Read Batak Angkola 1 SAMUEL 28 Bible Online

1 SAMUEL 28 - Batak Angkola bible

1 SAMUEL 28

¹Dung adong sadia honok diarahon halak Pilistin ma tentarana laho marporang mangalo Israel, jana didok si Akhis ma tu si Daud “Tontu mangarti do ho i, na angkon marporang ho dohot paranganmi di pihakku.”

²Dialusi si Daud ma, “Tontu songon i ma antong i. Idaon ni tuan i sandiri ma i sanga aha na tarbaen au tu tuan i.” Dung i didok si Akhis ma, “Antong denggan! Huangkat ma ho gabe pangawalku.”

³Madung mate di hatiha i si Samuel jana diandungi sude Israel lalu ditanom di Rama, hutania sandiri. Laing di hatiha i muse, madung dipaorot si Saul sian Israel sude pangaramal dohot datu pamio ni sumangot.

⁴Jadi di na marlagut tentara ni Pilistin jana marbandar di lambung ni kota Sunem, si Saul pe antong dipalagut ia ma halak Israel jana marbandar di Dolok Gilboa ma halahi.

⁵Dung diida si Saul tentara ni Pilistin i, gabe mabiar situtu ma ia.

⁶Gabe mangido panogu-noguon ma ia tu TUHAN, hape nada dialusi TUHAN ia, sanga di nipi bope dohot na mamake Urim dohot Tumim sanga pe markite-hite panurirang.

⁷Jadi hara ni i didok ia ma tu angka hatobannia, “Jalahi hamu sibaso na malo mamio sumangot, tusi noma au kehe laho mangido panogu-noguon.” Dialusi halahi ma, “Di En-Dor adong do datu.”

⁸Dung i marsipaula-ula ma si Saul anso ulang ditanda halak. Kehe ma ia diudurkon dua bayo jana lalu borngin ma halahi di bagas ni datu i. Ninna si Saul ma, “Piohon ma tondi ni halak na giot dokkononku goarna jana pangido ma anso ditondung ia sanga aha na giot tarjadi.”

⁹Dialusi anak boru i ma, “Tontu diboto ho do na dung dipaorot ni Raja Saul sian Israel angka partondung dohot datu sipio sumangot. Biasi dope dicubo ho laho padapotkon au anso hona bunu au?”

¹⁰Dung i disumpahon si Saul ma, didok ia ma, “Mangasahon TUHAN na mangolu i, marjanji au na so hona uhum ho hara ni na mambaen songon on.”

¹¹Marsapa ma anak boru i, “Ise ma anggo songon i sipioonku giotmu?” Dialusi si Saul ma, “Si Samuel.”

¹²Dung diida anakboru i si Samuel, marsurak ma ia mandok tu si Saul, “Biasi dipaoto-oto tuan i au? Raja Saul do tuan on!”

¹³Dialusi raja i ma, “Ulang ho mabiar! dokkon sajo ma, sanga aha na niidamu!” Dialusi anakboru i ma, “Huida do muldop sada na songon debata sian tano.”

¹⁴“Bia tompana?” ning si Saul marsapa. Alusnia, “Sada bayo na matobang. Mulgap ia marpakean juba.” Jadi diboto si Saul ma, si Samuel do i jana manungkap ma ia mamparsangapi panurirang i.

¹⁵Dung i mangkuling ma si Samuel tu si Saul, “Biasi gangguonmu au? Biasi dipiohon ho au mangulahi?” Dialusi si Saul ma, “Ma puntol pikiranku hara ni na diporangi ni halak Pilistin, hapengani na dung ditadingkon Debata au. Nada dialusi ia be au, sanga na markite-hite angka panurirang, sanga marhite sian nipi. Jadi hara ni i na mangelek-elek ma au tu ho amang, anso paboa sanga aha noma sibaenonku.”

¹⁶Dung i didok si Samuel ma, “Aha dope gunana dipiohon ho au, hapengani na dung ditadingkon TUHAN do ho jana TUHAN gabe musumu?

¹⁷Madung dipatulus TUHAN tu ho songon na nidokNia hian markite-hite au. Madung dibuat TUHAN harajaan Israel sian ho jana dilehen ia i tu si Daud.

¹⁸Madung dialo ho parenta ni TUHAN, nada dipusa ho halak Amalek maradu sude sinadongan ni halahi. I ma dalanna umbaen na songon i dibaen TUHAN tu ho saonnari.

¹⁹PasahatonNia ma ho dohot Israel tu halak Pilistin. Ancogot marlagut ma ho dohot angka anakmi rap dohot au; salang tentara ni Israel i pe sudena pasahaton ni TUHAN ma i tu halak Pilistin.”

²⁰Umbege i, tinggang ma si Saul bustang di tano songon na disoro ronggur, hara ni biarna. Boti muse gale sajo ia, angke nada mangan sadari saborngin.

²¹Dipadonok anakboru i ma tu si Saul jana diida ia sun ponjot ni rohana, jadi gabe didok anakboru i ma tusia, “Ale tuan, na manyabung hosangku noma au laho manggohi pangidoan ni tuan i.

²²Hara ni i, ditangihon tuan i ma nian pangidoan ni hatobanmon. Pangan ma jolo saotik sian sipanganon na giot siparadeonku anso tarpatorus tuan i pardalananmunu.”

²³Dijua si Saul do i jana didok ia na so ra ia mangan. Tapi dung sai disosoi angka naposonia i sude, dioloi ia ma. Jongjong ma ia sian tano i jana juguk di podoman.

²⁴Manigor diompoti anakboru i ma manyambol anak ni lombuna na dung dipamokmoknia, dibuat ia topung jana digudal-gudal ia ma i, lalu ditutung ia gabe roti na so marragi.

²⁵Dung i diparade ia ma sipanganon i di si Saul dohot angka naposonia i, lalu mangan ma halahi. Dung i kehe ma halahi laing di bagasan borngin i.