Read Batak Angkola 1 SAMUEL 31 Bible Online

1 SAMUEL 31 - Batak Angkola bible

1 SAMUEL 31

¹Laing di hatiha i marporang do halak Pilistin mangalo halak Israel di Dolok Gilboa. Bahat do halak Israel na mate disi, jana angka na tinggal i kehe ma maporus.

²Tapi torus do dikojar halak Pilistin i halahi jana hona bunu ma tolu halak anak ni si Saul i, i ma si Jonatan, si Abinadab dohot si Malkisua.

³Mur borat do parporangan i humaliang si Saul, jana hona ma tusia sandiri angka panah ni musu i jabat do banga bugangnia.

⁴Dung i didok si Saul ma tu doli-doli na maroban sinjatania, “Sintak ma podangmi jana tiham ma au, anso ulang be dipaloja dohot dibunu angka halak kapir i au.” Tapi nada ra doli-doli i mambaen songon i, angke mabiar situtu do ia. Jadi gabe dibuat si Saul ma podangnia sandiri jana dionyakkon ia ma dirinia tu ginjangna i.

⁵Jadi dung diida doli-doli i na dung marujung ngolu ni si Saul, ia pe dibuat ia ma podangnia sandiri jana dionyakkon ia ma dirinia tu podangna i lalu mate di lambung ni si Saul.

⁶Songon i ma parmate ni si Saul, anaknia na tolu i dohot sude anak buania dohot doli-doli i di na sadari i.

⁷Jadi dung dibege angka halak Israel na maringanan di bariba ni Rura Jisreel dohot na di Habincaran ni Batang aek Jordan na maporus palua dirina tentara ni Israel, jana si Saul pe dohot angka anaknia madung mate, markehean ma halahi manadingkon kotana lalu maporus muse. Dung i marroan ma halak Pilistin tu angka kota i jana diingani halahi ma i.

⁸Sadari dung parporangan i, ro ma halak Pilistin laho mangarampas angka bangke i. Dapot halahi ma bangke ni si Saul dohot anakna na tolu i payak di Dolok Gilboa.

⁹Diponggol ma ulu ni si Saul jana dirampas halahi ma angka sinjatana i. Dung i disuru halak Pilistin ma utusan na maroban ulu ni si Saul i dohot baju porangna i tu sude Luat Pilistin laho palalu barita na denggan tu rayat dohot tu debata ni halahi.

¹⁰Dung i dibaen ma angka sinjata ni si Saul i di bagasan bagas pamelean ni Debata Astoret, jana dipakuhon ma bangkena i di tembok ni kota Bet-Sean.

¹¹Tapi dung dibege halak Jabes na di Gilead na nibaen ni halak Pilistin i tu si Saul,

¹²kehe ma angka jolma na umpuluk sian i jana mardalan ma halahi saborngin i tu Bet-Sean. Dipaijur halahi ma bangke ni si Saul dohot bangke ni angka anaknia sian tembok ni kota i lalu dioban halahi ma i tu Jabes jana ditutung ma i.

¹³Dipalagut ma sude holi-holina i jana dikubur ma di toru ni hayu tamariska na di kota i. Dung i puaso ma halahi pitu ari lolotna.