Read Batak Angkola 1 SAMUEL 14 Bible Online

1 SAMUEL 14 - Batak Angkola bible

1 SAMUEL 14

¹Sanoli didok si Jonatan ma tu doli-doli sioban sinjatania, “Beta, kehe ma hita tu benteng ni Pilistin na di bariba an!” Hape nada mangido isin ia jolo sian amangnia i.

²Topet di toru bona ni dalimo na di Migron do si Saul hatiha i, nada sadia dao sian Gibea. Bahat ni rayat na mangihutkon ia adong do hira-hira onom ratus halak. (

³Malim na maroban efod si Ahiya do, anak ni si Ahitub; i ma anggi ni si Ikabod. Si Ikabod anak ni si Pinehas, jana si Pinehas anak ni si Eli, malim ni TUHAN na di Silo.) Rayat i pe nada adong na umboto na kehe si Jonatan sian i.

⁴Laho manjalahi benteng ni Pilistin i, angkon boluson ni si Jonatan do sada rigang ni batu na niantara ni dua batu mamak na margarigi; i ma na margoar Boses dohot Seneh.

⁵Batu mamak sabola Utara i mangadop tu Mikmas jana na sabola Selatan mangadop tu Geba.

⁶Jadi didok si Jonatan ma tu doli-doli i, “Beta tu benteng ni Pilistin kapir i. Betak na tolongan ni TUHAN do hita. Angke tarlehen TUHAN do hamonangan, marhite bahat halak bope marhite na saotik halak.”

⁷Dialusi doli-doli i ma, “Sanga aha pe na giot baenon ni tuan i, anggo au na mangihut sajo ma.”

⁸“Antong denggan,” ning si Jonatan. “Di na giot taripar hita, tapatidahon ma dirinta tu halak Pilistin i.

⁹Muda disuru halahi hita so jana tapainte lopus ro halahi mandapotkon hita, jadi gabe so ma hita torus di ingananta i, jana nada tulus taripar.

¹⁰Tapi muda disuru halahi do hita ro mandapotkon halahi, ro ma hita tusi, angke i ma tandana na dung dipasahat ni TUHAN halahi tu hita.”

¹¹Jadi di na nipatidahon ni halahi diri ni halahi tu benteng ni Pilistin i, didok halak Pilistin i ma, “Ligi ma, adong halak Ibrani na ruar sian lubang partabunian ni halahi!”

¹²Dung i pio-pio ma halahi tu si Jonatan dohot tu naposonia i, “Manangkok ma hamu tuson! Adong na giot patidahononnami tu hamu!” Dung i didok si Jonatan ma tu doli-doli i, “Ihutkon ma au, harana na dung dipasahat ni TUHAN do halahi tu Israel.”

¹³Martugarang ma si Jonatan diihutkon doli-doli i tu ginjang. Sanga na di dia muldop si Jonatan, disi muse ma halak Pilistin tinggang hona pukul dibaen ia, jana di pudinia manigor dibunu doli-doli i ma halahi.

¹⁴Di na mangaroro parjolo i, hona bunu si Jonatan dohot doli-doli i do hira-hira dua pulu halak di tano saparopat hektar bidangna.

¹⁵Gurgar halak Pilistin dibaen barita i di parbandaran dohot na di padang-padang. Gabe mabiar ma sude rayat ni Pilistin dohot angka na di benteng maradu angka rombongan ni pangarampas; salang tano i antong humutur jana masa hagaoron godang.

¹⁶Jadi diida tentara ni si Saul na marjago di Gibea na di Luat Benyamin dua halak Pilistin na marlojongi i pahae-pahulu marsitondong dalanna.

¹⁷Jadi gabe didok si Saul ma tu angka parangannia i, “Etong jolo sanga na sadia tentaranta jana pareso sanga ise na so dison.” Dipadalan halahi ma parenta i lalu habotoan ma na so disi si Jonatan dohot doli-doli sioban sinjatania i.

¹⁸“Oban ma efod i tuson,” ning si Saul tu Malim Ahia. (Di jolo ni halak Israel do dioban si Ahia di ari i, efod i.)

¹⁹Dompak mangkobari dope si Saul tu malim i, mur jebu ma hagaoron na di parbandaran ni halak Pilistin i, gabe didok si Saul ma tu malim i, “Nada sanga be hatiha mangido panogu-noguon sian TUHAN!”

²⁰Kehe ma manigor si Saul dohot angka parangannia i marporang. Diida halahi disi na masa do hagunturon di tonga-tonga ni halak Pilistin: Marsiporangan halahi jana marsibunuan.

²¹Angka halak Ibrani na maringanan di tano ni halak Pilistin dohot na dung mangihut tu tentara ni halahi, marbalik ma i jana marpungu tu si Saul dohot si Jonatan.

²²Songon i dohot halak Israel na martabuni di angka dolok ni Efraim na umbege na dung maporus halak Pilistin, dohot ma i marpungu lalu mamorangi halak Pilistin i.

²³Marporang ma halahi saginjang ni dalan lopus salpu Bet-Awen. Dipalua TUHAN ma Israel di ari i.

²⁴Di ari i, anggo halak Israel nada margogo be hara ni malena, angke madung disumpahon si Saul songon on, “Hona bura ma sanga ise na mangankon bagi aha di ari sadari on painte so palalu hosom au tu musungku.” Jadi hara ni i, umpe sahalak na mangan di na sadari i.

²⁵Jadi lalu ma halahi di sada harangan jana dapot halahi ma disi bahat sajo aer ni loba,

²⁶tapi sahalak pe nada adong na mangankon bagi na aha sian aer loba i, hara ni biarna hona bura ni si Saul.

²⁷Tapi anggo si Jonatan nada diboto ia na dung diancam ni amangnia do rayat i dohot bura; jadi disurduhon ia ma tungkot na niobannia i, jana disornomkon ia ma i tu asar ni loba i, lalu dibuat ia aerna i, dipangan ia. Manigor margogo ma dihilala ia.

²⁸Dung i adong ma sada halak tentara i na mandok tusia, “Anggo hami ma gale-gale hara ni malena. Hape diancam amanta hamu do hami dohot sumpa on, ‘Hona bura ma sanga ise na mangan di ari sadari on.’ ”

²⁹Dialusi si Jonatan ma, “Ma salputu do antong pambaen ni amangki maradopkon bangsonta! Ligi ma, margogo do au dung hupangan saotik aer ni loba i.

³⁰Sugari dipatola rayat i di ari on mangankon sipanganon na nirampasna i di na manaluhon musu i, pasti do umbahat halak Pilistin tarbunu hita!”

³¹Di ari i talu do halak Pilistin dibaen halak Israel dung marporang saginjang ni dalan na sian Mikmas lopus tu Ayalon. Hape dung salpu i songon i ma lojana,

³²jadi gabe marsibuat barang na nirampas sian musu ma halahi; dibuat halahi do lombu dohot biri-biri lalu disamboli halahi laing di inganan i jana dipangan halahi juhut na marmudar-mudar dope.

³³Jadi dipaboa ma songon on tu si Saul, “Rajanami, mardosa do rayat i tu TUHAN, dipangan halahi do juhut na marmudar.” “Na manghianat do hamu!” ning si Saul marsurak. “Gulang hamu ma jolo tuson sada batu na godang.”

³⁴Dung i didok ia muse dope tu angka jolma na maroban barita i, “Marserak ma hamu di tonga-tonga ni rayat i jana suru hamu ma halahi marsioban lombuna dohot biri-birina tuson anso disambol di ginjang ni batu on jana dipangan dison; jadi marhite na songon i nada be mangan juhut na marmudar be halahi jana nada be mardosa maradopkon TUHAN.” Laing di borngin i dioban rayat i ma angka na dirampas i jana disambol ma i disi.

³⁵Jadi dipajongjong si Saul ma langgatan di TUHAN; i ma langgatan na parjolo dipajongjong ia.

³⁶Dung i mandok hata ma si Saul tu parangannia i, “Beta ma taroro mangalo halak Pilistin borngin on lalu tarampasi lopus torang ari jana tabunu halahi sudena.” Dialusi halahi ma, “Dibaen raja i ma, sanga aha na denggan didok roha ni raja i.” Tapi didok malim i, “Jolo tapangido ma da panogu-noguon sian Debata.”

³⁷Lalu marsapa ma si Saul tu Debata, “Tola dehe au mangaroro halak Pilistin? PasahatonMu dehe halahi tu tangan ni Israel?” Hapengani nada dialusi Debata ia di ari i.

³⁸Jadi gabe didok si Saul ma tu angka pamimpin ni rayat i, “Ro ma hamu tuson, jana pareso hamu sanga dosa aha na dibaen sadari on.

³⁹Marjanji do au mangasahon TUHAN na mangolu i na dung mangalehen hamonangan tu Israel, bahaso angkon marutang hosa sanga ise na marsala haru pe i si Jonatan anakki.” Tapi sahalak pe nada adong na puluk mangalusisa.

⁴⁰Dung i didok si Saul ma tu sude bangso Israel, “Hamu sude jongjong sabola adu, jana au dohot si Jonatan jongjong sabola on.” Dialusi halahi ma, “Dibaen raja i ma da sanga dia na denggan didok roha ni raja i.”

⁴¹Dung i martangiang ma si Saul, “TUHAN, Debata ni Israel, biasi nada dialusi Ho au di ari sadari on? TUHAN, alusi ma au marhite angka batu na badia on. Muda di au do hasalaan i sanga di si Jonatan, alusi ma dohot Urim, tapi muda di bangsoMu Israel do hasalaan i, alusi ma dohot Tumim.” Jadi manudu tu si Saul dohot tu si Jonatan do hasalaan i; jadi di na songon i dipaboa ma na so marsala rayat i.

⁴²Dung i didok si Saul ma, “Tontuhon ma antara au dohot si Jonatan.” Jadi si Jonatan ma dipatorang marsala.

⁴³Dung i didok si Saul ma tu si Jonatan, “Aha lakna dibaen ho?” Dialusi si Jonatan ma, “Na hudai do saotik aer ni loba dohot ujung ni tungkotku; rade do au mate.”

⁴⁴Didok si Saul ma tusia, “Sai hona uhum ni Debata ma au anggo so mate hona uhum ho, Jonatan!”

⁴⁵Tapi mangkuling ma rayat i tu si Saul, “Angkon mate hona uhum ma he si Jonatan? Inda he ia na maroban hamonangan godang on? Nada! Marjanji do hami mangasahon TUHAN na mangolu i, na so tola agoan obuk sangkamata pe si Jonatan sian ulunia. Angke hara ni panolong ni TUHAN do umbaen na dapotan hamonangan ia di ari sadari on.” Songon i ma rayat i paluahon si Jonatan sian uhum hamatean.

⁴⁶Dung i mulak ma halak Pilistin tu tano ni halahi sandiri dibaen ma mantak si Saul mangkojar halahi.

⁴⁷Dung gabe raja si Saul di Israel, sai marporang do ia sanga na di dia mangalo sude musu ni Israel, i ma halak Moab, halak Amon, dohot halak Edom, angka raja ni Zoba dohot halak Pilistin. Sanga na di dia ia marporang, sai monang do ia.

⁴⁸Na barani do ia marporang jana ditaluhon ia do halak Amalek, lalu dipalua ia Israel sian kuaso ni pangarampas.

⁴⁹Angka anak ni si Saul, i ma si Jonatan, si Jiswi, dohot si Malkisua. Borunia siangkaan goarna si Merab, na paduahon si Mikal.

⁵⁰Dadaborunia goarna si Ahinoam boru ni si Ahimaas, panglima ni tentarania i ma si Abner anak ni si Ner, uda ni si Saul.

⁵¹Si Kis i ma amang ni si Saul dohot si Ner amang ni si Abner i ma anak ni si Abiel.

⁵²Salolot di ngolu ni si Saul sai marporang marsitutu do ia mangalo halak Pilistin. Jadi hara ni i ma, muda diida si Saul halak na gogo sanga na barani, manigor dibaen ia do i gabe tentarania.