Read Batak Dairi 1 Musa 14 Bible Online

1 Musa 14 - Batak Dairi bible

1 Musa 14

¹Lot mo empat raja, imo: Raja Amrafel kan Babilonia nai, raja Ariokh i Elasar nai, raja Kedorlaomer i Elam nai dekket raja Tideal i Goyim nai,

²mergeraha mengalo lima raja sidèban, imo: Raja Bera i Sodom nai, raja Birsya i Gomora nai, raja Syinab i Adma nai, raja Semeber i Zeboim nai dekket raja i Bela nai sinidokkenna ma Zoar.

³Kongsi mo raja si lima i, janah ipedèmpu mo soridaduna i i napa Sidim, imo i laut Matè sibagèndari.

⁴Sipuluh dua tahun dekkah kalak i irajai raja Kedorlaomer, tapi tahun pesipuluh telluken memberontak mo kalak i tabasa.

⁵I tahun pesipuluh empatken, roh mo raja Kedorlaomer rebbak dekket denganna sada arih bak soridaduna, italuken kalak i mo kalak Refaim i Asyterot-Karnaim, kalak Zuzim i Ham, kalak Emim i Syawe-Kiryataim,

⁶dekket kalak Hori i uruk Edom, nai ijalang mo kalak i ndaoh soh mi El-Paran i biding gurun pasir.

⁷Nai balik nola mo simenjalang i mi En-Mispat, gerarna begèndari imo Kades. Italuken kalak i ngo karina tanoh Amalek janah italuken kalak i mo kalak Amori simerian i Hazezon-Tamar.

⁸Nai ipetaram raja Sodom, Gomora, Adma, Zeboim dekket raja Bela mo soridaduna i napa Sidim lako geraha

⁹mengalo raja-raja kalak Elam, Goyim, Babilonia, dekket raja kalak Elasar; jadi lima raja mengalo empat raja.

¹⁰Dom ngo sumur aspal i napa i, janmah tikan naing mperrus raja Sodom dekket Gomora i pergerahaen i nai, merdabuhen mo kalak i mi sumur i. Ukum raja sitellu nai mperrus ngo laus mi delleng.

¹¹Siempat raja simennang i, itaban mo karina silot i Sodom dekket Gomora bagi ma dekket pangaen, nai laus mo kalak i.

¹²Si Lot anak dedahen si Abram merian i Sodom ngo tikanna i, jadi dekket ngo ia itaban musuh i rebbak dekket karina hartana.

¹³Tapi lot mo sada kalak maluah, ibagahken mo karina simasa i taba si Abram kalak Heber i. Merian i gembar kayu keramat bekkas mersembah kalak Mamre imo sada kalak Amori. Ukum si Mamre, dekket kaka-anggina, imo si Eskol dekket si Aner supan-supan si Abram ngo.

¹⁴Idengkoh si Abram kessa mo, tertaban si Lot ipepulung mo karina naposona sipandè geraha, buèna tellu ratus sipuluh ualuh kalak, nai iayaki mo raja siempat i soh mi kuta Dan.

¹⁵I sidi mo ibagi si Abram naposona i gabè piga-piga nuhnuhen, nai ialo mo musuh i tikan berngin janah italuken. Ipellet ngo kalak i soh mi Hoba kan utara kuta Damaskus.

¹⁶Irampas si Abram ngo harta-harta sienggo itaban i, bagi dekket si Lot bak karina hartana, bagi dekket daberru nitaban kalak i.

¹⁷Enggo kessa italuken Raja Kedorlaomer dekket raja denganna kongsi, balik mo si Abram. Nai isimbak-simbak raja Sodom mo ia i Napa Syawe sinigerarenna ma Napa Raja.

¹⁸Si Melkisedek Raja Salem janah ma imam Dèbata Sintèmbul i, merembah roti dekket anggur bai si Abram,

¹⁹nai ipasu-pasu mo si Abram, nina mo, “Dak ipasu-pasu Dèbata Sintèmbul i janah simenghanaken langit dekket tanoh èn mo si Abram.

²⁰Nipoji mo Dèbata Sintèmbul i sienggo merèken kemenangen bamu mengalo musuhmu.” Kessa i iberèken si Abram mo taba si Melkisedek nipersipuluh karina harta sinirampasenna i sienggo iembah balik.

²¹Nai nina raja Sodom mo taba si Abram, “Bamu mo harta sienggo terampasen i, tapi paduè mo balik taba aku karina orangku.”

²²Ialoi si Abram mo, “Kusumpahken mo i hadeppen JAHOWA, Dèbata Sintèmbul i, simenghanaken langit dekket tanoh,

²³oda kubuat barang kadè hartamu, agia sirambar bennang barang sembikbik tinali solop pè oda. Merkitè bagidi, ‘oda terdokken kono, aku maing bèak si Abram.’

²⁴Oda uè aku muat barang kadè pè lako bangku. Pellin sienggo ipakkè naposongku i mo kessa uè aku menjalo sikira bangku. Tapi ukum supan-supanku si Aner, si Eskol dekket si Mamre, ibuat mo bagianna.”