Read Batak Angkola 1 SAMUEL 13 Bible Online

1 SAMUEL 13 - Batak Angkola bible

1 SAMUEL 13

¹Dung gabe raja si Saul,[5]

²dipili ia ma tolu ribu halak, jana dua ribu ma i tinggal dohot ia di Mikmas dohot di luat partoran Betel, anggo na saribu nari kehe ma i dohot si Jonatan anaknia i tu Gibea, na di luat ni Marga Benyamin. Rayat lobina i dipaloas ia ma mulak tu bagasna be.

³Dung i ditaluhon si Jonatan ma tentara ni Pilistin i di Geba, jana tarbege ma i tu bangso Pilistin. Dung i disuru si Saul ma mamalu sarune di sandok luat laho marpio halak Ibrani anso ro marporang.

⁴Dipabotohon ma tu sandok bangso Israel bahaso na dung dibunu si Saul panglima ni Pilistin dohot na goyak sajo roha ni halak Pilistin di halak Israel. Jadi gabe dioloi rayat i ma pio-pio i laho mardomu rap dohot si Saul di Gilgal.

⁵Laing marlagut muse ma di hatiha i halak Pilistin laho mamorangi halak Israel; adong do tolu pulu ribu[6] kareta porang ni halahi, onom ribu halak na markudo, jana angka parajurit songon bahat ni horsik na di topi ni laut. Kehe ma halahi marbandar di Mikmas di Habincaran ni Bet-Awen.

⁶Dung i dipungka halahi ma mangaroro marsitutu mamorangi halak Israel, jabat do tarsosak situtu halak Israel. Deba sian halahi martabuni ma di gua dohot di liang ni dolok sanga di rigang ni batu mamak, sanga di bagasan sumur dohot di lubang ni tano,

⁷adong muse ma i na manaripari Batang aek Jordan lalu masuk tu Luat Gad dohot Gilead. Anggo si Saul laing di Gilgal dope, jana anggo rayat na mangihutkon ia ma humitir mabiar.

⁸Pitu ari honokna si Saul paintehon si Samuel, songon na nitonahon ni si Samuel hian tusia, hape laing so lalu dope si Samuel di Gilgal, hape ma mamungka markehean rayat i manadingkon si Saul.

⁹Jadi gabe didok ia ma tu halahi, “Oban hamu ma tuson haul situtungon dohot haul pardengganan i.” Lalu ia sandiri noma manghaulkon haul situtungon i.

¹⁰Tapi apala hum sidung dikarejohon ia i, ro ma si Samuel. Dialo-alo si Saul ma ia laho manjalangsa,

¹¹tapi marsapa ma si Samuel, “Aha dehe na nibaen ni raja i?” Dialusi si Saul ma, “Huida madung mamungka ditadingkon rayat i au, hape laing nada ro amang di hatiha na dung ditontuhon. Boti muse madung marlagut halak Pilistin di Mikmas.

¹²Jadi ning rohangku, ulang-ulang santongkin nari ro ma tentara ni Pilistin mangaroro au di Gilgal on, hape na so mangido ibo ni roha dope au sian TUHAN. Jadi hara ni i ma gabe hubuat ma haputusan laho manghaulkon haul i.”

¹³Umbege i gabe didok si Samuel ma tu si Saul, “Santak do bodona na nibaen ni raja i. Sugari sura dioloi raja i parenta ni TUHAN Debata na tu raja i, pasti do pahoton ni TUHAN raja i dohot pomparan ni raja i di Israel salolot-lolotna.

¹⁴Hape anggo saonnari nada martahan raja i mamarenta. Dibaen nada diihutkon raja i parenta ni TUHAN, gabe dipili TUHAN ma halak giot ni rohaNa sibaenon raja di bangsoNia.”

¹⁵Dung i kehe ma si Samuel sian Gilgal jana dipatorus ia ma pardalanannia tu Gibea na di Luat Benyamin. Si Saul pe dipareso ia ma parangannia, onom ratus halak bahatna.

¹⁶Songon i ma si Saul dohot si Jonatan anaknia i dohot anak bua ni halahi i marbandar di Geba na di Luat Benyamin; tapi anggo halak Pilistin marbandar di Mikmas do.

¹⁷Laing di hatiha i kehe ma tolu rombongan halak Pilistin pangarampas sian parbandaran ni Pilistin i laho mangaroro marporang; sada rombongan kehe tu Ofra di Luat Sual,

¹⁸rombongan na paduahon mandapotkon Bet-Horon, jana rombongan na sada nari mandapotkon batas na mangadop tu Rura Zeboim dohot halongonan.

¹⁹Nada adong dapot tukang bosi anggo di Israel sudena, harana nada dipaloas halak Pilistin mambaen podang dohot tombak halak Israel.

²⁰Jadi angkon tu halak Pilistin do kehe halak Israel muda giot manggarut mata ni tinggalana, pangkurna, patona dohot sasabina;

²¹sangkoping hepeng na menek ma upana manggarut pato dohot padenggankon parkokas ni pamacu ni lombu, jana duakoping hepeng menek ma muda manggarut mata ni tinggala sanga pangkur.

²²I ma dalanna umbaen na so adong sahalak pe sian halak Israel di ari parporangan na di Mikmas i na marpodang sanga martombak, asing sian si Saul dohot si Jonatan anakna i.

²³Dibaen halak Pilistin do sada benteng laho mampartahankon rigang ni dolok na di Mikmas.