Read Batak Angkola 1 SAMUEL 17 Bible Online

1 SAMUEL 17 - Batak Angkola bible

1 SAMUEL 17

¹Sanoli dijujui halak Pilistin ma tentarana anso maju marporang. Diatur halahi ma barisan ni halahi di Soko, di tonga-tonga ni luat ni Juda jana dibaen halahi ma parbandaran ni halahi di antara ni Soko dohot Aseka di Efes Damim.

²Marlagut muse ma si Saul dohot angka halak Israel jana marbandar ma di Rura Harangan; markobas ma halahi laho marporang mangalo halak Pilistin.

³Songon i ma parangan ni halak Pilistin i jongjong di sada tor jana barisan ni halak Israel di tor na sada nari jana sada rura ma di antarana i.

⁴Jadi haruar ma sada bayo na margoar si Goliat sian parbandaran ni Pilistin i laho mangalap-alapi halak Israel. Ginjangna adong do hira-hira tolu meter,

⁵jana markupia tumbaga do ia dohot baju porang tumbaga marborat hira-hira onom pulu kilogram.

⁶Patnia diholipi panutup ni pat na sian tumbaga jana di abarania i porsan tombak tumbaga.

⁷Hapal ni tombakna i sahapal ni balok ni partonunan, jana mata ni tombakna i bosi, na marborat hira-hira pitu kilo. Mardalan ma di jolonia sada parajurit maroban parincenia.

⁸Maradian ma si Goliat na mardalan i lalu marsurak ma ia tu tentara ni Israel i, “Na mahua do hamu disi? Na giot marporang dehe hamu? Au ma sada halak Pilistin, jo hamu angka hatoban ni si Saul! Pili hamu ma sahalak sian hamu na puluk marporang mangalo au.

⁹Muda mate hona bunu au di partandingan porang i, gabe hatobanmunu ma hami, tapi muda au do monang mamunusa, hamu ma gabe hatobannami.

¹⁰Saonnari, au mangalap-alapi tentara ni Israel; pili hamu ma sada halak maralo dohot au!”

¹¹Di na nibege ni si Saul dohot angka dongannia i pangalapina i, tarsonggot ma halahi jana gabe mabiar situtu.

¹²Anggo si Daud, anak ni si Isai halak Efrata sian Betlehem na di Juda do. Adong do salapan anak ni si Isai jana dompak di zaman ni si Saul mamarenta, anggo si Isai madung matobang situtu.

¹³Anak ni si Isai na tolu halak na dung magodangi i madung kehe marporang mangihutkon si Saul. Siangkaanna margoar si Eliab, na paduahon si Abinadab dohot na patoluhon si Sama.

¹⁴Si Daud ma sianggian. Dompak marporang angkangnia na tolu na godang-godang i mangihutkon si Saul,

¹⁵jotjot do si Daud manadingkon si Saul jana mulak ia tu Betlehem laho marmahan biri-biri ni amangnia i.

¹⁶Opat pulu ari lolotna ganop manyogot dohot potang, sai dipadonok si Goliat tu barisan ni halak Israel mangalap-alapi tu halahi.

¹⁷Di sada ari didok si Isai ma tu si Daud, “Buat ma sakaleng gandum na disaok dohot roti on sampulu jana oban ma i di angkangmu di parbandaran ni tentara i.

¹⁸Laing oban muse ma sampulu rantang dadi ni lombu on di pamimpin ni parangan i. Sapai ma sanga na bia do angkangmu disi, jana oban ma tanda di au paboa na dung marsuo ho dohot halahi dohot tanda na horas halahi.

¹⁹Di Rura Harangan do halahi rap dohot Raja Saul, jana topet marporang do sude halak Israel mangalo halak Pilistin.”

²⁰Ancogotna i manyogot dope, ngot ma si Daud, lalu markobas, dipasahat ia ma biri-birinia i tu sada halak na manjago, dung i dibuat ia ma siobanonnia lalu kehe ma ia songon na niparentahon ni amangnia i. Di parlalunia i topet ma diparkehe ni halak Israel tu galanggang ni porang lalu marsurakkon sora ni porang.

²¹Patongtang ma tentara ni Pilistin dohot tentara ni Israel jana hobas be laho marporang.

²²Dung i dipasimpankon si Daud ma na niobannia i tu panjago barang-barang ni tentara i jana dilojong ia ma tu galanggang ni porang i laho mandapotkon angka angkangnia i jana disapai ma sanga na horas halahi.

²³Tapi dompak manghobari dope ia dohot halahi, maju ma si Goliat tu jolo mangalap-alapi halak Israel, songon na somal dibaen ia. Dibege si Daud muse ma hatania i.

²⁴Disi diida halak Israel ro si Goliat, manigor marlojongi ma halahi mabiar.

²⁵“Ligi ma!” ninna halahi na sada tu na asing. “Bege ma pangalap-alapinia i! Madung dijanjihon si Saul rajanta i, sanga na ise pe na mamunu si Goliat, dapotan upa na godang. Tola muse ma buatonna boru ni raja i. Jana malua ma sian pajak amangna i.”

²⁶Dung i marsapa ma ia tu angka halak na jongjong donok tusia, “Aha ma he upa sijagiton ni halak na mamunu halak Pilistin i dohot na manyesa habilean sian Israel?” Ise do lakna halak Pilistin si pelebegu on na barani mangalapi tentara ni Debata na mangolu i.

²⁷Dipaboa parangan i ma tusia na nijanjihon ni raja i.

²⁸Dibege si Eliab angkang ni si Daud siangkaan i do si Daud na manghata i dohot angka parangan i. Gabe muruk ma ia tu si Daud, didok ia ma, “Biasi ro ho tuson? Tu ise dipauruskon ho angka biri-birimi di halongonan? Huboto do na papuluk-pulukkon ho; inda he na giot mangaligi porang ho ro tuson?”

²⁹Dialusi si Daud ma, “Aha he salangku? Na manyapai sajo do au!”

³⁰Dung i kehe ma i mandapotkon angka parangan na asing, jana sarupa do alus na dapot ia.

³¹Tapi adong do deba na umbege na nidok ni si Daud, na palaluhon tu si Saul, jadi gabe dipio ia ma si Daud anso mangadop.

³²Didok si Daud ma tu si Saul, “Nada pola mabiar hita mida halak Pilistin da rajanami! Maralo ma au dohot ia.”

³³“Ulang,” ning si Saul mangalusi, “Bia ma parjadina maralo ho dohot ia? Poso sajo dope ho, hape anggo ia na dung somal marporang do sian haposoonnia.”

³⁴Tapi didok si Daud ma, “Somal do au marmahan biri-biri ni amanta hami rajanami; muda adong ro singa sanga gompul na manyoro anak ni biri-biri i

³⁵hukojar do binatang panyoro i jana hualo, lalu hupalua anak ni biri-biri i. Jana muda marbalik singa i sanga gompul i manyoro au, gabe hutiop do rungkungna i lalu hupotuk lopus mate.

³⁶Na dung hubunu do singa sanga pe gompul, jana sarupa ma bagian ni halak Pilistin si pelebegu i songon angka binatang i, dibaen na dung barani ia mangalo-alo tu tentara ni Debata na mangolu i.

³⁷Na dung dipalua TUHAN do au sian singa dohot gompul, laing paluaonNia muse ma au sian halak Pilistin i.” Dung i didok si Saul ma tusia, “Antong denggan, sai didongani TUHAN ma ho nian.”

³⁸Dilehen si Saul ma pakean porangnia dohot sada baju bosi tu si Daud jana dipake si Daud ma i. Dung i dipapakehon si Saul ma kupia tumbaga di ulu ni si Daud.

³⁹Ujungna ditambatkon si Daud ma podang ni si Saul di baju bosi i dicubo ia ma mardalan, hape nada tarbaen ia be, hara ni na so somal mamake pakean porang. “Nada tarbaen au mardalan mamake pakean on,” ning ia tu si Saul. “Nada somal au mamakesa.” Jadi gabe dibuka ia ma sude pakean porang i.

⁴⁰Dung i dibuat ia ma tungkotnia marmahan i jana dipili ia ma lima batu na landit sian batang aek i lalu dipamasuk ia tu cakunia. Tiop ma sior di tangannia, kehe ma ia mandonohi si Goliat.

⁴¹Inda sadia honok ro ma si Goliat dijoloi sioban parincena i mandonohi si Daud.

⁴²Tapi disi diida ia si Daud jana dipamanat ia, martata ma si Goliat mangincahi hara ni posona dohot jogina si Daud.

⁴³Didok si Goliat ma tu si Daud, “Na giot tu aha ma tungkot i? Na dietong ho do lakna au anjing?” Jana diburai ia ma si Daud mangasahon angka debatana.

⁴⁴Pio-pio muse ma ia tu si Daud, “Tole, ro ma ho! Anso hulehen pamatangmi di unggas dohot binatang baen panganonna.”

⁴⁵Tapi dialusi si Daud ma, “Ro ho mangalo au mangasahon podang, tombak dohot hujur, tapi ro do au mangalo ho mangasahon goar ni TUHAN Na Markuaso i, Debata ni tentara ni Israel na nipalayasmi.

⁴⁶Pasahaton ni TUHAN ma ho laing di ari sadari on tu au; taluhononku ma ho jana lobongonku ma ulumi. Lehenonku ma pamatangmi dohot pamatang ni angka tentara ni Pilistin i tu angka unggas dohot binatang anso panganonna. Jadi gabe botoon ni na satano on ma, anggo hami bangso Israel adong do Debata na hami somba

⁴⁷jana sudena halak na adong dison marnida na so porlu di TUHAN tombak sanga podang laho paluahon bangsoNa. I ma da na monang di parporangan on jana pasahatonNia ma hamu tu bagasan tangannami.”

⁴⁸Dipungka si Goliat ma mardalan mangulahi mandonohi si Daud, dung i diompoti si Daud ma marlojong mandapotkon barisan ni halak Pilistin i laho mangalosa.

⁴⁹Dirogo si Daud ma cakunia mambuat sada batu lalu diambalang ia ma tu si Goliat. Hona ma batu i tu bohi ni si Goliat, jadi gabe tapor ma ulunia i, jana unggal ma ia manungkap bohina i tu tano.

⁵⁰Songon i ma dibaen si Daud manaluhon halak Pilistin i marhite ambalang dohot batu; ditaluhon dohot dibunu ia do halak Pilistin i, so pola mardongan podang.

⁵¹Dilojong si Daud ma mandapotkon halak Pilistin i, jongjong ma ia di lambungna i; dibuat ia ma podang ni si Goliat, disintak ia sian sarungna i, dung i diabisi ia. Digotap ia ma ulu ni si Goliat i dohot podang. Dung diida halak Pilistin i bahaso na dung mate juaro ni halahi, marlojong be ma halahi.

⁵²Anggo angka halak Israel dohot halak Juda marsurak-surak noma lalu mangkojar halak Pilistin mamungka sian Saaraim lalu tu Gat dohot tu pintu horbangan ni Ekron. Marserak ma sapanjang dalan i angka halak Pilistin na mabugang.

⁵³Dung i mulak ma halak Israel sian na mangkojar halak Pilistin i, dirampasi halahi muse ma isi ni parbandaran ni halahi i.

⁵⁴Dibuat si Daud ma ulu ni si Goliat jana dioban ia ma i tu Jerusalem, tapi anggo angka sinjata ni si Goliat i di bandarnia sandiri do disimpan ia.

⁵⁵Di na niida ni si Saul kehe si Daud mangalo si Goliat, disapai ia ma tu si Abner, panglima ni tentarania i, “Anak ni ise do tehe Abner, bayo i?” “Nada huboto rajanami,” ning si Abner mangalusi.

⁵⁶Jadi diparentahon si Saul ma, “Kehe ma jolo ho manyapai.”

⁵⁷Jadi di na mulak si Daud tu parbandaran dung dibunu ia si Goliat, dioban si Abner ma ia mangadop tu si Saul. Laing jingjing dope dibaen si Daud ulu ni si Goliat i.

⁵⁸Dung i disapai si Saul ma tusia, “Anak ni ise dehe ho, doli-doli?” Dialusi si Daud ma, “Anak ni si Isai na sian Betlehem do au.”