Rut mangalusi. “Kahangginami na solkot do ho amang, angkon martanggung jawab do ho di ngolungku. Jadi tama do buatonmu au antong gabe ripemu.”

¹⁰“Dipasupasu TUHAN do ho Rut,” ninna si Boas. “Saonnari tumangkas dope holong ni rohamu tu kahanggimu ulang pado na dung nibaenmu tu namborumi. Na tola do ho manjalahi halaklahimu na poso sian tonga-tonga ni na kayo sanga na pogos, hape nada songon i dibaen ho.

¹¹Hara ni i, ulang ho gamang, Rut. Hupatulus pe na nipangidomi; angke madung sude halak na sahuta on mamboto bahaso ho sada anak boru na burju do.

¹²Tutu do i nian, angkon martanggung jawab do au salaho tu ngolumu, angke kahanggimu na solkot do au. Tapi laing adong dope sada halak na asing na angkon martanggung jawab tu ngolumu. Jana kahanggi na sumolkot dope ia ulang au.

¹³Di borngin on, laing tinggal ma ho dison; ancogot ma tasihiri betak na ra do ia padalan tanggung jawabna i maradopkon ho, sanga nada. Muda ra do ia antong, denggan; tapi muda nada ra ia, marjanji ma au mangasahon Debata na mangolu i bahaso na padalanonku tanggung jawab i. Antong, saonnari laing modom dison ma ho lopus manyogot.”

¹⁴Jadi modom ma si Rut disi di lambung pat ni si Boas. Tapi sogot sajo dope ngot ma si Rut taran golap dope anso ulang adong halak midaan ia. Angke giot ni si Boas ulang adong sahalak pe na umboto bahaso na ro si Rut tu inganan i.

¹⁵Didok si Boas ma tu si Rut, “Palua ma salendangmi jana pahembang ma dison.” Jadi ditalduskon si Rut ma salendangnia i jana dipahembang ia. Dung i diduruskon si Boas ma tu salendang i burir-burir hira-hira dua pulu kilogram, lalu ditolong ia si Rut laho mangangkat tu abarana i. Dung i mulak ma si Rut tu kota.

¹⁶Dung lalu ia di bagas disapai namborunia i ma, “Aha do kabar, maen?” Jadi dicaritohon si Rut ma tusia sudena na nipatupa ni si Boas tusia.

¹⁷“Boti,” ning si Rut paudutkon, “ia do mangalehen burir-burir on sudena tu au, angke pandoknia nada tola rumar tanganku mulak.”

¹⁸Jadi didok si Naomi ma, “Painte ma da, Rut, lopus idaonmu sanga songon dia ujung ni pangalaho on sanoli on. Nada pasoon ni si Boas be pangalaho on painte so jolo sidung.”