Read Batak Angkola 1 SAMUEL 1 Bible Online

1 SAMUEL 1 - Batak Angkola bible

1 SAMUEL 1

¹Adong ma sada bayo na margoar si Elkana, sian Marga Efraim. Maringanan di kota Rama na di pardolohan Efraim do ia. Si Elkana on i ma anak ni si Jeroham jana pahompu ni si Elihu. Masuk tu horong Tohu jana masuk tu Marga Zup.

²Dua halak dadaboru ni si Elkana, i ma si Hanna dohot si Penina. Adong do anak ni si Penina, tapi anggo si Hanna nada adong.

³Ganop taon do si Elkana ro sian Rama giot maribadat di Silo dohot manghaulkon haul tu TUHAN Na Markuaso i. Na gabe malim ni TUHAN di Silo, i ma si Hofni dohot si Pinehas anak ni si Eli.

⁴Ganop kehe si Elkana manghaulkon haul, dilehen ia do juhut ni haul i di si Penina dohot di sude anaknia i.

⁵Tapi laing dilehen ia muse do deba di si Hanna, angke sun do holong ni roha ni si Elkana tusia, haru pe na so dilehen TUHAN anak disia.

⁶Sai na dipahancit ni si Penina do roha ni si Hanna jana diincahi ia imbangnia i hara ni na so dilehen TUHAN anak disia.

⁷Sai songon i ma na masa sian taon tu taon; sai marpupu ma i ganop kehe halahi tu Bagas Ni Debata, dipahancit si Penina ma roha ni si Hanna. Jotjot do tangis si Hanna jana nada ra ia mangan hara ni na dipalayas.

⁸Jana sai marpupu ma disapai si Elkana halaklahinia, “Biasi dehe sai tangis ho Hanna? Biasi nada ra ho mangan jana sai marsak ho? Nada he ummarga do au di ho ulang pado sampulu anak halaklahi?”

⁹Sanoli dung mangan halahi di Bagas Ni TUHAN di Silo, jongjong ma si Hanna. Topet hatiha i juguk Malim Eli di karosinia di lambung pintu.

¹⁰Marsak sajo roha ni si Hanna, jana martangiang ma ia tu TUHAN lalu tangis panguncombopon.

¹¹Dung i didok si Hanna ma janji, “O TUHAN Na Markuaso, parrohahon ma naposoMon! Ligi ma pardangolankon. Ingot ma jana ulang halupahon au! Muda dilehen Ho di au sada anak halaklahi, marjanji ma au mangalehensa tu Ho salolot ia mangolu, jana obukna pe nada unjung tola gotapon.”

¹²Honok sajo do si Hanna na martangiang i, jana diparrohahon si Eli do pamangan ni anak boru i.

¹³Martangiang di bagasan roha do si Hanna, jadi hum bibirnia do na mubit-ubit, tapi anggo sorania nada tarbege. Jadi gabe diambang si Eli do ia na mabuk.

¹⁴Jadi gabe didok si Eli ma tusia, “Ulang ho sai mabuk dison! Ulang be pupu na minum anggur!”

¹⁵Tapi dialusi si Hanna ma, “Nada na mabuk au da amang, nada adong minum anggur au! Na marsak situtu do au, tapi na martangiang do au paboahon pardangolanku tu TUHAN.

¹⁶Ulang antong dietong au dadaboru na so hasaya. Hara ni marsak ni rohangku do dibaen na martangiang au songon on.”

¹⁷Dung i ninna si Eli ma, “Antong anggo songon i do, mulak ma ho dibagasan sonang. Sai dipatulus Debata ni Israel ma nian pangidoanmi.”

¹⁸Dialusi si Hanna ma, “Sai tumbuk ma iba nian di rohamunu amang.” Dung i kehe ma ia, lalu mangan jana nada be marsak ia.

¹⁹Ancogotna i manyogot-nyogot dope, ngot ma si Elkana dohot dongan sabagasnia jana dung salpu maribadat tu TUHAN mulak ma halahi tu Rama. Jana rap ma si Elkana dohot si Hanna dadaborunia i, jana tulus ma dibaen TUHAN tangiang ni si Hanna i.

²⁰Denggan ma pamatang ni Hanna jana sorang ma anakna halaklahi. Dibaen ia ma goarna si Samuel,[1] angke didok ia, “Na hupangido do ia sian TUHAN.”

²¹Dapot ma hatihana di si Elkana dohot dongan sabagasna laho kehe tu Silo mangulahi laho manghaulkon haul siganop taon tu TUHAN. Tamba ni i na dung marjanji do si Elkana laho manghaulkon haul na dumenggan.

²²Tapi anggo sanoli on nada dohot si Hanna. Didok ia tu halaklahinia i, “Disi mantak managuk si Samuel taruhononku ma tu Bagas Ni TUHAN, jana disi ma ia maringanan salolot mangolu.”

²³Dialusi si Elkana ma, “Antong denggan, patulus ma sanga aha na denggan diida ho; di bagas ma ho lopus mantak managuk anakta i. Jana sai tulus ma janjimi dibaen TUHAN.” Jadi laing di bagas ma si Hanna tinggal lopus mantak managuk anaknia i.

²⁴Dung mantak managuk si Samuel, ditaruhon inangnia ma ia tu Bagas Ni TUHAN di Silo, haru pe laing menek sajo dope ia. Dioban si Hanna muse ma sada lombu jantan na marumur tolu taon, topung sakaleng dohot sada kantongan na gok marisi anggur.

²⁵Disambol ma lombu i jana ditaruhon ma si Samuel tu si Eli.

²⁶Dung i didok si Hanna ma tu si Eli, “Santabi amang. Diingot amang dope ulaning au? Au do dadaboru na niida ni amang jongjong dison, topet martangiang tu TUHAN.

²⁷Na mangido dakdanak on do au tu TUHAN, jana madung ditangihon Ia pangidoanki.

²⁸Jadi hara ni i, hupasahat ma dakdanak on tu TUHAN anso gabe Ia nampunasa salolot mangolu.” Dung i marsomba ma halahi tu TUHAN.