Read Batak Angkola 1 SAMUEL 3 Bible Online

1 SAMUEL 3 - Batak Angkola bible

1 SAMUEL 3

¹Anggo si Samuel na danak i dope, laing dioloi ia do TUHAN di hatiha i di bagasan panogu-noguon ni si Eli. Jarang sajo do di hatiha i adong tona dohot parnidaan sian TUHAN.

²Di sada borngin, modom di kamarna do si Eli na sun tobang i jana na so marnida i be dohonon,

³jana si Samuel modom di lambung ni Poti Parjanjian ni TUHAN, di Undung-undung Na Badia i. Taran so bincar dope mataniari jana gara dope lampu,

⁴dipio TUHAN ma si Samuel gabe dialusi si Samuel ma, “Olo, amang!”

⁵Dung i dilojong ia ma mandapotkon si Eli mandok, “Dison do au, dipio amang au.” Tapi dialusi si Eli ma, “Nada hupio ho, ulahi ma modom.” Lalu kehe si Samuel modom mangulahi.

⁶Dung i dipio TUHAN i mangulahi si Samuel. Jadi gabe ngot ma ia lalu didapotkon ia ma si Eli jana disapai ia ma, “Ale amang, na he piopio ho di au?” Dialusi si Eli ma, “Nada hupiohon ho da amang; modom ma ho mangulahi.”

⁷Nada ditanda si Samuel dope TUHAN i, bope hataNa nada jungada dope dibuka tusia.

⁸Patolunolihon dipio TUHAN si Samuel; dung i ngot ma si Samuel jana didapotkon ia ma si Eli lalu didok ia, “Pio-pio amang, ma dison au.” Di hatiha i torang ma diboto si Eli, TUHAN do hape na mamiohon dakdanak i.

⁹Jadi gabe didok ia tu si Samuel, “Modom ma ho mangulahi, jana muda dipiohon ho mangulahi, dokkon ma, ‘Mangkuling ma Ho TUHAN, manangi-nangi do naposoMon.’ Gabe kehe ma si Samuel tu podomannia mangulahi.”

¹⁰Dung i ro ma TUHAN jana jongjong di inganan i mamiohon mangulahi, “Samuel, Samuel!” Jana dialusi si Samuel ma, “Mangkuling ma Ho ale TUHAN, manangi-nangi do naposoMon.”

¹¹Dung i didok TUHAN ma tusia, “Giot baenonKu na jorbut maradopkon Israel, lopus dut roha ni sandok na umbegesa.

¹²Di ari i padalanonKu ma sude ancamanKu sian na parjolo lalu tu na parpudi maradopkon horong ni si Eli.

¹³Na dung Hupaboa do tusia na giot uhumanKu horongnia sapanjangna hara ni na dipalayas ni anaknia Au. Diboto si Eli do pangalaho ni halahi, hape nada dimuruhi ia halahi.

¹⁴Jadi marsumpa do Au hara ni i maradopkon horong ni si Eli, anggo dosa na lobi godang i nada tarsesa be i hara ni haul sanga na nihaulkon bagi aha pe.”

¹⁵Dung i dipapayak si Samuel ma mangulahi di podomannia jana manyogotna i ngot ma ia lalu dibukai ia angka pintu ni Bagas Ni TUHAN i. Mabiar ia paboahon parnidaannia i tu si Eli,

¹⁶tapi dipiohon si Eli ma ia, didok ma, “Anakku, Samuel.” Dialusi si Samuel, “Olo, amang.”

¹⁷Disapai si Eli ma, “Aha dehe na nipaboa ni TUHAN i tu ho? Caritohon ma jolo sude tu au. Anggo adong do sanga na aha na dirahasiahon ho, hona uhum ni Debata do ho.”

¹⁸Jadi dicaritohon si Samuel ma sudena tu si Eli. Sada pe nada adong na nirahasiahonnia. Dung i didok si Eli ma, “TUHAN do Ia, padiar ma dipatulus Ia sanga na aha giot ni rohaNia.”

¹⁹Mur magodang ma si Samuel. Didongani TUHAN do ia jana dipatulus do tutu tarjadi sude na nidok ni si Samuel.

²⁰Hara ni i ma dibaen na sude rayat na sian sandok luat i mangoku bahaso anggo si Samuel i sada halak, panurirang ni TUHAN do.

²¹Laing torus dope dipatidahon TUHAN i diriNa tu si Samuel di Silo, jana manghobari dohot Ia. Ganop mangkobari si Samuel, sai ditangihon bangso Israel do.