Read Batak Angkola 1 SAMUEL 12 Bible Online

1 SAMUEL 12 - Batak Angkola bible

1 SAMUEL 12

¹Dung i mandok hata ma si Samuel tu sude bangso Israel, “Madung huoloi sude pangidoanmunu jana madung huangkat sada raja di hamu.

²Mamungka saonnari ia noma na mamimpin hamu. Anggo au madung matobang. Madung lolot sajo au mamimpin hamu — sian haposoonku dope lopus saonnari. Angka dakdanakku na dung magodangi i ma tandana.

³Saonnari jongjong au di jolomunu! Ampot adong hasalaan na hubaen, tudu hamu ma au di adopan ni TUHAN dohot di jolo ni raja na nipiliNia i. Jungada dehe au mambuat lombu sanga halode ni halak na asing? Unjung dehe au manipu sanga mamparkanciti sanga manjagit hepeng sogok? Dokkon hamu ma, anso hupaulak sanga aha na hubuat i.”

⁴Dialusi angka jolma i ma, “Nada adong, nada jungada ho amang manipu sanga mamparkanciti hami; nada unjung ho amang mambuat sanga aha nampuna ni sanga ise pe.”

⁵Dung i didok si Samuel ma, “Di ari sadari on, TUHAN ma saksina dohot raja na nipiliNia i bahaso na so hadapotan au marsala saotik pe.” “Olo, TUHAN ma saksina,” ning halahi mangalusi.

⁶Dung i didok si Samuel ma muse, “TUHAN do na mamili si Musa dohot si Harun dohot na maroban ompumunu haruar sian Mesir.

⁷Saonnari, ulang jolo hamu kehe. Giot tuduonku hamu di adopan ni TUHAN. Ingot hamu ma habasaon ni TUHAN na nipatuduhonNa i tu hamu dohot tu ompumunu.

⁸Di na ro si Jakob dohot dakdanakna tu Mesir, jana dipisat halak Mesir halahi, mangido tolong do ompumunu i tu TUHAN, jadi gabe disuru TUHAN ma si Musa dohot si Harun. Sidua halak i ma na maroban ompumunu sian Mesir dohot na mangurupi halahi gabe maringanan di luat on.

⁹Hape di pudi ni ari dihalupahon halahi ma TUHAN, Debata ni halahi, jadi hara ni i gabe dipadiar Ia halahi diporangi dohot ditaluhon si Sisera, panglima ni tentara ni Hasor dohot tu halak Pilistin maradu raja ni Moab,

¹⁰dung i martangiang ma halahi tu TUHAN lalu mangoku, ‘Madung mardosa hami hara ni na marbalik sian Ho, ale TUHAN, jana hami somba angka patung ni Debata Baal dohot Astoret. Tapi saonnari, palua ma hami sian musunami, gabe mangoloi tu Ho ma hami!’ ”

¹¹Dung i disuru TUHAN ma si Jerubaal (Gideon), dung i si Barak, dung i si Jefta jana ujungna au. Madung hami palua hamu sian musumunu, lopus tarbaen sonang ngolumunu.

¹²Tapi di na niidamunu giot ro si Nahas raja ni Amon mamorangi hamu, ditulakkon hamu do TUHAN na gabe rajamunu jana didok hamu tu au, ‘Giotnami, adong ma raja na mamarenta hami.’

¹³“Saonnari ligi hamu ma, on ma ibana raja na nipilimunu i. Na nipangidomunu do i, jana madung dilehen TUHAN di hamu.

¹⁴Martua ma hamu muda dipasangap hamu TUHAN i jana mangoloi hamu tuSia bope ditangihon jana dioloi hamu parentaNia, lumobi muda hot hamu dohot rajamunu i mangihut di TUHAN Debatamunu i.

¹⁵Sabalikna, muda nada ditangihon hamu TUHAN i, mur dialo hamu parentaNa, pasti do aloon ni TUHAN hamu dohot rajamunu i.

¹⁶Saonnari ulang jolo hamu kehe! Parate-atehon hamu ma hahomangan godang na giot sibaenon ni TUHAN di jolomunu.

¹⁷Pio-pio ma au tu TUHAN, jana haru pe logo ni ari di hatiha on, paroon ni TUHAN ma ronggur dohot udan na gabe songon alus ni tangiangki. Di ombas i, torang ma botoonmunu na godang do hape dosamunu maradopkon TUHAN hara ni na mangido sada raja hamu.”

¹⁸Dung i martangiang ma si Samuel jana laing di ari i diparo TUHAN ma ronggur dohot udan. Mabiar be ma sude bangso i tu TUHAN dohot tu si Samuel.

¹⁹Gabe didok halahi ma tu si Samuel, “Tolong ma amang, tangiangkon ma hami on tu TUHAN Debatami, anso ulang mate hami. Saonnari torang ma hami boto, asing sian dosanami, madung mardosa muse hami hape hara ni na mangido sada raja.”

²⁰Gabe dialusi si Samuel ma, “Ulang hamu mabiar, haru pe na dung dibaen hamu hajahatan i, ulang ma hamu marbalik sian TUHAN, tapi sai tongtong ma hamu mangoloi tuSia sian sandok rohamunu.

²¹Ulang antong ihutkon hamu angka debata na so tarbaen mangurupi dohot paluahon hamu, angke na so tutu do adong halahi.

²²Madung disumpahon TUHAN bahaso na so tadingkononNia hamu angke madung diputuskon Ia do laho mambaen hamu gabe bangsoNia sandiri.

²³Anggo salaho tu au, sai ulang nian mardosa au maradopkon TUHAN hara ni na maradian au manangianghon hamu. Tapi sai na pupuonku do torus mangajarkon tu hamu angka pangalaho na denggan dohot na tigor na giot si karejohononmunu.

²⁴Pasangap hamu ma TUHAN i jana mangoloi tuSia ma hamu di bagasan na tigor dohot sian sandok rohamunu. Ingot hamu ma angka pangalaho na godang na dung dibaen Ia di hamu.

²⁵Tapi muda sai dipupu hamu do mambaen dosa, mago do hamu dohot rajamunu.”