Read Batak Angkola 1 SAMUEL 20 Bible Online

1 SAMUEL 20 - Batak Angkola bible

1 SAMUEL 20

¹Dung i lari ma si Daud sian Nayot jana kehe ma ia mandapotkon si Jonatan lalu manyapai, “Aha dehe salangku? Hajahatan dia do na hubaen jana apala aha do dosangku tu amanta umbaen na giot bunuonna au?”

²Dialusi si Jonatan ma, “Ulang dokkon songon i! Nada bunuon ho. Sai dipaboa amanta do tu au sude sangkapnia, bope na porlu bope na so porlu. Jadi nada ra ia manabunihon na songon i tu au. Jadi, nada tutu sude na nidokkonmi!”

³Dialusi si Daud ma, “Diboto amanta do na holong rohamu tu au. Hara ni i do umbaen na so ra ia paboahon na songon i anggo tu ho anso ulang marsak ho. Sanga na bia pe, mangasahon TUHAN Na Mangolu i, tutu do na hudok on: Gincip noma hosangku!”

⁴Dung i didok si Jonatan ma, “Sanga aha na nidokmu baenonku, hubaen pe.”

⁵Dialusi si Daud ma, “Ancogot Pesta Bulan Na Imbaru, jana somalna angkon rap mangan do au dohot raja i. Antong muda diloas ho do, kehe ma au anggo songon i martabuni di halongonan lopus tu haduan andospotang.

⁶Muda disapai amanta biasi nada disi au, dokkon ma, na dung marpaboa hian au tu ho na manigor mulak au tu Betlehem, hara ni na mambaen haul siganop taon disi hami na sabagas sudena.

⁷Muda didok amanta, ‘Denggan,’ gabe malua ma au, tapi muda gabe muruk do ia, botoonmu ma disi na dung mambaen haputusan amanta laho mangago au.

⁸Na mangido tolong ma au tu ho, dibaen na dung mamudun janji do hita di adopan ni TUHAN. Tapi haru songon i pe muda na marsala do au antong, bunu ma au, tapi ulang ma pasahat au tu amanta.”

⁹Dialusi si Jonatan ma, “Ulang pola ganggu rohamu disi! Muda dung torang do huboto na dung putus roha ni amanta laho mangago ho, torang do i paboaonku tu ho.”

¹⁰Dung i disapai si Daud mangulahi, “Ise ma paboahon tu au sugari umpamana muruk amanta mangalusi ho?”

¹¹“Beta ma rap kehe hita tu halongonan,” ning si Jonatan. Jadi rap kehe ma halahi tu halongonan.

¹²Dung i didok si Jonatan ma tu si Daud, “TUHAN Debata ni Israel ma na gabe saksinta! Ancogot manyogot sanga haduan laing tarsongon on ma hatihana, huusahahon pe laho mamboto isi ni roha ni amanta. Muda denggan do antong rohana tu ho, hutongos pe barita paboahon tu ho.

¹³Muda na giot agoonna do ho, hupaboa pe tu ho anso tarbaen ho antong paluahon dirimu. Sai dibunu TUHAN ma au muda nada hupatulus i. Sai didongani TUHAN ma ho laing songon pandonganina di amanta najolo!

¹⁴Jana muda laing mangolu au, togu ma tiop janjinta on di adopan ni TUHAN jana burju ma ho antong tu au; tapi muda dung soada au,

¹⁵patuduhon ma tanda na burju ho tu pomparanku salolot-lolotna. Jana muda dironcohon TUHAN sude musumu,

¹⁶ulang antong gabe magotap parjanjianta antara hita na dua. Muda jabat magotap, sai TUHAN ma manguhumi ho.”[7]

¹⁷Jadi paduanolihon ma disuru si Jonatan marjanji si Daud anso manghaholongi ia, angke holong ni rohania tu si Daud dos do dohot tu dirinia sandiri.

¹⁸Dung i didok si Jonatan ma tusia, “Ancogot Pesta Bulan Baru. Tangkasma habotoan na so tarida ho disi, harana gabe kosong ma ingananmu hian di meja makan;

¹⁹mur ma haduan! Jadi, kehe ma ho tu partabunianmu na salpu i jana dibalik ni batu na martimbun na disi i ma ho.

²⁰Ancogot sanga haduan husiorkon pe mar tolu anak ni pana tu sabola batu i, paula-ula songon na mamendang sitembahon.

²¹Dung i husuru ma hatobanki manjomput angka anak ni pana i, jana muda hudok tusia, ‘Tar tuson do pana i, buat ma,’ i ma tandana bahaso na aman do ho jana tola ruar. Husumpahon ma mangasahon TUHAN Na Mangolu i paboa na so adong mara aha pe tu ho.

²²Tapi muda hudok tu hatobanki, ‘Hoi, tar tu sadu do pana i,’ i ma tandana na disuru TUHAN ho kehe, anggo songon i kehe ma ho.

²³Sai dijagohon TUHAN ma anso nian rap maniop hita tongtong di janjinta on antara hita na dua!”

²⁴Dung i martabuni ma si Daud di halongonan. Di Pesta Bulan Baru i, ro ma Raja Saul tu pesta parmanganan i.

²⁵Songon somalna juguk di lambung dingding do raja i; dibuat si Jonatan ma inganannia di jolona i, si Abner di lambung ni raja i, tapi anggo inganan ni si Daud i laing kosong do.

²⁶Tapi nada ditaringoti si Saul taringot tusi anggo di na sadari i, harana dipikir ia, “Aropku na adong do sanga na aha na masa tusia gabe nada ias ia.”

²⁷Di ari na mangihut, i ma ari paduahon Bulan Baru, laing kosong dope inganan ni si Daud humani. Gabe marsapa ma si Saul tu si Jonatan, “Biasi nada ro natuari dohot sadari on si Daud tu pesta on?”

²⁸Dialusi si Jonatan ma, “Marpaboa do ia tu au laho kehe tu Betlehem.

²⁹Pandoknia, ‘Paloas au jolo kehe, harana mambaen pesta haul hami na sabagas di Betlehem, jana disuru angkang au ro. Jadi hara ni i, muda tumbuk do rohamu, padiar au jolo kehe anso marsuo dohot koum sisolkotku.’ I ma dalanna umbaen na so tarida ia ro di pesta parmanganon ni amang on.”

³⁰Umbege i, manigor gilap ma dihilala si Saul tu si Jonatan jana didok ma tusia, “Anak gampang ho! Saonnari ma huboto hape na mamihak tu si Daud do ho jana dipaila ho dirimu sandiri dohot inangmu!

³¹Na so diboto ho dehe anggo salolot mangolu si Daud na so tarbaen ho gabe raja di luat on? Saonnari suruhon ma halak manjalahi dohot maroban ia tuson, harana angkon mate do ia!”

³²Jadi dialusi si Jonatan ma, “Biasi angkon sai mate ia? Aha dosania?”

³³Umbege i, didanggurkon si Saul ma tombaknia tu si Jonatan laho mamunusa. Jadi diboto si Jonatan ma torang na marsitutu amangnia i laho mamunu si Daud.

³⁴Mardongan muruk na marpiar-piar ditadingkon si Jonatan ma meja parjamuan i jana nada mangan bagi aha ia di ari paduahon Pesta Bulan Baru i. Sun dokdok ni rohania pasari-sari si Daud na nipalayas ni si Saul amangnia i.

³⁵Ancogotna i kehe ma si Jonatan tu halongonan laho marsuo dohot si Daud songon na nitahihon ni halahi hian. Dioban ia ma sada hatobanna dakdanak halaklahi,

³⁶jana didok ia ma tu dakdanak i, “Tole, jomput ma angka pana na giot tembakkononku.” Dompak marlojong dope dakdanak i dipalua si Jonatan ma sada pana lewat dakdanak i.

³⁷Dung lalu dakdanak i di hadabuan ni pana i, pio-pio ma si Jonatan tusia, “Hoi, tar tu sadu dope!

³⁸Pahipas saotik, ulang ho lalap!” Dijomput dakdanak i ma pana i jana didapotkon ia tuannia i.

³⁹Saotik pe nada diboto ia sanga na aha maksud ni hata ni si Jonatan i, hum si Jonatan do dohot si Daud na mangastui i.

⁴⁰Dung i dilehen si Jonatan ma siornia i tu dakdanak i jana disuru ia ma mulak tu kota.

⁴¹Dung kehe dakdanak i, ruar ma si Daud sian balik ni batu na martimbun i, lalu manungkap ma ia tolu noli. Tangis ma ia, songon i muse dohot si Jonatan di na marsiummaan halahi. Gumodang dope arsak ni si Daud ulang pado si Jonatan.

⁴²Dung i didok si Jonatan ma tu si Daud, “Sai didongani Debata ma ho. Jagohonon ni TUHAN do anso togu hita maniop janjinta na dua dohot pomparanta di adopan ni Debata.” Dung salpu i, kehe ma si Daud, jana si Jonatan pe mulak ma tu kota.