Read Batak Dairi 1 Musa 1 Bible Online

1 Musa 1 - Batak Dairi bible

1 Musa 1

¹Imulana tikan itempa Dèbata suberri dunia èn,

²bagè sinigargaren ngo tanoh i, janah madèng lot potongenna. Laut i pè kumetcaho ngo menangkemmi sagumanna silot, janah gellap gulita, tapi mayap-ayap ngo kuasa Tendi JAHOWA i babo laè i.

³Nai mongkam mo Dèbata, “Hana mo sinterrang!” Nai mèter nterrang mo.

⁴Sennang ngo ukur JAHOWA midah i. Nai isirang mo sinterrang i ibas sigellap nai,

⁵igerari mo sinterrang i “Mahar” janah sigellap i “Berngin”. Bon mo ari, nai nterrang nola mo ari, imo ari perlebbè.

⁶Nai mongkam nola mo Dèbata, “Hana mo ko sada baleng perbintoha lako menirang laè i gabè dua bekkas.” Nai hana mo bagi. Bagi mo baleng perbintoha i ibaing Dèbata lako menirang laè siniteruhna dekket sini babona.

⁸Igerari mo baleng perbintoha i “Langit”. Bon mo ari, nai nterrang nola mo ari, imo ari peduaken.

⁹Nai mongkam nola mo Dèbata, “Merserrap mo laè siniterruh langit i mi sada bekkas, asa teridah tanoh.” Nai hana mo bagi.

¹⁰Igerari Dèbata mo tanoh i “Darat”, janah laè sipulung i igerari “Laut”. Sennang ngo ukur JAHOWA midah i.

¹¹Mongkam nola dèng ma mo Dèbata, “Ipenturahken tanoh i mo karina matcam bagè suan-suanen, imo simerbuahken buah merbatu dekket simerbuahken buah merlomi.” Nai hana mo bagi.

¹²Bagi mo ipenturahken tanoh i karina matcam bagè suan-suanen. Sennang ngo ukur JAHOWA midah i.

¹³Bon mo ari, nterrang mo ari, imo ari petelluken.

¹⁴Nai mongkam nola mo Dèbata, “Naing mo lot penendang i langit lako menendangi tanoh èn, lako menirang mahar dekket berngin, janah lako menebbenai ari, tahun dekket musim.” Nai hana mo bagi.

¹⁶Bagi mo penghanaken Dèbata dua penendang mbellen, imo mataniari menendangi tikan mahar, janah bulan menendangi tikan berngin; laènkenna idi ihanaken ma ngo bintang-bintang.

¹⁷Ibaing Dèbata ma ngo penendang i langit lako menendangi tanoh èn,

¹⁸mahan perguruen mahar dekket berngin, dekket menirang sinterrang dekket sigellap. Janah sennang mo ukur JAHOWA mengidah i.

¹⁹Bon mo ari, janah nterrang nola mo ari, imo ari peempatken.

²⁰Nai mongkam nola mo Dèbata, “Naing mo lot ibagasen laè i mermatcam bagè singgelluh, janah i abang-abang i merkabangen matcam bagè manuk-manuk.”

²¹Nai ihanaken Dèbata mo binatang-binatang mbellen i laut, dekket mermatcam bagè singgelluh ibagasen laè, bagi ma matcam bagè manuk-manuk. Janah sennang mo ukur Dèbata midah i.

²²Nai ipasu-pasu Dèbata mo karina i, ninganna idokken taba singgelluh ibas laè asa merrak-merrik janah idomi laut i, bagima taba manuk-manuk asa makin mbuè.

²³Bon mo ari, nai nterrang nola mo ari imo ari pelimaken.

²⁴Nai mongkam nola mo Dèbata, “Naing mo hana i tanoh i nai karina matcam binatang melemmuk dekket meriar, mebellen dekket kèdèk.” Nai hana mo bagi.

²⁵Bagi mo ibaing Dèbata pehanaken karinana i janah sennang ngo Dèbata midah i.

²⁶Nai mongkam nola mo Dèbata, “Bagèndari sitempa mo jelma codi bagè kita janah cumaen bagè rupanta. Asa irajai kalak i karina ikan, manuk-manuk, dekket karina binatang-binatang sidèban, simelemmuk bak simeriar, mbellen barang kèdèk.”

²⁷Bagi mo itempa Dèbata jelma i, janah itempa mo kalak i tosè mi diriNa. Daholi dekket daberru ngo kalak i itempa.

²⁸Nai ipasu-pasu mo kalak i, nina mo, “Meranak merberru mo kènè janah meppar asa iiani pinemparmu suberri tanoh èn janah irajai. Rajai kènè mo karina ikan, manuk-manuk, bak karina binatang sidèban simeriar i.

²⁹Ukum panganmu Kuberèken mo bamu karina matcam bagè suan-suanen simerbuahken buah merbatu dekket buah merlomi.

³⁰Tapi ukum taba karina manuk-manuk, dekket binatang meriar sidèbanna i, Kuberèken mo dukut-dukut dekket suan-suanen simerbulung mahan panganna.” Nai mènter hana mo bagi.

³¹Itengen Dèbata mo karinana sienggo nihanakenNa i, janah sennang kalohon mo ukurna. Nai bon mo ari nterrang nola mo ari imo ari peenemken.