Read Batak Dairi 1 Musa 11 Bible Online

1 Musa 11 - Batak Dairi bible

1 Musa 11

¹I mulana, karina bangsa i suberri tanoh èn pellin sada ngo kessa katana.

²Tapi tikan laus kalak i mi Babilonia, imo kan kebincaren, ndèas ngo suak i, gabè merian i sidi mo kalak i.

³Nai mengerana mo kalak i samahsa, “Aci sibahan mo batu bata, janah situtung mo i asa gabè mpihir.” Bagi mo carana asa merbatu bata kalak i, mahan batu bages janah tèr mo ibaing mahan pèjerna.

⁴Nina kalak i nola mo, “Aci mo si pajek sada kuta dekket sada palas pucukna soh mi langit, asa termurmur kita janah asa ulang nè mersèrak kita mi suberri tanoh èn.”

⁵Nai susur mo JAHOWA lako menengen kuta dekket palas sinipajek jelma i.

⁶Nai nina mo, “Sada bangsa janah sada kata ngo kalak èn, pellin permulaenna dèng ngo sura-sura kalak èn. Oda ndekkah nè, ndorok nola mo ia mahan bakunè sambing dok atèna.

⁷Selloh mo susur kita lako menursari kata kalak i, asa ulang mersiantusen nè kalak i.”

⁸Nai gabè mersèrak mo kalak i ibaing JAHOWA mi suberri tanoh èn. Gabè ipetadi kalak i mo majek kuta i.

⁹Ingo memaingken asa ibaing gerar kuta i Babel, kerna i sidi mo isursari JAHOWA kata karina bangsa, janah i sidi nai mo isèrak JAHOWA kalak i mi suberri tanoh èn.

¹⁰En mo pemparen si Sem. Dua tahun enggo kessa laè mengeraja i tikan merumur 100 tahun si Sem, lot mo anakna mergerar si Arpakhsad.

¹¹Kessa i nggelluh dèng ngo ia lima ratus tahun nai, janah lot dèng ngo dukakna sidèban.

¹²Tikan merumur 35 tahun si Arpakhsad, lot mo anakna gerarna si Selah.

¹³Kessa i nggelluh dèng ngo si Arpakhsad 403 tahun nai, janah lot dèng dukakna sidèbankenna i.

¹⁴Tikan merumur si Selah 30 tahun, lot mo anakna mergerar si Eber.

¹⁵Kessa i nggelluh dèng ngo si Selah 403 tahun nai, janah lot dèng dukakna sidèban.

¹⁶Tikan merumur 34 tahun si Eber, lot mo anakna mergerar si Peleg.

¹⁷Kessa i nggelluh dèng ngo si Eber 430 tahun nai, janah lot dèng ngo dukak-dukakna sidèban.

¹⁸Tikan merumur 30 tahun si Peleg, lot mo anakna mergerar si Rehu.

¹⁹Kessa i nggelluh dèng ngo si Peleg 209 tahun nai, janah lot dèng ngo dukakna sidèban.

²⁰Tikan merumur 32 tahun si Rehu, lot mo anakna mergerar si Serug.

²¹Kessa i nggelluh dèng ngo si Rehu 207 tahun nai janah lot dèng ngo dukak-dukakna sidèban.

²²Tikan merumur 30 tahun si Serug, lot mo anakna mergerar si Nahor.

²³Kessa i nggelluh dèng ngo si Serug 200 tahun nai, janah lot dèng ngo dukak-dukakna sidèban.

²⁴Tikan merumur 29 tahun si Nahor, lot mo anakna mergerar si Terah.

²⁵Kessa i nggelluh dèng ngo si Nahor 119 tahun nai, janah lot dèng ngo dukak-dukakna sidèban.

²⁶Enggo kessa merumur pitupuluh tahun si Terah, lot mo anakna imo si Abram, si Nahor dekket si Haran.

²⁷En mo pemparen si Terah: Anakna si Abram, si Nahor dekket si Haran. Anak si Haran imo si Lot.

²⁸Matè ngo si Haran i kutana imo i Ur nagerri Babilonia, tikan nggelluh dèng bapana.

²⁹Ikabini si Abram mo si Sara, janah si Nahor kabin dekket si Milka berru si Haran. Lot dèng ngo anak si Haran mergerar si Jiska.

³⁰Ukum si Sara nggempus ngo.

³¹Itadingken si Terah ngo kuta Ur ni Babilonia rebbak dekket si Abram anakna i, bak si Lot kempuna i, dekket si Sara purmaènna imo sinibages si Abram. Sura-surana naing mbungkas mi tanoh Kanaan. Tapi soh kessa kalak i mi Haran, gabè merian i sidi mo kalak i.

³²Janah i sidi mo matè si Terah tikan merumur 205 tahun.