Read Batak Angkola 1 SAMUEL 11 Bible Online

1 SAMUEL 11 - Batak Angkola bible

1 SAMUEL 11

¹Dung i ro ma si Nahas, raja ni Amon, diarahon ia ma tentarania manghobuk kota Jabes na di tano Gilead. Dipalalu halak Jabes ma usul songon i tu si Nahas, “Baen ma parjanjian dohot hami, jadi gabe tunduk ma hami tu ho.”

²Dialusi si Nahas ma, “On ma saratna anso ra au mambaen parjanjian, ‘Pulsikkononku ma sude mata siamunmunu songon habilean maradopkon sude Israel!’ ”

³Dung i dialusi angka pamimpin ni kota Jabes ma, “Lehen ma hatiha di hami pitu ari honokna anso sanga suruonnami utusan tu sude tano Israel. Muda nada adong na ra mangurupi hami, jadi gabe sahat di ho ma hami.”

⁴Songon i ma dalanna lalu ma angka utusan i di Gibea, inganan ni si Saul. Di na palaluhon barita i halahi martangisan ma bangso i hara ni marsak ni rohana.

⁵Na baru mulak sian ladangna dope hatiha i si Saul maroban lombuna. Disapai ia muse ma, “Aha na masa? Biasi martangisan halak sude?” Dung i dipaboa ma tusia barita na nioban ni utusan na sian Jabes.

⁶Umbege i manigor digohi Tondi Ni Debata ma si Saul, jana tarrimas situtu ma ia.

⁷Hara ni muruknia dibuat ia ma dua lombu lalu digotap-gotap ia marlobong-lobong. Dung i ditongoskon ia ma lobong-lobongna i tu sude tano Israel mardongan parenta songon on, “Sanga ise na so dohot marporang mangihutkon si Saul dohot si Samuel, gotap-gotapon ma lombuna laing songon on!” Mabiar ma bangso Israel betak na aha na giot baenon ni TUHAN, jadi rap dohot ma sude halak nada adong na so dohot.

⁸Dipalagut ma halahi jana dietong di Besek: Adong ma 300.000 halak sian halak Israel jana 30.000 halak sian Juda.

⁹Dung i dipabotohon ma tu utusan na sian Jabes songon on, “Paboa ma tu halak Jabes, ancogot painte so kotu, manjagit pangurupi ma halahi.” Di na nijagit ni halak Jabes tona i, sun ma moga ni halahi.

¹⁰Didok halahi ma tu si Nahas, “Ancogot ma hami sahat tu ho, disi pe roha-rohamu ma baen tu hami.”

¹¹Ancogotna i, manyogot-nyogot, dibagi tolu si Saul ma angka parangannia i. Jana painte so bincar mataniari diroro halahi ma tu tonga-tonga ni parbandaran ni parangan Amon i mamorangi halahi. Painte so kotu, madung dibunui halak ni si Saul musu i. Halak Amon na sanga malua masarsar be ma i lopus nada adong tarbaen mardua-dua rap marlojong.

¹²Dung i marsapa ma halak Israel tu si Samuel, “Di dia ma he angka jolma na puluk i mandok na so tumbuk si Saul gabe rajanta? Pasahat ma tu hami halakna i anso hami bunu.”

¹³Tapi didok si Saul ma, “Sada halak pe nada tola bunuon di ari sadari on, angke madung dipalua TUHAN Israel di ari sadari on.”

¹⁴Dung i didok si Samuel ma tu halahi, “Beta ma kehe hita sude tu Gilgal jana taojakkon ma sanoli nari si Saul songon rajanta.”

¹⁵Jadi gabe kehe ma halahi sude tu Gilgal jana diojakkon ma si Saul di inganan paribadatan i gabe raja. Dihaulkon halahi ma haul pardengganan jana dipestahon si Saul ma parasmian i dohot sude bangso Israel.