Read Batak Dairi 1 Musa 16 Bible Online

1 Musa 16 - Batak Dairi bible

1 Musa 16

¹Si Sara sinibages si Abram laju madèng lot dukakna. Tapi lot ngo sada kalak hambana i Mesir nai, sada simerbaju simergerar si Hagar.

²Idokken si Sara mo taba si Abram, “Oda iduè JAHOWA aku menubuhken dukak. Kerna i lotien mo rebbak meddem kono dekket hambangku èn. Tah bakunè ndorok ia menubuhken dukak lako bangku.” Iuèi si Abram ngo pendokken si Sara i.

³Bagi mo iberèken si Sara taba si Abram si Hagar mahan cimbangna. Tikanna i enggo mo sipuluh tahun si Abram i tanoh Kanaan.

⁴Nai rebbak meddem mo si Abram dekket si Hagar, nai mengkandong mo daberru i. Tapi ibettoh si Hagar kessa enggo mengkandong ia, gabè jukkat mo ia, janah oda nè isangko si Sara.

⁵Nai nina si Sara mo taba si Abram, “Enggo kuberèken hambangku si Hagar bamu, janah ibettoh kessa enggo mengkandong ia gabè oda nè isangko aku. Salahmu ngo i. JAHOWA mo maing putusen simasa èn taba ko dekket aku.”

⁶Ialoi si Abram mo, “Selloh, hambamu ngo ia janah merkuasa ngo kono bana; baing mo bana bakunè dok atèmu.” Nai idersa si Sara mo si Hagar, gabè mburo mo ia.

⁷Idahi malaèkat JAHOWA mo si Hagar i gembar laè mata-mata i gurun pasir, i dalan lako mi gurun Sur.

⁸Nina malaèkat i mo, “Alè Hagar hamba si Sara, idikè nai ngo ko, janah laus mikè?” Ialoi si Hagar mo, “Mburo ngo aku bai si Sara indukku i nai.”

⁹Nai nina malaèkat i mo, “Balik mo ko mendahisa, janah kebbasi mo ia.”

¹⁰Janah nina malaèkat i dèng ma, “Kuberèken pè bamu mbuè pinempar isè poda terbaingsa memilang pinemparmu.

¹¹Oda ndekkah nè menubuhken anak mo ko; baing mo gerarna si Ismael. Kerna enggo idengkoh JAHOWA tangismu.

¹²Tapi ukum anakmu, bagè pernggelluh kuda perjumbalang ngo ia; ialo ngo gennep jelma, janah karina jelma mengalosa. Bagè bengkiang terpistak mo ia bai karina kaka-anggina nai.”

¹³Kuso-kuso mo si Hagar ibagasen penarihenna, “Tuhu ngo aku ndia enggo mengidah Dèbata simemperdatèken aku?” Nai igerari ia mo JAHOWA sienggo mengerana i tabasa, “Dèbata Simemperdatèken.”

¹⁴Kumarna i ngo asa idokken dèba sumur sinikellang-kellang Kades dekket Bered i, “SumurNa Singgelluh i Memperdatèken Aku.”

¹⁵Nai itubuhken si Hagar mo anak, janah igerari si Abram bapana i mo si Ismael.

¹⁶Tikanna i merumur ualuhpuluh ennem tahun mo si Abram.