Read Batak Angkola 1 SAMUEL 2 Bible Online

1 SAMUEL 2 - Batak Angkola bible

1 SAMUEL 2

¹Dung i martangiang ma si Hanna, ning ia ma, “Dipajop TUHAN do rohangku, pambaenanNia do na pasonang tondingku. Huincahi musungku; gabe martua ma au, angke tutu do na dung diurupi Debata au.

²Nada adong na badia songon TUHAN, nada adong na gogo songon Ia, nada adong na songon Ia na bisa gabe parondingan.

³Antak ma hata-hatamu na rumar i, paujung ma burasmu na teal i! Angke Debata Na Sun Mamboto do TUHAN na manguji sude pambaenan ni jolma.

⁴Madung maponggol sior ni parporang tapi halak na gale mur marhagogoan.

⁵Halak na butongan hian najolo i hara ni sipanganon na marlobi. Saonnari gabe pangomo-omo hum anso dapotan sipanganon sajo. Halak na tangkuraparon najolo, saonnari marsonang-sonang, tuk panganonna. Dadaboru na so maruntungan, saonnari marhamogaan, manubuhon pitu dakdanak! Hape anggo ina sibahat anak, ditadingkon, dipadiar marsak.

⁶TUHAN do mamatehon Ia muse do na pangoluhon. Na paijurkon jolma tu tanoman jana mangangkatsa sian i.

⁷Adong do halak na bile dibaen Ia, adong muse na mora dibaen Ia. Adong do halak na dipatorukNia adong muse na dipatuginjangNia.

⁸Sian abuan diangkat Ia halak na so mararta sian pardangolan halak na bile dipalua Ia. Dibaen Ia halahi dongan ni angka na mora-mora, jana dilehen muse juguhan na sangap. Debata do nampuna ojahan ni portibi on dipajongjong Ia di ginjangna tano on.

⁹Halak na tigor do na sai sonang di bagasan pangaramotion ni TUHAN. Tapi anggo na jahat sai na sarsar do i mago di bagasan hagolapan na marimpot-impot. Gogona sandiri so tarpangasahon, so tarlehen gogo ni jolma hamonangan.

¹⁰Maronco angka musu ni TUHAN, mabiar be; mangaronggur Ia sian langit an. Na giot manguhumi ma TUHAN tu sandok tano on. Jana lehenonNia ma kuaso na marmulia tu raja na nitodoNia.”

¹¹Dung i mulak ma si Elkana tu Rama, tapi anggo si Samuel anaknia i, tinggal ma di Silo jana disi ma ia mangoloi TUHAN di bagasan pangajarion ni si Eli.

¹²Na jahat situtu do angka anak ni si Eli. Nada diantureskon halahi TUHAN,

¹³jana songon malim, marroha-roha do halahi maradopkon bangso Israel. Muda adong halak na manghaulkon haul, ro ma pangurupi ni malim i maroban garpu sitolu mata. Dompak mangalompa juhut i,

¹⁴disusukkon ma garpu i tu bagasan hudon pangalompaan i, sanga aha na tartarik garpu i tu ruar, gabe nampuna ni malim i ma i. Songon i ma dibaen tu sude halak Israel na ro manghaulkon haul tu Silo.

¹⁵Huhul, dompak so dipaasing dope tabo-tabo situtungon i, ma pola ro pangurupi ni malim i mandok tu halak na manghaulkon haul i, “Lehen ma antong juhut na mata i di malim i anso adong panggangonnia; nada ra ia manjagit juhut na dibolgang.”

¹⁶Muda dialusi halak i, “Dumenggan ma da tapadalan paraturan, jana tatutung jolo tabo-tabo i; dung i buat ma sanga na dia por ni rohamu,” jadi gabe dokkonon ni pangurupi ni malim i do, “Nada, angkon saonnari do lehenonmu, muda nada, maradu gogo pe buatonku do.”

¹⁷Songon i ma anak ni si Eli na dua i mardosa godang di adopan ni TUHAN, hara ni na so adong be sangap ni halahi tu haul na nihaulkon tu TUHAN.

¹⁸Anggo si Samuel anak ni si Hanna i, dipupu ia do mangoloi TUHAN. Mamake baju efod do ia na dibaen sian abit linen, songon baju parkobas ni angka malim.

¹⁹Ganop taon do dibaen inangnia baju juba na menek disia lalu dilehen ma i di si Samuel muda hatiha ro anak boru i rap dohot halaklahina manghaulkon haul siganop taon.

²⁰Jadi dipasupasu si Eli ma si Elkana dohot dadaborunia i jana didok ia ma tu si Elkana, “Sai dilehen TUHAN ma anak muse di ho sian dadaborumon laho manggonti anak na dung nilehenmon tu TUHAN.” Dung salpu i mulak ma halahi tu Rama.

²¹Dipasupasu Debata do si Hanna, gabe sorang ma muse tolu anaknia halaklahi dohot dua anak dadaboru. Si Samuel pe mur magodang ma di jolo ni Debata.

²²Madung matobang situtu si Eli. Sai torus do marpupu dibege ia barita taringot tu pangalaho ni dakdanaknia i maradopkon halak Israel. Diboto si Eli muse do na modom angka anaknia i dohot angka dadaboru na markobas di jolo ni pintu ni Bandar Parmianan Ni TUHAN i.

²³Jadi hara ni i didok ia ma tu dakdanaknia i, “Madung hujagit barita sian sude bangso i taringot tu pangalahomunu na jahat. Biasi ma he dibaen hamu songon i?

²⁴Ulang be baen hamu songon i, ale dakdanakku. Majatjattu do na hubege dihatahon bangso ni TUHAN i salaho tu hamu!

²⁵Muda mardosa halak tu jolma, tarampini Debata do i; tapi muda mardosa tu TUHAN do halak, ise be tarbaen manolongsa?” Tapi nada diantureskon halahi sipaingot ni si Eli, amang ni halahi i, madung diputuskon TUHAN do laho mamunu halahi.

²⁶Tapi anggo si Samuel dakdanak i, mur magodang ma ia boti mur pajop roha ni TUHAN bope roha ni jolma sudena.

²⁷Sanoli ro ma sahalak panurirang tu si Eli jana dilehen ma tona tusia sian TUHAN, “Dompak na gabe naposo ni raja ni Mesir ompungmu si Harun dohot isi ni bagasna, Hupatidahon do diringKu tusia.

²⁸Sian sasude marga ni Israel Hupili do horong ni si Harun gabe malim di Au, laho mangkobasi di langgatan, manutung dupa, dohot mamake baju efod muda mangkobari dohot Au. Jana Hulehen do tu halahi hak laho mambuat deba sian haul parhaulan na ditutung di langgatan i.

²⁹Antong, biasi dope laing maradu songkal ho mida angka haul na dihaulkon ni bangsongKi tu Au? Eli, biasi sumangap dibaen ho angka anakmi ulang pado Au, jana dipadiar ho pamokmok dirina halahi marhite bagian na dumenggan sian sandok na nihaulkon ni bangsongKu tu Au?

³⁰Au TUHAN Debata ni Israel, na dung Hujanjihon do najolo, horongmu dohot margamu do na giot parkobas di Au gabe malim sapanjangna. Tapi saonnari Au mandok, nada Huhagioti be na songon i! Angka na pasangapkon Au do na giot pasangaponKu tapi anggo na palayas Au, palayasonKu do.

³¹Satutuna, na giot ro ma hatihana, bunuonKu ma sude doli-doli sian horongmu dohot margamu, lopus nada adong sahalak pe doli-doli sian horongmu marumur na ginjang.

³²Marsak ma ho jana mangiburu mida sude pasupasu na giot lehenonKu tu angka halak na asing di Israel, hape anggo di bagasan horongmu sandiri mate poso ma sudena.

³³Tapi sada sian pomparanmu giot paluaonKu jana oloannia ma Au, songon malim. Tapi gabe mapitung ma ho jana mangolu di bagasan pandelean. Sudena pomparanmu na asing i bunuonKu.

³⁴Na gabe tanda paboa na tutu giot tarjadi na Hudokkon i, mate di sada ari ma anakmu na dua i si Hofni dohot si Pinehas.

³⁵Dung i todoonKu ma malim na burju tu Au dohot na patuluskon sanga aha na Huparentahon tusia. Sai torus ma markarejo pomparannia songon malim di adopan ni angka raja na Hutodo.

³⁶Ganop pomparanmu na mangolu, kehe ma tu malim i jana pangidoonna ma hepeng sanga panganon. Pangidoonna ma, ‘Paloas ma au mangurupi angka malim, anso laing mangan au bope hum sampohul pe.’ ”