Read Batak Angkola 1 SAMUEL 27 Bible Online

1 SAMUEL 27 - Batak Angkola bible

1 SAMUEL 27

¹Marpikir ma si Daud di bagasan rohania, “Bagi na bia pe, di sada hatiha angkon laing bunuon ni si Saul noma au. Jadi nada adong be dalan na asing di au sian na maporus tu tano ni halak Pilistin. I noma mangantak si Saul manjalahi au di Israel jana gabe malua au.”

²Jadi manigor kehe ma si Daud dohot parangannia na onom ratus halak i tu si Akhis anak ni si Maok raja ni kota Gat.

³Jadi hot ma ia rap dohot parangannia i tinggal di Gat, rap dohot ripe ni halahi be. Dioban si Daud do dadaborunia na dua i, i ma si Ahinoam na sian Jisreel dohot si Abigail tading-tadingan ni si Nabal na sian Karmel.

⁴Dung dibege si Saul na maporus si Daud tu Gat, nada pola be diusahahon ia manangkupsa.

⁵Dung i dipangido si Daud ma tu si Akhis, “Sapala na dapotan holong ni roha au sian raja i, dilehen raja i ma nian sugari di iba sada kota na menek baen inganannami, anso ulang sai manompang-nompang hami di raja i di kota sabungan on.”

⁶Jadi gabe dilehen si Akhis ma di si Daud kota Ziklag, jana i ma dalanna umbaen na gabe angka raja ni Juda nampuna kota Ziklag mamungka sian hatiha i.

⁷Sataon opat bulan honokna si Daud maringanan di tano Pilistin.

⁸Di hatiha i, na jotjotan do si Daud dohot parangannia mamorangi halak Gesur, halak Girsi dohot halak Amalek na maringanan di luat i. Diroro ia do tu tano ni halahi lalu tu Sur, sapanjang dalan tu Mesir,

⁹jana dibunu halahi do sude halaklahi dohot dadaboru jana dirampas halahi biri-biri, lombu, halode, unto dohot angka pakean na. Dung i mulak ma ia jana dipaboa ia do tu si Akhis.

¹⁰Muda disapai si Akhis tusia, “Di dia hamu on mamorangi?” Jadi didok si Daud ma tusia, na kehe ia tu bagian Selatan ni Juda sanga tu luat ni halak Jerahmeel sanga tu luat na niinganan ni halak Keni.

¹¹Sahalak pe nada adong na dipadiar ia mangolu di angka inganan na diporanginia i, anso ulang adong be halak na tarbaen kehe tu Gat laho paboahon sanga aha satutuna na tarjadi na nibaen ni si Daud dohot parangannia i. I ma na dibaen ni si Daud salolot maringanan di Luat Pilistin ia.

¹²Tapi pos do roha ni si Akhis di si Daud jana didok ia di bagasan rohania, “Songon i ma antong santakna goyak ni roha ni bangsonia sandiri tusia, lopus tarpaksa gabe naposongku ia sapanjang di ngolunia.”