Read Batak Angkola 1 SAMUEL 15 Bible Online

1 SAMUEL 15 - Batak Angkola bible

1 SAMUEL 15

¹Sanoli didok si Samuel ma tu si Saul, “Na nisuru ni TUHAN do au mangojakkon raja i gabe raja di Israel bangsoNa i. Jadi patutna ma nian tangihonon ni raja i parenta ni TUHAN Na Markuaso i.

²Giot uhumonNia do halak Amalek, hara ni na nialo ni ompu ni halahi halak Israel dompak na ro i sian Mesir.

³Antong, kehe ma ho jana porangi ma halak Amalek i jana segohon ma sandok arta ni halahi. Ulang adong tadingkon sanga na aha pe; bunu sude halaklahi, dadaboru, dakdanak dohot na baru sorang; lombu, biri-biri, unto dohot halode.”

⁴Jadi dihobasi si Saul ma tentarania lalu dietong ia ma i di Telaim; adong ma 200.000 halak tentara i sian Israel dohot 10.000 halak sian Juda.

⁵Dung i kehe ma si Saul rap dohot parangannia i tu kota Amalek jana diambat halahi ma musu i di rura.

⁶Ditongos ia muse ma tona paingotkon halak Keni, “Morot ma hamu jana tinggalkon hamu ma halak Amalek, anso ulang dohot hamu hona pusa baenonku rap dohot halahi, angke dipatuduhon ompumunu do najolo pardonganon tu halak Israel dompak na ro i sian Mesir.” Jadi morot ma halak Keni sian i.

⁷Dung i marporang ma si Saul dohot halak Amalek jana talu ma halahi dibaen ia di dalan na sian Hawila lopus tu Sur di Habincaran ni Mesir.

⁸Ditangkup ia ma Raja Agag, raja ni Amalek i, jana dibunu ma sude rayatna i.

⁹Tapi anggo si Agag dohot tentarana i ditangkup jana dipadiar ia do mangolu, songon i biri-biri dohot lombu na jeges-jegesna i, anak ni lombu dohot anak ni biri-biri na ummokmok, dohot sude na mararga; hum pahan-pahanan na so marguna dohot na so mararga sajo do na dimatehon.

¹⁰Dung i didok TUHAN ma tu si Samuel,

¹¹“Manyosal do Au dung Hubaen si Saul gabe raja, angke marbalik do ia sian Au, jana nada dipatulus ia na Huparentahon.” Muruk ma si Samuel jana saborngin i sai humolos ma ia tu TUHAN.

¹²Ancogotna i, manyogot dope, kehe ma si Samuel anso marsuo nian dohot si Saul. Dipaboa ma tusia bahaso na dung kehe si Saul tu kota Karmel jana dipajongjong ia disi sada batu parningotan disia, sian i torus ia tu Gilgal.

¹³Di na marsuo si Samuel dohot si Saul, didok si Saul ma tusia, “Sai dipasupasu TUHAN ma ho amang! Madung hupatulus parenta ni TUHAN i.”

¹⁴Tapi disapai si Samuel ma, “Antong anggo songon i, biasi adong hubege lombu marngoak dohot hambeng marbehek?”

¹⁵Dialusi si Saul ma, “Na nirampas sian halak Amalek do angka pahan-pahanan i. Angka biri-biri dohot lombu na jumeges madung dipambuati rayat i baen haul sihaulkonon tu TUHAN Debata. Tapi anggo lobina i, ma abis hami matehon.”

¹⁶Umbege i didok si Samuel ma, “Painte jolo santongkin. Giot paboaonku di raja i sanga aha na nidok ni Debata tu au na potangin.” “Dokkon ma,” ning si Saul.

¹⁷Didok si Samuel ma, “Inda he na dung gabe pamimpin raja i di angka marga ni Israel, haru pe na so porlu dietong raja i dirina? Na dung dipili ni TUHAN do raja i gabe raja di Israel,

¹⁸boti muse na disuru ni TUHAN do raja i mamusa halak Amalek na jahat i. Disuru TUHAN raja i marporang mangalo halahi lopus abis halahi.

¹⁹Biasi nada tunduk raja i diparenta ni TUHAN? Biasi marribur-ribur raja i mambuati barang rampasan? Jana marhite pambaenan na songon i do na gabe muruk roha ni TUHAN?”

²⁰Dialusi si Saul ma, “Madung huoloi na niparentahon ni TUHAN, jana kehe do au hombar tu parsuruNa tu au. Hutaban do si Agag raja ni Amalek i jana madung hubunu sude halak Amalek.

²¹Tapi anggo paranganki, madung dipilii halahi biri-biri dohot lombu na dumenggan sian angka na hona rampas i baen sihaulkonon di Gilgal gabe haul tu TUHAN Debatami.”

²²Tapi didok si Samuel ma, “Dia do na jumop roha ni TUHAN, pangoloion tu TUHAN do ulang pado na manghaulkon haul? Marpangoloion tu Tuhan, dumenggan do i sian na manghaulkon haul. Dumenggan do i sian tabo-tabo ni biri-biri.

²³Angke na mangalo tu TUHAN tudos tu na padalan aji do jahat ni i jana hatangkangon sarupa do jahat ni i tu na manyomba debata. Dibaen madung ditulakkon raja i parenta ni TUHAN, jadi Tuhan i pe madung manulakkon raja i songon sada raja.”

²⁴Umbege i, mangoku ma si Saul tu si Samuel, didok ia ma, “Tutu do i madung mardosa au, hulaosi do parenta ni TUHAN jana hupasiding sipaingotmi. Na mabiar do au tu paranganki gabe huoloi pangidoan ni halahi i.

²⁵Tapi saonnari pangidoanku tu ho amang, sesa ma dosangki jana rap mulak ma hita tu Gilgal anso tarbaen au maribadat tu TUHAN.”

²⁶Tapi dialusi si Samuel ma, “Nada ra au rap mulak dohot ho be. Na dung manggagai do raja i tu parenta ni TUHAN, jana Ia pe na dung ditulakNia do raja i songon raja ni Israel.”

²⁷Dung i dihudukkon si Samuel ma laho kehe, tapi ditiopi si Saul ma ia, digolom baju jubania i, jabat do masibak baju juba i.

²⁸Dung i didok si Samuel ma tusia, “Sadari on ma disibakkon TUHAN harajaan Israel sian raja i, jana dilehen ia tu halak na asing na umburju sian raja i.

²⁹Nada margabus bope nada muba muse roha ni Na Marmulia Debata ni Israel, angke nada jolma Ia.”

³⁰Dialusi si Saul ma, “Ma mardosa au tutu. Tapi pinomat ma tarpatuduhon ho amang tu au sangap sian ho di jolo ni angka pamimpin ni bangsongku dohot di sude Israel. Rap dohot au ma ho mulak anso laing tarbaen au maribadat tu TUHAN Debatami.”

³¹Dung i rap mulak ma si Samuel dohot ia tu Gilgal jana maribadat ma si Saul tu TUHAN.

³²Dung i dilehen si Samuel ma parenta, “Oban ma Raja Agag tuson.” Ro ma si Agag tusia mardongan arop ni roha na gok angke didok rohania: “Ma salpu do aropku bahaya ni hamatean.”

³³Didok si Samuel ma, “Songon podangmi na dung mambaen bahat halak agoan anak, laing songon i muse ma inangmu gabe agoan anak.” Dung i dijaljal si Samuel ma si Agag di jolo ni langgatan na di Gilgal i.

³⁴Dung salpu i kehe ma si Samuel tu Rama, jana si Saul pe mulak noma tu bagasna di Gibea.

³⁵Lopus tu ujung ni ngolunia nada jungada be diida si Samuel raja i. Tapi marsak do si Samuel hara ni na manyosal i TUHAN mambaen si Saul gabe raja.