Read Batak Angkola 1 SAMUEL 22 Bible Online

1 SAMUEL 22 - Batak Angkola bible

1 SAMUEL 22

¹Dung i ditadingkon si Daud ma kota Gat jana martabuni ma ia di liang na di lambung ni kota Adulam. Di na tarbege tu angka angkangnia dohot tu sude sisolkotnia bahaso na disi ia, ro ma halahi mandapotkon ia.

²Songon i muse angka halak na hona pisat dohot angka na marutang dohot na so puas pangkilalaanna mardomu ma tu si Daud jana si Daud ma gabe pamimpin ni halahi. Adong ma hira-hira opat ratus halak na mangihutkon si Daud.

³Kehe ma si Daud sian liang i tu Mispa na di Moab jana didok ia ma tu raja na di Luat Moab, “Paloas ma jolo damang dohot dainang tinggal rap dohot ho lopus huboto sanga aha maksud ni Debata salaho tu au.”

⁴Dung i ditadingkon ia ma simatobangnia i di raja ni tano Moab jana totop noma halahi disi salolot martabuni si Daud di liang i.

⁵Sanoli adong ma sada panurirang na margoar si Gad ro mandapotkon si Daud mandok, “Ulang ho di liang on be, ompoti ma kehe manigor tu Juda.” Jadi kehe ma si Daud sian i jana masuk ma ia tu harangan Keret.

⁶Sanoli hatiha juguk si Saul di toru ni hayu tamariska di ginjang ni tor na di Gibea, ditiop ia do tombaknia jana marjongjongan do angka parangannia i humaliang ia. Dung dibege ia na dung binoto sanga di dia si Daud dohot angka paranganna i,

⁷didok ia ma tu angka parangannia i, “Tangihon hamu jolo, hamu angka halak Benyamin! Na giot lehenon ni si Daud ma he lakna ladang dohot kobun anggur di hamu? Na giot angkatonnia ma he hamu lakna gabe kapala di bagasan tentarania?

⁸I ma he dalanna umbaen na marpokat hamu mangalo au jana umpe adong sahalak na paboahon tu au bahaso na marpihak tu si Daud anakku sandiri? Sahalak pe nada adong sian hamu na gamang salaho tu diringku sanga na paboahon tu au na painte hatihana si Daud paranganku sandiri laho mamunu au, jana na dung dilehen si Jonatan anakki soso-soso tusia!”

⁹Disi muse do si Doeg kapala ni parmahan ni si Saul rap dohot angka parangan ni si Saul i. Jadi didok si Doeg ma, “Ma huida si Daud mandapotkon si Ahimelek anak ni si Ahitub di Nob.

¹⁰Mangido panogu-noguon do si Ahimelek tu TUHAN sanga na aha do sibaenon ni si Daud. Tamba ni i dibaen muse dope balanjo ni si Daud jana dilehen podang ni si Goliat halak Pilistin i.”

¹¹Jadi disuru raja i ma pioon Malim Ahimelek dohot sude kahangginia na gabe malim di Nob; jadi ro ma halahi mangadop tusia.

¹²Didok si Saul ma tu si Ahimelek, “Tangihon, anak ni si Ahitub!” “Olo, rajanami!” ning ia mangalusi.

¹³Disapai si Saul ma tusia, “Biasi satahi ho dohot si Daud laho mangalo au? Biasi dilehen ho balanjonia roti jana dilehen ho podang dohot dipangido ho panogu-noguon sian Debata? Jadi gabe dialo ia au saonnari jana na painte hatiha hadenggananna ma ia laho mamunu au?”

¹⁴Jadi dialusi si Ahimelek ma, “Panglima na umburju do si Daud di raja i! Babere ni raja i sandiri do antong ia, kapala ni pangawal ni raja i sandiri, jana na diparsangapi ni sude halak na adong di bagas godang ni raja i tusia.

¹⁵Tutu ma da i na mangido panogu-noguon au tu Debata salaho tusia, tapi nada i be na parjolo hubaen songon i. Salaho tu na mambaen partahian laho mangalo raja i, ulang ale dituhas raja i au sanga pe sian tonga-tonga ni bagasku. Nada hupaboto-boto sanga aha anggo salaho tu pangalaho i!”

¹⁶Tapi didok raja i ma, “Ahimelek, angkon mate ho dohot kahanggimu.”

¹⁷Lalu diparentahon ia ma songon on tu angka pangawal na jongjong di lambungnia i, “Tole, bunu hamu angka malim ni TUHAN on! Na dung saroha do halahi dohot si Daud. Diboto halahi do antong na lari ia, hapengani nada ra halahi paboahonsa tu au.” Tapi nada ra angka pangawal i palalu tangan laho mamunu angka malim ni TUHAN i.

¹⁸Jadi gabe didok si Saul ma tu si Doeg, “Aha dope, ho sajo ma mamunu halahi!” Jadi ro ma si Doeg lalu dibunu ia ma angka malim i. Di na sadari i dimatehon ia ma salapan pulu lima halak malim na marhak maroban Efod.

¹⁹Laing diparentahon si Saul muse dope anso dibunu sude halak Nob, kota ni malim i; halaklahi, dadaboru, dakdanak dohot na baru sorang, songon i lombu, halode dohot biri-biri — diabiskon sude.

²⁰Hum sasada si Abyatar, sada sian angka anak ni si Ahimelek sajo na malua. Kehe ia maporus tu si Daud,

²¹lalu dipaboa ia bahaso na dung dibunu si Saul angka malim ni TUHAN.

²²Jadi gabe didok si Daud ma tusia, “Di na huida si Doeg disi di ari i, huboto do na giot mangadu ma ia tu si Saul. Jadi au ma na martanggung jawab salaho tu parmate ni sude kahanggimi.

²³Tongtong ma ho rap dohot au, jana ulang ho mabiar. Sai giot bunuon ni si Saul do ho, tapi au pe laing na giot bunuonnia muse do: Jadi, sonang ma ho di ingananku.”